Read Mokpwe 2 Pètrò 2 Bible Online

2 Pètrò 2 - Mokpwe bible

2 Pètrò 2

¹Ò è hvonda yà kòhwàà ò mà wurza hwà-òhwèlì hwa hwèlìŋgɛ̀ hwa mòlaŋgà ò ìtììtènì jà hwatò. Ŋgànà hvɔ̀kɔ hvɛ nanù mɛnɛ ɔndi hwà-òkòlèlì hwa mòlaŋgà hwa ò wurzɛ ò ìtììtènì jà anyu. Wɔ̀ hwa ò gbeyàna meyàno ò lì okòlɛ̀ hwèyòkòlèlì hwe mòlaŋgà, hweŋge hwèyòkòlèlì hwe ò hvàŋga hwatò ema hwa hwe lòkɛ̀. Hwàŋga hwà-òkòlèlì hwa mòlàŋga hwa ò rzɔ̀rzɔ̀ è Rzàŋgo ema mɔ̀ ndi à hwa ulɛ̀yi ò tenì yà wòhwe. Ène eyà è ò gbeyà hwa ò ahvàŋgelɛ wɔ̀ hwiti kàrzi-kàrzi.

²Hvɛ tɔ̀ nanù, rzayi-rzayi ja hwatò hwa o òŋgama ndi hweyà hwe mbindo ema hwe hwaŋga hwà-òkòlèlì hwa mòlàŋga. Èhwànja o mamɛ ema wɔ̀ hwa gbeyà, hwatò hwa o òhwa wòhwe o hweyà hwe e Njiya ya jɔ̀kɛ̀.

³O tenì ya e njɔ̀ŋgu ya awu, hwanu hwà-òkòlèlì hwa mòlaŋgà, hwa o luwa morzɛ̀ŋgi o lì e ohweyà màyìtò ema wɔ̀ hwa weki e lì e hvùmana hwèèmà. Lohwɛ̀ mɔ̀ à mà màa lì akɛlɛ e mbàko na e koohwa nanù ema a o hwa kɔ̀kìrzɛ̀. Èŋge kɔ̀kìrzɛ̀ e hwa ambɛ̀lɛ̀, ndèŋgànɛ̀lɛ̀ mòŋgo mokona mo hwa ambɛ̀lɛ̀.

⁴Lohwɛ̀ à rzìi hwɛmɛ i aŋgèlì ema ì mà gbeyà wòhwe, ndi à mà hwa aŋgba ò tenì yà mùnya ema mò rza lìma. Ò èki ema wɔ̀ hwa kàkahwà nà iŋgɔ̀kɔ̀hwi nà jììtìtì ò lì ambɛ̀lɛ̀lɛ̀ Wùnyà wò Hwèkàyìrzèlèlì.

⁵Lohwɛ̀ à rzi làkìrzɛ̀ hwatò hwa mòlòmɛ̀. Mɔ̀ à mà yɔ̀lɛ̀ è mbuwà natɛ̀ɛ màlìhwà ma mà onda rzìi mà indìrzɛ hwatò hwa arzɛ ema hwa rzìi hwɛnɛ ɛ̀ɛ̀mɛ̀ yà hwatò hwa ama Lohwɛ̀. Nowà ema à mà hwɛ lì ohweyà hwatò ò lì gbeyà hweyà hwe gbamù, mɔ̀ nà lìhvɛhvɛ lìrzàmba là hwatò mɛnɛ ndi Lohwɛ̀ à mà rzùŋge.

⁶Ò mburza yà nanù, Lohwɛ̀ à ma jɔ̀kɔ mambowà mà ndɛɛndɛ ma Rzodomi na Gòmorà, à mà ma hvàŋga na mùnya rzìi ma timba hvindi. A ma mà gbeyà nàa ɛmɛnɛni ya mamɛ ema e o gbèyɛnɛ hwatò ema hwa rza o hwiyɛ Lohwɛ̀.

⁷A ma rzùŋga Lɔ̀ti, munyanà wa gbamù ema a rzi lìŋgànɛ hweŋge hwɛ̀ɛ̀mɛ̀ hwe wòhwe ema hwaŋga hwatò hwa wòhwe hwà mà hwɛ lì gbeyà.

