Read Mokpwe 1 Pètrò 2 Bible Online

1 Pètrò 2 - Mokpwe bible

1 Pètrò 2

¹O eŋgànɛ̀lɛ̀ rzɔ, e hwɛmɛ hwɛ̀ɛ̀mɛ̀ hwe anyu hwe wòhwe hwe arzɛ. È rza kɔ hweyà, e rza ohva mèhvìlì, mòtò a rzi nòneyà ŋmanyàŋgò wa eni, ndèŋgànɛ̀lɛ̀ inyɛ e mbɔrzi ya wòhwe e rzi wurza mòtò o hwàna.

²È aŋgàmɛ̀nɛ̀yi lì keka lì ana o lì luwa mòlelì mo èlìŋgɛ̀ ema mo rzàŋgi, nyayi hvɔ̀kɔ nàa mɛ̀ɛŋgɛ̀ me hwàna me èyeya mànyɔ̀ŋgɔ̀ ma màhwɛ, aŋga nanù, e lelì tɛ, e oŋga o lì luwa lìrzùŋgahwà lì anyu.

³Inyɔ e ma keka moŋgo mòlelì, ndèŋgànɛ̀lɛ̀ o nàŋgɛ e hwi nɛ e Rzàŋgo e gbeyà hweyà hwe gbamù.

⁴Inyɔ e jèeya e Rzàŋgo, Mɔ̀ ema a hwèlì ndi nàa lìŋyàyi la lòŋgɛ ema hwà-òŋgèlì hwà mà lììyè, rzìi Lohwɛ̀ a ɛnɛ nanù ema lì hvomɛ̀nɛ̀yi, a lì hvɔ̀rzɔ̀wɔ̀ rzìi a lì uta.

⁵Inyɔ e jèe e hwɛ ndi nàa màŋyàyi ema mà hwèlì lòŋgɛ ema Lohwɛ̀ a gbeyàna o lì oŋga e ndawò ya eni ya èlìŋgɛ̀. Ndeŋgànɛlɛ o tenì ya eŋge ndawò ɔndi inyɔ e o mo gbèeyà. È o hwɛ ndi pìlìrzì ja wòtani, ema e o mo ŋgbɛ màhwèyà ma wòtani ema mɔ̀ à o emeyà lì akeyà na Yerzù Krirztò.

⁶Èhwànja e tìlahwì o e kààtì ya Lohwà nanù ema, “È ɔŋgɔ tɛ, nà mà wowa lìŋyàyi la wòlìto rzìi na lì rzùmèlì o Rzàyɔ̀nì, È mɔ̀ ema a mo lòkɛ̀yi a rza o hwɛnɛ tɔ̀ irzɔ̀ni.”

⁷Lìni lìŋyàyi lì e hwɛnelì wòlìto inyɔ ema e mo lòkɛ̀yi, ndi hwatò ema hwa rza mo lòkɛ̀ lì gbèyi ndi nàa, “Lìnyàŋyi ema hwà-òŋgèlì hwà mà rzɔnjɛ̀lɛ̀, lì ɔndi lì ma jɛ̀ɛ̀ lìŋyàyi la wòlìto wo ndɛnɛ.”

⁸Ndeŋgànɛ̀lɛ̀ e tìlahwì hvɛ o ehvɛhvɛ kààti ya Lohwà nanù ema, “Mɔ̀ ndi à hwèlì lìŋyàyi ema lì o nòŋgolɛ hwatò, nàa ewòmɛ ya lìŋyàyi ema e hwa kpìrzɛ. Hwàto hwa nòŋgowa ehwànja hwa rza hweyàna Lohwɛ̀. Nànù ndi Lohwɛ̀ à mà kàkɛ̀nɛ nanù ema e hwa gbèyɛ̀nɛ.”

⁹Ndi inyɔ ndi e hwèlì hwatò ema Lohwɛ̀ à mà hvɔ̀rzɛ̀, Ipìlìrzì ja ama Lohwɛ̀ ema mɔ̀ ndi à hwèlì e kiŋgɛ. È hwèlì ndi èkòmè ya wòtani, ndèŋgànɛ̀lɛ̀ Lohwɛ̀ ŋmitɛ-ŋmitɛ ndi à e hwɛni, aŋga nanù inyɔ e uŋmɛ̀lɛ̀ hwahvɛhvɛ hwatò na oma mɔ̀ à hwèlì gbamù. Lohwɛ̀ à mà e ulɛ ò tenì ya jìtìtì ndèŋgànɛ̀lɛ̀ mɔ̀ à mà e jànà o ŋmàye.

¹⁰O hvonda hvɔ̀kɔ, inyɔ e rzi hwɛ tɔ̀ hwatò hwa ama Lohwɛ̀, ndi o naŋgɛ e ma timba ndi hwatò hwa eni. O hvonda hvɔ̀kɔ ììlì ja ama Lohwɛ̀ i rzi e uke, ndi o naŋgɛ inyɔ e ma luwa ììlì ja eni.

¹¹Imbùnda ja ami kòkò, na arza nanù ema e rzɔ̀ŋgìtɛ̀nɛ̀ nanù ema e hwèlì ndi hwàyɛ̀nì, inyɔ e aka ndi lì aka anu rze ya mɔ̀nyɛ̀. O eŋgànɛ̀lɛ̀ e rzi ika mèèmà me anyu o hweyà hwe e nyo ya e mòtò wa hwènàmà ehwànja eŋge e anana hwèlìŋgɛ̀ hwe anyu.

