Read Mokpwe 1 Yòwanìrzɛ̀ 4 Bible Online

1 Yòwanìrzɛ̀ 4 - Mokpwe bible

1 Yòwanìrzɛ̀ 4

¹Imbùnda jà ami kòkò, è rza lòkɛ̀ hwatò hwa arzɛ ema hwa ohwa nanù ema hwa ohvi Èlìŋgɛ̀ yà ama Lohwɛ̀. Ndi è hwa kèkìrzɛ̀ ò lì hwiyà ŋga èlìŋgɛ̀ ema è hwèlì ò tenì yà awu, è uwɛ̀lɛ̀lɛ̀yi ndi ò mà Lohwɛ̀. È hwa kèkìrzɛ̀ ehwànja rzayi-rzayi jà hwà-òhwèlì hwa hwèlìŋgɛ̀ hwe mòlàŋgà hwa mà bùweyà ò è rze yà arzɛ.

²Nànù ndi è àŋgàmɛ̀nɛ̀yi lì gbeyà ò lì hwiya ŋga Èlìŋgɛ̀ yà ama Lohwɛ̀ è hwèlì ò tenì yà awu; tɔ̀ ima mòtò ema à ohwa nanù ema Yerzù Krirztò à mà jà anu rze yà mɔ̀nyɛ̀ nàa mòtò wà hwènàmà nanù oma oŋgo mòtò à ohvi Èlìŋgɛ̀ yà ama Lohwɛ̀.

³Ndi tɔ̀ ima mòtò ema à rza ohwa nanù ema Yerzù Krirztò à mà jà anu rze ya mɔ̀nyɛ̀ nàa mòtò wà hwènàmà, nanù oma à rza ohvi èlìŋgɛ̀ yà ama Lohwɛ̀ ò tenì ya eni. Èlìŋgɛ̀ ema eŋge nyayi yà mòtò yà ohvi ò tenì yà eni, è hwèlì ndi èlìŋgɛ̀ ema è uwɛ̀lɛ̀lɛ̀yì ndi ò è Mɔ̀kɔ̀yèlì wà ama Krirztò. Inyɔ è mà hweyà nanù ema eŋge èlìŋgɛ̀ è hwɛni lì jà, ndèŋgànɛ̀lɛ̀ ò naŋgɛ yɔ̀ è mà màa lì jà.

⁴Inyɔ ema è hwèlì nàa hwàanà hwa ami, è hwèlì ndi hwatò hwa ama Lohwɛ̀, ndèŋgànɛlɛ è mà màà lì kpìrzɛ hwà-òhwèlì hwa hwèlìŋgɛ̀ hwa mòlàŋgà. Èhwànja Èlìŋgɛ̀ yà ama Lohwɛ̀ ema è hwèlì ò tenì yà anyu, è imbami lì aka Mòkarzɛ̀ ema à kànèyà hwatò hwa ene rze.

⁵Hwàŋga hwà-òhwèlì hwa hwèlìŋgɛ̀ hwa mòlàŋgà wɔ̀ hwa hwèlì ndi hwatò hwa è rze, ò èŋgànɛ̀lɛ̀ hweyà ema hwa ohwa hwe hwèlì ndi hweyà hwe ene rze. Ndèŋgànɛ̀lɛ̀ hwatò hwa rze hwà hwa hweyàna.

⁶Irzɔ ì hwèlì ndi hwatò hwa ama Lohwɛ̀ ndèŋgànɛ̀lɛ̀ tɔ̀ njɛnɛ ema à hwi Lohwɛ̀, à àŋgàmɛ̀nɛ̀yi lì jo òkànèyà. Ndi tɔ̀ njɛnɛ ema à rza enje mòtò wà ama Lohwɛ̀, à rza jò hweyànà. Nànù ndi irzɔ jè embànà Èlìŋgɛ̀ yà jɔ̀kɛ̀ nà èlìŋgɛ̀ ema è lùkɛ̀lɛ̀ hwatò.

⁷Imbùnda jà ami kòkò, inyɛ jà alìŋgànɛ mɔ̀kɔ nà ɔ̀nɛyi, ehwànja Lohwɛ̀ ndi à jò gbèeyà ema ì lìŋgàne hwatò. Tɔ̀ ima mòtò ema à lìŋgàni hwatò nanù oma à hwèlì ndi nàa è ŋmanà wà ama Lohwɛ̀ ndèŋgànɛlɛ à hwi Lohwɛ̀.

⁸Tɔ̀ ima mòtò ema à rza lìŋgànɛ hwatò nanù oma à rza hwi Lohwɛ̀, ehwànja tɔ̀ mamɛ ema Lohwɛ̀ à gbeyà à uŋmɛ̀lɛ̀ è ndìŋgɛ ema à hwɛ̀nèlì hwatò.

⁹Nànù ndi Lohwɛ̀ à mà àwuŋmɛ̀lɛ̀ è ndìŋgɛ yà eni ò ìtììtènì jà arzu, à mà jò òmeya ehvòwa yà eni yà Ŋmanà wà Mùnyanà anu rze à mɔ̀nyɛ̀ nanù ema irzɔ jò òhve lòŋgɛ là gbìndèyà ò lì akeyà nà mɔ̀.