⁸Oŋgo mòtò wa gbamù à mà hwɛ ndi lì lìya èki yɔ̀kɔ na hwaŋga hwatò hwa wòhwe. Wùnyà na wùnyà tɛ mɔ̀ à mà ɛnɛ, na lì hweyà hweŋge hweyà hwe wòhwe ema hwaŋga hwatò hwà mà hwɛ lì gbeyà na lì ohwa. Hweŋge hweyà hwe wòhwe hwe ma mo tàkìrzɛ̀ ŋmèma mo eni mo gbamù ehwànja mɔ̀ à mà hwɛ ndi mòtò wa gbamù.

⁹O eŋgànɛ̀lɛ̀ rzɔ, e Rzàŋgo e hwi nɛ a kombɛ hwatò ema hwa hwi Lohwɛ̀ o màkèkirzɛnɛ ma awu. Nà nɛ hvɛ o lì ika hwatò hwa wòhwe o rze ya hwèkɔ̀kìrzèlì o lì ambɛ̀lɛ̀ Wùnyà wo hwèkàyìrzèlì.

¹⁰À ò kɔ̀kìrzɛ̀ hwatò rzɛ̀hvɔ̀nì hwaŋga hwatò ema hwa oŋgama èèti yà è nyàma nyo yà mòtò wà hwènàmà rzi hwa hvàka lìkànèyà là ama Lohwɛ̀. Hwanu hwà-òkòlèlì hwa mòlaŋgà hwa kolì ndèŋgànà hwa ohvi hvɛ è kumba. Ndeŋgànɛ̀lɛ̀ hwa rza ŋgbelì tɔ̀ èluhwe ò iŋginyà jà è ŋmanyu yà lohwà. Wɔ̀ hwa hwɛnyɛ ndi iŋgi ŋginyà lì hwɛnyɛ, è rzi hwɛ lì oka tɔ̀ wɔ̀ŋgɔ̀ tɔ̀ wɔ̀kɔ.

¹¹Tɔ̀ i aŋgèlì ema jɔ̀ jì imbami là aka lìmɛni nà lì ohva ŋginyà lì aka hwanu hwà-òkòlèlì hwa mòlaŋgà hwa rza hwɛnyɛ iŋgi ŋginyà ema ì hwèlì ò ŋmanyu ò worzo wò ama è Rzàŋgo.

¹²Ndi hwaŋga hwà-òkòlèlì hwa mòlaŋgà, hwa gbeyà ndi hweyà ò màlùtèyà mà awu, nàa nyàmà jà waŋga. Iŋgi nyàmà ja waŋga ì ŋyàhwɛlɛyì ndi ò lì lɛ̀mbɛ̀hwɛ̀ nà lì oŋwahwa. Hwàŋga hwà-òkòlèlì hwa mòlaŋgà wɔ̀ hwa ohwa ndi hweyà hwe wòhwe ò tɔ̀ ima eyà ema hwa rzɔ̀ŋgìtɛ̀nɛ̀. Ò eŋgànɛ̀lɛ̀ rzɔ, Lohwɛ̀ à hwa nyɔ̀ŋgìrzɛ̀ nà oma hwatò hwa oŋwa iŋgi nyàmà jà waŋga.

¹³Lohwɛ̀ à ò gbeyà nanù ema hwa tàke rzayi-rzayi ehwànja wɔ̀ hvɛ hwa mà tàkìrzɛ̀ hwahvɛhvɛ hwatò. Wɔ̀ hwa lìŋgàni o lì ujìrzɛ̀ e nyɔ̀ŋgi ya e nyàma nyo. Ndeŋgànɛ̀lɛ̀ wɔ̀ hwa rza oka tɔ̀ irzɔ̀ni o lì gbeyà hweŋge hweyà tɔ̀ o ŋmèrze mo wùnyà. Hwa hwèya gbamù o lì gbeyà hweŋge hweyà e hwèlì tɛ nanù ema hwa hwèlì lì laa na inyɔ èki yɔ̀kɔ. O eŋgànɛ̀lɛ̀ rzɔ, hwà mà hvàŋga lìinà la anyu na lì e jàneya irzɔ̀ni.

¹⁴Èwòlò ya awu ya arzɛ e hwèlì ndi o lì gbeyà mòrzònje na tɔ̀ ima mòlana ema hwa ɛni. È nyɔ̀ŋgi ya awu ya lì gbeyà wòhwe e rza tànɛ lì kuwa. Wɔ̀ hwa lukɛlɛ hwatò ema lìlòkɛ̀ la awu lì rza imbamɛ rzìi hwa hwà gbeyà hwa unda o wòhwe. È nyɔ̀ŋgi e hwèlì o mèèmà me awu. Hwa hwèlì ndi o rze ya mòjèmà mo ama Lohwɛ̀.

