Read Mokpwe 1 Yòwanìrzɛ̀ 5 Bible Online

1 Yòwanìrzɛ̀ 5 - Mokpwe bible

1 Yòwanìrzɛ̀ 5

¹Tɔ̀ ima mòtò ema à lòkɛ̀ nanù ema Yerzù mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi à hwèlì ndi nàa è ŋmanà wà ama Lohwɛ̀, ndèŋgàna tɔ̀ njɛnɛ ema à lìŋgàni Tatɛ̀ nanù oma à lìŋgàni hvɛ è Ŋmanà wà eni.

²Nànù ndi ì hwiya ema ì lìŋgàni hwàanà hwa ama Lohwɛ̀, è hwèlì ndi ò lì lìŋgàna Lohwɛ̀ nà lì ika hvɛ imbenda jà eni.

³Ì lìŋgàni tɛ Lohwɛ̀ nà è jɔ̀kɛ̀, nanù oma irzɔ ì hwɛni lì ika imbenda jà eni. Ndèŋgana imbenda jà eni ì rza ambi ò lì ika.

⁴Èhwanja tɔ̀ njɛnɛ ema à hwèlì è ŋmanà wà ama Lohwɛ̀ à mà màa lì rzuwànà è rze. Lìtiŋga ema mɔ̀ à mà màà lì rzuwànà è rze lì hwèlì ndi nanù ema, irzɔ ì lòkɛ̀ nanù ema Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi nà Lohwɛ̀.

⁵Ò rza enje tɔ̀ mòtò ema à mà rzuwànɛ̀ è rze lì aka tɛ è mòtò ema à lòkɛ̀ nanù ema Yerzù ndì à hwèlì è Ŋmanà wà ama Lohwɛ̀.

⁶Yerzù Krirztò à mà jà ò rze. Hwa mà mò lùhwìrzɛ̀ nà malìhwa, ndi ò mburza hweŋweelì hwe eni ò mbàrza, rzi màyija mà eni mà kòmeyà ò rze. Rzeketɛ lì lùhwìrzɛ̀ là màlìhwa mɛnɛ ndi lì mà mò gbèyɛ̀nɛ̀, ndi è hvonda ema à mà ŋwe màyija mà eni ma mà kòmeyà ò rze. Èlìŋgɛ̀ yà Wòtani yɔ̀ ndi è jò uŋmɛ̀lɛ̀ nanù ema ene eyà è hwèlì ndi è jɔ̀kɛ̀, ehwànja Èlìŋgɛ̀ yà Wòtani è rza kɔ̀ɔ̀ hweyà.

⁷Ò hwèlì ŋgànà iyàwò ò lì hwiya e jɔ̀kɛ̀ ya ama Yerzù.

⁸I hwi e jɔ̀kɛ̀ lì hvomɛ̀nɛ̀ Yerzù ehwànja Èlìŋgɛ̀ e ma jo òhweyà, hwa mà mo lùhwìrzɛ̀ na malìhwa, ndèŋgànɛ̀lɛ̀ màyija ma eni ma mà komeya o rze na oma à mà ŋwe. Ini ŋgànà jàayɛ̀ i jo uŋmɛ̀lɛ̀ nanù ema Yerzù a hwèlì ndi è Ŋmanà wà ama Lohwɛ̀.

⁹Nà oma irzɔ i lòkɛ̀ hweyà ema hwatò hwa ohwa, tɔ̀ mamɛ ema Lohwɛ̀ a jo òhweyà e hwèlì wòlìto lì aka mamɛ hwatò hwa jo òhweyà. Ène eyà e hwèlì ndi nanù ehwànja Lohwɛ̀ mɔ̀ ŋmitɛ-ŋmitɛ ndi à jo òhweyà lì hvomɛ̀nɛ̀ è Ŋmanà wà eni.

¹⁰Tɔ̀ ima mòtò ema a lòkɛ̀ è Ŋmanà wà ama Lohwɛ̀, eŋge ŋgànà e hwèlì ndi nanù ema a hwi nanù ema hwene hweyà hwe arzɛ hwe hwèlì ndi e jɔ̀kɛ̀. Ndi tɔ̀ ima mòtò ema a rza lòkɛ̀ Lohwɛ̀ e gbèyi ndi nàa mɔ̀ à ohwa ndi nanù ema Lohwɛ̀ a hwèlì mòlàŋga, ehwànja mɔ̀ à rza lòkɛ̀ hweyà ema Lohwɛ̀ a ohwa o lì hvomɛ̀nɛ̀ è Ŋmanà wà eni.

