Read Mokpwe 2 Pètrò 3 Bible Online

2 Pètrò 3 - Mokpwe bible

2 Pètrò 3

¹Imbùnda ja ami kòkò, ene kààtì ndi i ùkirzɛ̀ ihwàkɛ ema nà mà e tìleya. O tenì ya i kààtì ja ahwakɛ, nà mà e ɔ̀ŋgɛ̀lɛ̀nɛ hweyà ema e lomi lì hwiya, aŋga nanù e ɔ̀ŋgɛ̀lɛ̀ tɛ hweyà ema nà mà tìlɛ̀, hwe e oŋgowàna o lì hwɛnɛ màlùtèyà ma jɔ̀kɛ̀.

²Nà arza nanù ema e ɔ̀ŋgɛ̀lɛ̀ hweyà ema hwe ma ohwahwa, natɛ̀ɛ na e kohwaa na hwà-òhwèlì hwa hwèlìŋgɛ̀. Ndeŋgànɛlɛ inyɔ e àŋgàmɛ̀nɛ̀yi lì ɔ̀ŋgɛ̀lɛ̀ eyà ema e Rzàŋgo na e Mòrzùŋgèlì wa arzu à mà ohweyà i àpɔ̀rzìtòlò nanù ema hwa e ohweyà.

³Eyà ya worzo e aŋgàmɛ̀nɛ̀yi lì rzɔ̀ŋgìtɛ̀nɛ̀ nanù ema o mene mèènyà me lìrzùkù, lòŋgo la hwatò hwa o wurza ema mòŋgɛ ma awu, ma o kànèyàhwɛlɛ ndi na e nyìrzɛ̀ ya awu ya e nyàmà ya nyo hwa e yɔ̀eyà,

⁴o lì ohwa nanù ema, “A ma ohwa nanù ema a jà hvɛ, one mɔ̀ à hwèlì nàŋgɛ e? Irzàŋgo ja arzu i ma màa lì ŋwa kohwaa, ndi tɔ̀ ima eyà e hwèlì ndi nanù mɛnɛ, na oma e ma hwɛ natɛ̀ɛ na o ewèkelì ya e rze.”

⁵Wɔ̀ hwa o hvàka e jɔ̀kɛ̀ ema e ohwa nanù ema Lohwɛ̀ à mà gbeyàna e mbɔrzi ya eni o lì wèkana e ŋmanyu yà lohwà na e rze. A ma gbeyà e rze e ma wurza o tenì ya màlìhwà ndeŋgànɛlɛ à mà gbeyàna màlìhwa o lì wèka e rze.

⁶Ndeŋgànɛ̀lɛ̀ màlìhwà hvɛ ndi à mà gbeyàne o lì hvàŋga e rze. A ma omà e mbuwà. Èŋge mbuwà e ma yɔɔ natɛ̀ɛ màlìhwà ma mà onda e rze ya arzɛ natɛ̀ɛ hwèèmà hwe arzɛ hwe kuwa lì inda.

⁷Èŋge mbɔrzi mɛnɛ ema Lohwɛ̀ à mà gbeyàne o lì wèka e ŋmanyu yà lohwà na e rze, ɔndi mɔ̀ à gbeyànì o lì kombɛ e ŋmanyu yà lohwà na e rze aŋga nanù a hwe rzɛlɛnɛ mùnya. A hwèlì a ambɛlɛlɛ e ŋmanyu yà lohwà na e rze na hwèkàyìrzèlèlì. Woŋgo wùnyà ɔndi mɔ̀ à o hvàŋgɛ hwatò ema hwa rza ohvi ɛ̀ɛ̀mɛ̀ ya hwatò hwa Lohwɛ̀.

⁸Imbùnda ja ami kòkò, e rzi hvoŋgà ene eyà ya awɔ̀kɛ, o rza enje tɔ hwètìkòwèlì o mirzɔ̀ ma ama e Rzàŋgo lì hvomɛ̀nɛ̀ wùnyà wɔ̀kɔ na ikolì ja meya. O mɔ̀ hwe ahwàkɛ, hwe hwèlì ndi nyayi hvɔ̀kɔ.

⁹È Rzàŋgo e rza ɛndɛ ndi hviyayi, o lì gbeyà mamɛ ema mɔ̀ à kàkɛ̀nɛyi. Lòŋgo la hwatò hwa ɔ̀ŋgɛlɛ nanù ema mɔ̀ à hwèlì hviyàyi. Ndi à mà e àjùlɛ̀nɛ̀ ehwànja mɔ̀ à rza arza nanù ema tɔ̀ mòtò tɔ̀ mɔ̀kɔ a wɔ̀lɛnɛ lòŋgɛ la eni. A arza nanù ema hwatò hwa arzɛ hwa tikowe o wòhwe hwa awu.

¹⁰Ndi wùùnya ema è Rzàŋgo è ò jɛ̀ɛ̀, à ò jà ndi hvàkàlà nà oma è ŋmìhwɛ à jà. Ò woŋgo wùnyà, lìwòhwɛ̀ là ŋmanyu lì o nyɔ̀ŋgɔ nà mɔ̀tɔ̀wù mondɛnɛ. Hwèèmà hwe arzɛ ema hwe hwèlì ò lìwòhwɛ̀ là ŋmanyu hwe o rzèeyà, ndeŋgàna hwe nyɔ̀ŋgɔ. Rzìi è rze nà tɔ̀ mamɛ ema è hwèlì ò tenì hwe ɔhvɛ hwe rzèeyà nà lì nyɔ̀ŋgɔ.