¹⁵Hwà mà hwɛmɛ e njiya ema e lɔ̀wu hwa oŋgama ndi ehvɛhvɛ njiya. Wɔ̀ hwa oŋgama ndi ɛ̀ɛ̀mɛ̀ ya ama Bàlàamì. Bàlàamì ema à mà hwɛ e ŋmanà hwa ama Bùrzɔ̀, Bàlàamì à mà lìŋgàna wokondo ema à mà luwe o lì gbeyà la hweyà hwe wòhwe.

¹⁶Lohwɛ̀ à mà gbeyà nanù ema jàkàrzi ja eni i mo kànje o wòhwe wo eni. Jàkàrzi, èembe ema e rza ohwa, e ma ohwirzɛnɛ Bàlàamì na lìlo la mòtò. Èŋge eyà e ma gbeyà nanù ema ɛ̀ɛ̀mɛ̀ ya ŋmɛ̀ɛ̀nyɛ̀ mo ama e mòòhwèlì wà èlìŋgɛ̀ Bàlàamì e ma kuwa.

¹⁷Hwanu hwatò hwa hwèlì ndi nàa hwetùŋgu hwe màlìhwa ema hwe rzɔ̀njɔ̀. Wɔ̀ hwa hwèlì ndi nàa lìmbàki ema mùùlì mò lìŋgòwànà. Lohwɛ̀ à mà màà lì hwa rzekeya èki ò tenì yà jììtìtì ndɛnɛ.

¹⁸Wɔ̀ hwa gbeyà jòòhwì jà kumba na èèti. Wɔ̀ hwa gbeyàna hweyàrzèlì hwe è nyàma nyo yà è mòtò wà hwènàmà ò lì lùkɛ̀lɛ̀ hwatò. Hwàto ema wɔ̀ hwa ɔ̀njɔ̀ɔ̀, hwa hwèlì ndi hwatò ema hwa mà wòteyà lì ulɛ̀ màtàŋga mà awu ò hwèlìyelì hwe hwatò hwa wòhwe.

¹⁹Wɔ̀ hwa ohweyà hwatò nanù ema hwa oŋgami tɛ hwèyòkòlèlì hwe awu, hwa gbeyà tɔ̀ mamɛ ema hwa arza lì gbeyà, ema tɔ̀ wɔ̀ hwitɛ-hwitɛ wòhwe wò hwa lìŋgi nà è ŋgɔ̀kɔ̀hwi. Wòhwe wò hwa lìŋgi ehwànja tɔ̀ mamɛ ema è kànèyà mòtò, oŋgo mòtò à hwɛ ndi mòkòmì ò rze yà eŋge yòma.

²⁰È hwèlì tɛ nanù ema mòtò à lòkɛ̀yi e Rzàŋgo na e Mòrzùŋgèlì wa arzu Yerzù Krirztò, nanù oma mɔ̀ à mà màa lì anjiya o tenì ya lòŋgɛ la wòhwe la ene rze. Mɔ̀ à mà anjiya tɛ o tenì ya lìŋgi lòŋgɛ, rzìi a timba lì àyinɛ̀lɛ̀ o tenì hvɛ, rzìi lìŋgi lòŋgɛ lì mo wowa mòkòmì, e nyayi ema mɔ̀ à hwèlì nàŋgɛ, e hwèlì wòhwe lì aka e nyayi ema mɔ̀ à mà lome lì hwɛ.

²¹È ma kanɛ̀ ndi o lì hwɛ gbamù nanù ema wɔ̀ hwa rzi lome lì hwiya e njiya ya jɔ̀kɛ̀, lì aka lì e hwiya rzìi hwa rzi ika e mbenda ja wòtani ja ama Lohwɛ̀. Wɔ̀ hwà mà rzàŋgohwa ndi eŋge mbenda.

²²Mamɛ ema e ma hwa gbèyɛ̀nɛ e uŋmɛ̀lɛ̀i ndi nanù ema, ŋmàna mo òhwa ndi e jɔ̀kɛ̀ nanù ema, “È ŋgbàà e timba ndi o lì laa mamɛ ema e ma màa lì yohwa” ndèŋgànɛ̀lɛ̀ “È ŋgòwa ema e ma rzorzahwɛ e rza hvoŋga o lì anyɔ̀kɛlɛ o tenì ya lìrzanja.”