¹¹Èya ema Lohwɛ̀ a jo òhwèlì e hwèlì ndi nanù ema; Mɔ̀ à mà jo gbeyà o lì luwa lòŋgɛ la gbìndèyà. Lini lòŋgɛ lì hwèlì ndi lòŋgɛ ema è Ŋmanà wà eni a ŋgbelì.

¹²Tɔ̀ ima mòtò ema ahvìyànɛ̀lɛ̀yi na è Ŋmanà wà ama Lohwɛ̀, à mà luwa lìŋgi lòŋgɛ, ndèŋgànɛ̀lɛ̀ tɔ̀ njɛnɛ hvɛ ema a rza enje o lì ahvìyànɛ̀ na è Ŋmanà wà ama Lohwɛ̀, a rza o luwa lìŋgi lòŋgɛ.

¹³Nà e tìleya ndi inyɔ ema e lòkɛ̀ lìinà la ama è Ŋmanà wà ama Lohwɛ̀ hwene hweyà, aŋga nanù oma e ma hwiya ema e ohvi lòŋgɛ la gbìndèyà.

¹⁴I ma rzekeya mèèmà me arzu nanù ema tɔ̀ mamɛ ema ja akowani Lohwɛ̀ ema e hwèlì o lì emeyà là eni, mɔ̀ à jo hweyàna.

¹⁵Kànàtɛ irzɔ i hwi nanù ema a jo hweyàna o tɔ̀ mamɛ ema i mo akòhwàni, i hwi nanù ema i luwa mamɛ ema i mo akòwànì.

¹⁶Tɔ̀ ima mòtò ema a ɛni ŋmanyàŋgò wa eni a undi o wòhwe ema wo rza mo lìyɛlɛ o kpelì, mɔ̀ à mo kànɛ̀lɛlɛ aŋga nanù Lohwɛ̀ a mo ŋgba lòŋgɛ. Hwàto ema na ohwa nanù ema inyɔ e kànɛlɛlɛ, hwa hwèlì ndi hwatò ema wòhwe wo awu wo rza oŋwa èlìŋgɛ̀ ya awu. O hwèlì wòhwe ema wo òŋwa èlìŋgɛ̀. È hwèlì tɛ nanù ema mòtò a undi tɛ o tenì ya woŋgo wòhwe, na rza ohwa nanù ema e kànɛlɛlɛ oŋgo mòtò.

¹⁷Màtonà mà arzɛ ma hwèlì ndi wòhwe ndi o hwèlì wòhwe ema wo rza oŋwa èlìŋgɛ̀.

¹⁸Ì hwi nanù ema tɔ̀ ima mòtò ema à mà jɛ̀ɛ̀ è ŋmanà wà ama Lohwɛ̀ à rza tànɛ lì eleyà ò wòhwe. Oŋgo ema à mà jɛ̀ɛ̀ è ŋmanà wà ama Lohwɛ̀, Yerzù à mò kombɛ̀ komba-komba aŋga nanù è Mɔ̀ wà Wòhwe à rza mò gbeyà tɔ̀ eyà yà wòhwe.

¹⁹Ì hwi nanù ema irzɔ ì hwèlì ndi hwàanà hwa ama Lohwɛ̀, tɔ̀ nɛ ì hwi nanù ema è Mɔ̀ wà Wòhwe ndi à kànèyà hwatò ò rze ema hwa rza hwiyɛ Lohwɛ̀.

²⁰Ì hwi nanù ema è Ŋmanà wà ama Lohwɛ̀ à mà jà ò rze yà mɔ̀nyɛ̀, ndèŋgànɛ̀lɛ̀ à mà jò gbeyà ò lì hwiya Lòohwà là jɔ̀kɛ̀. Ndeŋgana irzɔ ì hwèlì ndi ò lì ahvìyànɛ̀ nà mɔ̀, nà oma jà ahvìyànɛ̀ nà è Ŋmanà wà eni Yerzù Krirztò. Mɔ̀ ndi à hwèlì Lohwà là jɔ̀kɛ̀ ndèŋgànɛlɛ mɔ̀ ndi à hwèlì è mɔ̀ ema à ŋgba lòŋgɛ là gbìndèyà.

²¹Ò eŋgànɛ̀lɛ rzɔ hwàànà hwa ami kòkò, è rza ohva tɔ̀ eyà ò lì gbeyànà mòohwà mà mòlàŋga.