Read Mokpwe Hwèwulùwèlì 10 Bible Online

Hwèwulùwèlì 10 - Mokpwe bible

Hwèwulùwèlì 10

¹Nà mà ɛnɛ èhvɛhvɛ aŋgèlì yà màyìmbì è uwɛ̀lɛ̀lɛ̀yi ò ŋmanyu yà lohwà, è rzihwa ò rze. È mà tòŋgahwa nà lìmbaki, è ŋguhwèlì hvɛ è mà hwɛ ò mòhvo mò eni. Worzo wò eni wò mà hvàyeyà hvɛ ndi nàa igbèyi, ndeŋgànɛlɛ mèèndè mà eni mè mà hwɛ ndi nàa lìhwondi ema lì oŋwa mùnya.

²À mà ohva ŋmanà kààti ema è lìŋgɛ̀lɛ̀hwɛ̀, ema è mà wulùwàhwà. À mà tɛ̀yirzɛ lìtaŋga là eni là mòme ò ŋmànja, rzìi à tɛ̀yirzɛ hvɛ lìtaŋga là ŋmàlì ò ŋmìndi.

³Rzìi à tɛɛ nà lìlo ema lì kàrzàmi nàa njilà ndi è rziŋga. Ò mburzà hwètɛ̀ɛ̀lì hwe eni, màlo mà lìrzamba là ŋgalà lohwà ma mà rzìŋga.

⁴Nà oma lìrzamba là ŋgalà yà lohwà lì mà rzìŋge, nà mà arza lì wòteyà lì tìla hweyà ema lì mà ohwe. Ndi nà mà hweyà lìlo lì mà uwɛ̀lɛ̀lɛ̀yi ò ŋmanyu yà lohwà lì ohwa nanù ema, “È utè hweyà ema lìrzamba là ŋgalà lohwa lì mà ohwɛ, hwe àŋgàmɛ̀nɛ̀yi ndi lì hwɛ wùndɛ̀, ndèŋgànɛlɛ o rzi hwe tìla o rze.”

⁵Rzìi e aŋgèlì ema na ɛneyayi ema e ma tɛ̀yìrzɛ̀ lìtaŋga la eni lɔ̀kɔ o ŋmànja na lìnɛyi hvɛ o ŋmìndi, a kàrzɛ lìya la eni la momɛ̀ o ŋmanyu,

⁶rzìi aàtɛ o lìna la ama Lohwɛ̀ ema a hwèlì lòŋgɛ natɛ̀ɛ na o gbìndèyà. Mɔ̀ ndi à hwèlì e mɔ̀ ema a weki e ŋmanyu yà lohwà, e rze ya mɔ̀nyɛ̀, ŋmàànja na hwèèmà hwe arzɛ ema hwe hwèlì o tenì. Ène aŋgèlì e ma ohwa nanù ema, “O rza hwɛ hvɛ tɔ̀ lì hvaŋga la hvonda hvɛ.

⁷Ndi o mèenyà ema e aŋgèlì ema e ùkirzɛ̀ lìrzamba e o tòŋga lìyɔ̀mi la eni, Lohwɛ̀ a o gbeyà eyà ema mɔ̀ à mà kàkɛ̀nɛ̀ nanù ema a o gbeyà o wùndɛ̀. A e gbeyà na oma mɔ̀ à mà ohweyà hwàgbèèlì hwa eni hwà-òhwèlì hwa hwèlìŋgɛ̀.”

⁸Rzìi lìŋgi lìlo ema lì ma uwɛ̀lɛ̀lɛ̀yi o ŋmanyu yà lohwà ema nà mà hweye, lì no òhwìrzɛ̀nɛ̀ hvɛ nanù ema, “Ɛndɛ, o wowe e kààti ema e lìŋgɛ̀lɛ̀hwɛ ema e wulùwahwi, o lìya la ama e aŋgèlì ema e tɛ̀yìrzɛ̀ lìtaŋga la eni lɔ̀kɔ o ŋmànja na lìnɛyi hvɛ o ŋmìndi.”

⁹O eŋgànɛlɛ rzɔ, nà mà ɛ̀ndɛ o ma èŋge aŋgèlì rzìi na e ohweyà nanù ema e no ŋgbe e ŋmanà kààti ema e lìŋgɛ̀lɛ̀hwɛyi. È aŋgèlì rzìi e no ohweyà nanù ema, “Ò è wowe, o lee. È o kàkìrzɛ luŋga, ndi o wàna ya aŋgɔ e o tɛɛ ndi lɛŋgulɛŋgu nàa wòo.”

¹⁰Nà ma wòwa oŋgo ŋmanà kààti ema e lìŋgɛ̀lɛ̀hwɛ o lìya la ama e aŋgèlì rzìi na e làa. È ma tɛɛ ndi lɛŋgulɛŋgu o wàna ya ami nàa wòo. Ndi imba nà mà e ŋmɛɛ, e kàkìrzɛ luŋga la ami.

¹¹Rzìi nà ohwahwɛlɛ hvɛ nanù ema, “O aŋgàmɛnɛyi lì ohwa lì hvomɛ̀nɛ̀ hweyà ema hwe o gbèyɛ̀nɛ o rzayi-rzayi ja hwèkòmè, nyayi na nyayi ja hwatò, nyayi na nyayi ja mbɔrzi na rzayi-rzayi ja kiŋgɛ̀.”