¹⁰Nànù ndi è ndìŋgɛ yà jɔ̀kɛ̀ è hwèlì, è rza enje ndi nanù ema ì mà lìŋgàna Lohwɛ̀, ndi è hwèlì ndi nanù ema à mà jò lìŋgàna rzìi à jò òmeya è Ŋmanà wà eni wà Mùnyanà nàa jàhwèyà ò lì jò kɔ̀tɔ̀ ò nyòla wòhwe ema irzɔ ì mà gbèèyɛ̀.

¹¹Imbùnda jà ami kòkò, kànàtɛ Lohwɛ̀ à jò lìŋgàni rzayi-rzayi, irzɔhvɛ jà àŋgàmɛ̀nɛ̀yi lì alìŋgànɛ mɔ̀kɔ nà ɔ̀nɛyi.

¹²Tɔ̀ mòtò à rzi ɛni à ɛnɛ Lohwɛ̀, ndi jà alìŋgànɛ tɛ mɔ̀kɔ nà ɔ̀nɛyi, eŋge ŋgànà e hwèlì ndi nanù ema Lohwɛ̀ a hwèlì o ìtììtènì ja arzu ndèŋgàna e ndìŋgɛ ya eni e o ondìrzɛ̀hwɛ̀ o ìtììtènì ja arzu.

¹³Èŋge eyà ndi è gbeyà irzɔ ì hwiya nanù ema ì hwèlì nà Lohwɛ̀ ndèŋgànɛ̀lɛ̀ Lohwɛ̀ hvɛ à hwèlì nà irzɔ, ehwànja mɔ̀ à jò ŋgbelì Èlìŋgɛ̀ yà eni.

¹⁴Ndèŋgànɛ̀lɛ̀ irzɔ ì mà ɛnɛ nà lì ohweyà hwahvɛhvɛ hwatò nanù ema Tatɛ̀ à mà oma è Ŋmanà wà eni ò lì hwɛ è Mòrzùŋgèlì hwa è rze.

¹⁵Tɔ̀ njɛnɛ ema à ohwi nanù ema Yerzù ndi à hwèlì è Ŋmanà wà ama Lohwɛ̀, Lohwɛ̀ à hwèlì nà mɔ̀ ndèŋgàna mɔ̀ hvɛ à hwèlì nà Lohwɛ̀.

¹⁶Ò èŋgànɛ̀lɛ̀ rzɔ irzɔ ì hwi nà lì lòkɛ̀ ò è ndìŋgɛ ema Lohwɛ̀ à jò hwɛ̀nèlì. Tɔ̀ mamɛ ema Lohwɛ̀ à gbeyà è uŋmɛ̀lɛ̀ è ndìŋgɛ ema mɔ̀ à hwɛ̀nèlì hwatò, ndèŋgànɛ̀lɛ̀ hwatò ema è ndìŋgɛ è hwèlì ò tenì yà awu hwa hwèlì nà Lohwɛ̀, Lohwɛ̀ mɔ̀ hvɛ à hwèlì nà wɔ̀.

¹⁷È ndìŋgɛ ema è hwèlì ò tenì yà arzu è òndìrzɛ̀hwɛ̀yi nyayi ema mèèmà mè arzu mè eta ò wùnyà wò hwèkàyìrzèlì. È ò ondìrzɛ̀hwɛ̀ nyàyi ema mèèmà mè arzu mè eta ò tenì ò wùnyà wò hwèkàyìrzèlì, ehwànja anu rze ì hwèlì ndi mòtò nà Lohwɛ̀ nyayi hvɔ̀kɔ nà oma Krirztò hvɛ à mà hwɛ nà mɔ̀.

¹⁸È mòtò ema Lohwɛ̀ à lìŋgàni oŋgo mòtò à rza ohvi tɔ̀ wɔ̀ŋgɔ̀ ò tenì ya eni. Ndi è ndìŋgɛ ema è òndìrzɛ̀hwɛ̀yi è hvàya wɔ̀ɔ̀ŋgɔ̀ wò arzɛ. Lì òokà là wɔ̀ŋgɔ̀ wò lì kɔ̀kìrzɛ̀hwɛ̀ lɔ̀ ndi lì jànà wɔ̀ɔ̀ŋgɔ̀, ò eŋgànɛ̀lɛ̀ rzɔ tɔ̀ ima mòtò ema à ohvi wɔ̀ŋgɔ̀ ò tenì yà eni eŋge ŋgànà è hwèlì ndi nanù ema è ndìŋgɛ è rza ondìrzɛ̀hwɛ̀ ò tenì yà eni.

¹⁹Irzɔ jò uŋmɛ̀lɛ̀ hwatò è ndìŋgɛ, ehwànja Lohwɛ̀ à mà lòma lì jò uŋmɛ̀lɛ̀ è ndìŋgɛ yà eni.

²⁰Mòtò à ohwi tɛ nanù ema à lìŋgàni Lohwɛ̀ rzìi à rzìŋgɛ̀ ŋmanyàŋgò wà eni wà ama Krirztò, nanù ò mà à kɔ̀ɔ hweyà. Èhwànja tɔ̀ njɛnɛ ema à rza lìŋgànɛ ŋmanyàŋgò wà eni wà ama Krirztò ema mɔ̀ à ɛnɛ, à rza tànɛ lì lìŋgàna Lohwɛ̀ ema mɔ̀ à rza ɛnɛ.

²¹Ò eŋgànɛ̀lɛ̀ è mbenda yà ene ema e ŋgbàahwì tɔ̀ njɛnɛ ema à lìŋgàni Lohwɛ̀, à aŋgàmɛ̀nɛ̀yi hvɛ lì lìŋgàna ŋmanyàŋgò wà eni.