¹²È hwɛnɛ hwɛ̀ɛ̀mɛ̀ hwe gbamù o ìtììtènì ja hwaŋga hwatò ema hwa rza lòkɛ̀ Lohwɛ̀, aŋga nanù tɔ̀ nɛ wɔ hwa e rzàmba nanù ema e gbeyà wòhwe, wɔ hwa ɛnɛ hwegbèèlì hwe anyu hwe gbamù. Èŋge e gbeyà hwa eka Lohwɛ̀ o wùnyà wo hwejèelì hwe eni.

¹³O nyòla lìna la ama e Rzàŋgo e arzihwirzɛ inyɔ hwiti, o rze ya hwatò hwa ene rze ema hwa hwèlì o lìkànèyà. Tɔ̀ o e mòkànèlì mo ndɛ̀ɛ̀ndɛ̀,

¹⁴tɔ̀ o ikìŋgɛ ema i hwèlì o rze ya lìkànèyà la e mòkànèlì mo ndɛɛndɛ, ema hwa omahwi na e kiŋgɛ o lì kɔ̀kìrzɛ̀ hwaŋga hwatò ema hwa gbeyà wòhwe, na o lì eka hwaŋga hwatò ema hwa gbeyà gbamù.

¹⁵È hwèlì ndi hwètɛ̀yirzèlelì hwe ama Lohwɛ̀ nanù ema, lì akeyà na hwègbèèlì hwe anyu hwe gbamù ema e gbeyà, e hwɛni lì tɛmirzɛ e mbɔrzi ya ŋgundu ema hwatò hwa èèti hwa ohwa o lì e teŋgɛ̀nɛ̀.

¹⁶È lìya nàa hwatò hwa wònja. Ndi e rzi gbeyàna eŋge wònja ya anyu, o lì gbeyà wòhwe. Ndi e lìya nàa hwàgbèèlì hwa ama Lohwɛ̀.

¹⁷È ŋgbe hwatò hwa arzɛ èluhwe. È lìŋgàne hwaŋga hwatò ema wɔ̀ hvɛ hwa lòkɛ̀ Krirztò. È ŋgbe Lohwɛ̀ èluhwe. È ŋgbe hvɛ e kìŋgɛ ndɛ̀ɛ̀ndɛ̀ èluhwe.

¹⁸Inyɔ hwàkutu, e arzihwirzɛ inyɔ hwiti o ma irzàŋgo ja anyu ja èwòlò, e hwa uŋmɛ̀lɛ̀ èluhwe ya arzɛ. Rzeketɛ o hwaŋga mɛnɛ ema hwa e uŋmɛ̀lɛ̀ gbaamù na lì e aŋgoweya, ndi o tɔ̀ hwaŋga ema hwa ambirzɛnɛyi.

¹⁹Lohwɛ̀ a e okana mɔ̀nyɛ̀ŋgi e hwèlì tɛ nanù ema e àjùlɛ̀nɛ̀yi mòrziyò mo lìtake ema e rzi àŋgàmɛ̀nɛ̀ lì luwa o nyòla ya eni.

²⁰O gbèyi tɛ wòhwe rzìi o kakana ŋmèma o e njuma ema hwa o anàni o nyòla woŋgo wòhwe, ima mɔ̀rzɛ̀ŋgì o luwa e? Ndi o ajùlɛ̀nɛ̀ tɛ mòtàkà o tɔ̀ ima eyà ya gbamù ema o gbèyi, aŋga nanù Lohwɛ̀ a o òkana mɔ̀nyɛ̀ŋgi.

²¹Lìni lìtake lì e lɔ̀ɔ̀nì inyɔ ema Lohwɛ̀ à mà hvɔ̀rzɛ̀, ehwànja tɔ̀ Krirztò mɔ̀ ŋmìti à mà e tàkeya. Ndeŋgànɛ̀lɛ̀ mɔ̀ à mà hwɛ à mà e ŋgba embànelì ya lì oŋgama imbɔwu ja eni ja màtàŋga.

²²Mɔ̀ a rzi gbeye tɔ̀ wòhwe, ndèŋgànɛ̀lɛ̀ o rzi hwɛ tɔ̀ mòtò ema à mà mo hweyàna eyà ya lì kɔ̀ o wàna ya eni.

²³È hvonda ema hwà mà mo hwɛnyɛ, mɔ̀ à rzi timbirzɛlɛlɛ na yolì. È hvonda ema à mà take a rzi kimeya tɔ̀ mòtò, ndi à mà ika ndi lìhvìtà la eni na Lohwɛ̀ e mòkàyìrzèlèlì wa jɔ̀kɛ̀.

²⁴Krirztò mɔ̀ ŋmìti à mà hwanɛ wòhwe wo arzu o e nyo ya eni o mbàrza, aŋga nanù irzɔ, i hwɛmɛ lì gbeyà hweyà hwe wòhwe, ndèŋgànɛ̀lɛ̀ o lì a ayèŋgowɛ̀ lì lìya lòŋgɛ la ehve-ehve. O lì akeyà na hwèhwàŋgù hwe eni inyɔ e ma wɔ̀wìrzɛ̀hwɛ.

²⁵O hvonda hvɔ̀kɔ, inyɔ e ma hwɛ ndi nàa mɛ̀lɛ̀ŋgù ema me ma ɛndɛ moŋgoŋgo. Ndi o naŋgɛ Lohwɛ̀ à mà e timbirzɛ o lì oŋgama e mòtò ema a e ɔŋgeya nàa e mɔ̀ɔ̀ŋgèlì hwa mɛ̀lɛ̀ŋgù a ɔŋgeya gbaka wò mɔ̀lɛ̀ŋgù.