¹¹Kànàtɛ hwene hwema hwe arzɛ hwe ò hvàŋgahwɛ̀ ndi ò ene ŋgànà, ima lìtumba là hwatò inyɔ è ò hwɛ̀ɛ̀ e? Mòòŋgɛ mà anyu mà àŋgàmɛ̀nɛ̀yi lì hwɛ Wòrzàŋgì ndèŋgànɛ̀lɛ̀ inyɔ hvɛ e hwɛnɛ ɛ̀ɛ̀mɛ̀ hwe hwatò hwa ama Lohwɛ̀.

¹²Inyɛ̀ è hwɛnɛ ene ɛ̀ɛ̀mɛ̀ nà oma è ambɛlɛlɛ wùùnyà ema Lohwɛ̀ à mà rzèkeyà nanù ema Krirztò à jà. È à tàkirzɛ aŋga nanù woŋgo wùnyà wò akɛlɛ lì jà. Ò wòŋgo wùnyà mùùnya mò kùwa lì rzɛ̀lɛ̀ lìwòhwɛ là ŋmanyu là arzɛ ndèŋgànɛ̀lɛ̀ mò rzɛ̀lɛ̀ hwèèmà hwe arzɛ ema hwe hwèlì ò ŋmanyu.

¹³Ndi ja ambɛ̀lɛ̀ lì kàkɛ̀nɛ ema Lohwɛ̀ à mà jo ŋgbɛ nanù ema a o wèka lìwohwɛ la ŋmanyu lì hvènya na e rze hvènya. Hwàto hwa arzɛ ema hwa o hwɛ o e rze hvènya, hwa o gbèeyà ndi hweyà hwe gbamù.

¹⁴O eŋgànɛlɛ imbùnda ja ami kòkò, na oma ya ambɛlɛlɛ woŋgo wùnyà, e gbeye gbamù wo anyu o lì hwɛ Wòrzàŋgì ema e rza ohva njɔ̀mi o worzo wa ama Lohwɛ̀. Nà o lì hwɛ hvɛ o ɛ̀yɔ̀lɛ̀ na mɔ̀.

¹⁵Inyɛ̀ e hwiye nanù ema na oma e Rzàŋgo e hvàŋga hvonda o lì jà, e hwèlì ndi nanù ema inyɛ mɔ̀ à ŋgbe hwatò e hvonda o lì luwa lì rzùŋgàhwa. Nànù ndi Pàwolò mɔ̀ hvɛ à mà gbeyàne lìhwiyè ema Lohwɛ̀ à mà mo ŋgbe o lì e tìleya e kààti.

¹⁶Èya ene ema mɔ̀ à mà tìlɛ̀ o ikààti ja eni ja arzɛ. O hwèlì lòŋgo la hweyà ema hwe ambi o lì rzɔ̀ŋgìtɛ̀nɛ̀ o ikààti ja eni. Iŋgi nyayi ja hweyà ndi hwatò ema hwa rza hwɛnɛ lì rzɔ̀ŋgìtɛ̀nɛ̀, ema lìlòkɛ̀ la awu lì rza enyohwɛ̀nɛ̀ hwa tikowa lìrzɔ̀ŋgìtɛ̀nɛ̀ ema lì hwèlì o tenì ema lì rza hvomɛ̀nɛ̀. Èŋge ŋgànà hvɛ mɛnɛ ndi hwa gbeyàna o lì tikowa hvɛ hwehvɛhvɛ hwèhvàrzù o tenì ya e kààti ya ama Lohwɛ̀. Wɔ̀ hwa wɔ̀lɛnɛ lòŋgɛ la awu ehwànja hwa gbeyà ini nyayi ja hweyà.

¹⁷Ndi inyɔ, imbùnda ja ami e ma màa lì hwiya hwene hweyà. O eŋgànɛ̀lɛ̀ rzɔ, e hwɛ ndi o lì ijàneyà kɔ̀yi-kɔ̀yi, aŋga nanù hwatò ema hwa rza ika imbenda ja ama Lohwɛ̀, hwa rzi e gbèeyà e kpa na hwèyòkòlèlì hwe awu hwe wòhwe ema wɔ̀ hwa e okolɛ. Inyɔ e oŋgami tɛ hwèyòkòlèlì hwe awu hwe wòhwe nanù oma lìlòkɛ̀ la anyu lì rza tɛ̀mɛ̀.

¹⁸Ndi tɔ̀ nanù, e hwɛnɛ ndi ɛ̀ɛ̀mɛ̀ mɛnɛ ya ama e Rzàŋgo na e Mòrzùŋgèlì wa arzu Yerzù Krirztò, a e ŋgba e ndèli ya eni nanù mɛnɛ. Èluhwe e hwɛ na mɔ̀ o nàŋgɛ natɛ̀ɛ na o mòlìkɛ̀. Inyɛ̀ wo lìya nanù.