Read Mokpwe 3 Yòwanìrzɛ̀ 1 Bible Online

3 Yòwanìrzɛ̀ 1 - Mokpwe bible

3 Yòwanìrzɛ̀ 1

¹Imba e mòtìmbèlì wa ŋmèmba, imba ndi na o tìleya o wa Gàyiyùrzì ene kààti. Nà o lìŋgàni na e jɔ̀kɛ̀.

²È mbunda ya ami kòkò, na kànɛ nanù ema, hweyà hwe arzɛ ema o gbeyà, hwe hwɛ gbamù na o wa, ndèŋgànɛ̀lɛ̀ hvɛ ema o hwɛ o lì lìya la gbamù la nyo, ŋgàna hvɔ̀kɔ hvɛ mɛnɛ na oma èlìŋgɛ̀ ya aŋgɔ e hwèlì gbamù.

³Nà ma oka mɔ̀nyɛ̀ŋgì rzayì-rzayì lìrzako ema lòŋgo la hwàlòkèlì hwa ama Krirztò hwà mà jèe anu rzìi hwa jo òhweyà nanù ema o hwèlì lì gbeyà na e jɔ̀kɛ̀ mamɛ ema Lohwɛ̀ a arza nanù ema o gbeye nyayi hvɔ̀kɔ na oma o yɔ̀ki lì gbeyà o jɔ̀kɛ̀ mamɛ Lohwɛ̀ a arza nanù ema o gbeye.

⁴O rza enje tɔ̀ eyà ema e no òkirzɛ mɔ̀nyɛ̀ŋgì lì aka tɛ ema imba na hweyà nanù ema hwàànà hwa ami hwa lìya o jɔ̀kɛ̀ na oma Lohwɛ̀ a arza nanù ema hwa lìye.

⁵Ìi mbunda ya ami kòkò, o gbèyè hweyà na ŋmèma mɔ̀kɔ o lì oŋgowàna wònyànyàŋgo hwa arzu hwa ama Krirztò tɔ̀ nɛ o rzi hwiyɛ lòŋgo.

⁶Wɔ̀ hwa hwèlì lì ohweyà ŋmèmba ema mo hwèlì anu lì hvomɛ̀nɛ̀ e ndìŋgɛ ema o hwa hwɛnelì. Nà arza nanù ema o òŋgòwane hwanu hwatò e hwèlì tɛ ema hwaa e hwɛmi tɛ lì ɛ̀ndɛ ehvɛhvɛ èki. O gbeye nanù ehwànja nanù ndi Lohwɛ̀ a arza nanù ema o gbeye.

⁷Hwanu hwatò hwà mà hwɛ lì ɛndɛ hweki nà hweki, o lì gbèeyà Yerzù Krirztò, ndèŋgànɛlɛ hwa rzi emeyà tɔ̀ lìwòŋgo ò màà mà hwatò ema hwa rzi lòkɛ̀ Krirztò.

⁸Irzɔ ema i hwèlì hwàlòkèlì hwa ama Krirztò rzɔ, i hwɛnì lì òŋgòwàna hwanu hwatò, aŋga nanù oma irzɔ i ma hwa lata o èwòlò ya awu ya lì ohweyà hwatò ŋmɛ̀ndì mo jɔ̀kɛ̀.

⁹Nà ma tìleya ŋmèmba ema mo hwèlì o mbowà ndɛnɛ ya aŋgɔ̀ kààti, ndi Dìyòtrɛ̀hvɛ̀rzì a rzi emeyà lì gbeyà mamɛ nà mà tile ehwànja à mà arza lì hwɛ e mòtìmbèlì wa ŋmèmba.

¹⁰O eŋgànɛlɛ rzɔ, na jelì tɛ aŋga, na ohweyà hwatò hwa ŋmèmba mamɛ ya arzɛ ema mɔ̀ à gbeyà. Hweya ema mɔ̀ à gbeyà hwe hwèlì ndi, hwèyòhwèlì hwe mòlàŋgà mo èèti o lì jo hvomɛ̀nɛ̀, ndèŋgànɛlɛ hvɛ mɔ̀ à rza kàrzɛ wònyànyàŋgo hwa arzu hwa ama Krirztò, ndèŋgànɛlɛ hvɛ mɔ̀ à kekà hwà hvɛhvɛ hwatò ò lì hwa kàrzɛ. Ndeŋgànɛ̀lɛ̀ mɔ̀ à hwa hvaya o ŋmèmba.

¹¹È mbunda ya ami kòkò, o rza embàneyà wòhwe ema hwatò hwa gbeyà, ndi o embàneyà hweyà hwe gbamù ema hwatò hwa gbeyà. Tɔ̀ njɛnɛ ema a gbèyi gbamù e uŋmɛ̀lɛ̀ ndi nanù ema a hwèlì ndi e ŋmanà wa ama Lohwɛ̀. Tɔ̀ njɛnɛ hvɛ ema a gbeyà wòhwe, wòhwe wo eni wo uŋmɛ̀lɛ̀ ndi nanù ema mɔ̀ à rza hwi Lohwɛ̀.

¹²Tɔ̀ ima mòtò a ohwa nanù ema Dɛ̀mɛ̀trìyùrzì a hwèlì ndi mòtò wa gbamù. Lòŋgɛ la jɔ̀kɛ̀ ema mɔ̀ à lìya lì uŋmɛ̀lɛ̀ nanù ema a hwèlì ndi mòtò wa jɔ̀kɛ̀. Nà e ohweyà hvɛ nanù ema, mɔ̀ à hwèlì ndi mòtò wa gbamù, ndèŋgànɛlɛ e hwi nanù ema tɔ̀ mamɛ ema no òhwa e hwèlì ndi e jɔ̀kɛ̀.

¹³Nà hwɛnì rzayi-rzayi ò lì è ohweyà. Ndi nà rza arza lì gbeyà nanù ò lì hwe tìla ò kààti.

¹⁴Nà àhvìtɛ̀ ò lì è ɛnɛ ŋmanà mbɔ̀ aŋga nanù jò ò à ɛ̀nɛ̀nɛ̀ worzo nà worzo rzi ì kòowà.

¹⁵Ɛ̀yɔ̀lɛ̀ è hwɛ nà ò wà. Imbùnda jà anyu jà arzɛ anu, hwa è òmèlì ikɔ̀mì. Ò kɔ̀mè imbùnda jà ami jà arzɛ mɔ̀kɔ nà ɔ̀nɛyi ema ì hwèlì nà inyɔ aŋga.