Read Mokpwe Hwèwulùwèlì 12 Bible Online

Hwèwulùwèlì 12 - Mokpwe bible

Hwèwulùwèlì 12

¹Èmbànelì ndɛnɛ ya mànyàkà e ma wurza o ŋmanyu yà lohwà. Nà ma ɛnɛ mòlana ema a wɔ̀tìrzɛhwɛyi ndi igbe. Ŋmɛ̀ɛlì mɔ̀hvɛ mo ma hwɛ ndi o rze ya màtaŋgà mà eni. O ma hwɛ ekooto ema e ma hwɛnɛ lìyome la rzombe na ihwakɛ o mohvo mo eni.

²Oŋgo mòlana à mà lìta lemi, rzìi a kombɛnɛ e hvonda ya lìyàlì. Morziyo na mo tàkà mo lìyàlì ema à mà hweye mo ma mo gbeyà a bama luwa.

³Èhvɛhvɛ embànelì ya mànyàkà e ma wurza o ŋmanyu yà lohwà. Aŋga ndi e dragɔ̀ni ya a wurza jègba. È ma olowa rzayi-rzayi ndèŋgànɛ̀lɛ̀ e ma teya. È ma hwɛnɛ lìrzamba la mèyòhvò na lìyome la merzehwa. Tɔ̀ ima mohvo ma mà wɔ̀tɔ̀ ekooto.

⁴A ma lùùtà lòŋgò lɔ̀kɔ la moŋgo màyàwo la irzombe ema i ma kɛ̀ɛ̀mɛ o ŋmanyu ya lìwòhwɛ la ŋmanyu na moondo mo eni, a ji undirzɛ o rze ya mɔ̀nyɛ̀. Èŋge dragɔ̀ni e ma tɛ̀mɛ̀ o worzo wo ama oŋgo molàna ema à mà arza lì ŋyàa, àŋga nanù a ŋyàa tɛ a mo laana e ŋmanà wa eni.

⁵Oŋgo molàna à mà ŋyàa ŋmanà wa munyanà, ŋmanà wa munyanà ema mɔ̀ ndi à o kànèyà hwèkòmè hwe arzɛ hwa e rze ya mɔ̀nyɛ̀, na màa ema mà eti. È ŋmanà wa ama oŋgo molàna à mà hvùmahwa, rzìi hwa mo ɛ̀ndɛ̀nɛ̀ o èki ema Lohwɛ̀ a hwèlì ema e konda ya lìkànèyà ya ama Lohwɛ̀ e hwèlì.

⁶Oŋgo mòlana à mà hvàwuma a ɛndɛ o mòrzanjɛ̀ o èki ema Lohwɛ̀ à mà mo rzèkeya, èki ema a o woŋgòhwàhwɛ o ikolì jɔ̀kɔ hwègbe hwe hwàkɛ meni mòtohwa me mèenyà.

⁷Rzìi o hwɛ njuma o ŋmanyu yà lohwà. Màyìkɛ̀lì na i aŋgèlì ja eni hwà mà wòteya lì anana eŋge dragɔ̀ni. Èŋge dragɔ̀ni na i aŋgèlì ja eni wɔ̀ hvɛ hwa wòteyà lì hwa anana.

⁸Ndi Màyìkɛ̀lì na i aŋgèlì ja eni hwà mà rzùùwana eŋge dragɔ̀ni na i aŋgèlì ja eni. O eŋgànɛlɛ rzɔ, e dragɔ̀ni na i aŋgèlì ja eni hwa rzi hwɛnɛ hvɛ tɔ̀ èki o ŋmanyu yà lohwà.

⁹Aŋga ndi hwa a hvimba eŋge dragɔ̀ni ndɛnɛ o rze ya mɔ̀nyɛ̀. Èŋge dragɔ̀ni e ma hwɛ ndi nàa gbàahwà wo e hvonda ya kòwàa ema wo ma hwɛ̀lɛ̀hwɛ̀ Dɛhvùlì tɔ̀ Mòkarzɛ̀, ema a eŋgìrzɛ̀ e rze ya mɔ̀nyɛ̀ ya arzɛ. Ndeŋgànɛ̀lɛ̀ hwà mà hvimba iŋgi aŋgèlì ja eni ja arzɛ na mɔ̀ o e rze ya mɔ̀nyɛ̀.

¹⁰Àŋga ndi na a hweyà lìlo lì kàrzàmi o ŋmanyu yà lohwà lì ohwa nanù ema, “O naŋgɛ, lìrzùŋgàhwa la ama Lohwɛ̀ lì ma jà. Lohwɛ̀ à mà ùŋmɛlɛ màyìmbì ma eni o lì kànèyà nàa kìŋgɛ. È Krirztò ya eni e ma àwùŋmɛlɛ màyìmbì ma eni nàŋgɛ. Èhwànja e mɔ̀ ema à mà hwɛ lì ohwa o worzo wo ama Lohwɛ̀ ŋmerze na wuu, nanù ema wònyànyàŋgo hwa arzu hwa gbeyà wòhwe, hwà mà mo hvimba o e rze ya mɔ̀nyɛ̀. A ma hwɛ lì hwa hwɛ̀lɛ ŋmerze na wuu o ŋgundu o worzo wo ama Lohwɛ̀.

¹¹Màyìja ma ama e Ŋguma ya Mɔ̀lɛ̀ŋgù na imboŋgi ja jɔ̀kɛ̀ ema hwà mà tɛ̀mɛ̀, i ma gbeyà hwà mà rzùùwanà Mòkarzɛ̀. Wɔ hwà mà emeyà tɔ̀ e kpelì o lì ohwa tɔ̀ eyà ya ama Lohwɛ̀ ehwànja ŋmɛ̀ndì ema hwà mà hwɛ lì ohwa mo ma hwɛ ndi e jɔ̀kɛ̀.

¹²O èŋgànɛ̀lɛ̀ rzɔ, e ŋmanyu yà lohwà na hwaŋga hwatò hwa arzɛ ema hwa hwèlì aŋga hwa àŋgàmɛ̀nɛ̀yi lì oka mɔ̀nyɛ̀ŋgì. Ndi èwòmɛ̀ na hwatò ema hwa hwèlì o e rze ya mɔ̀nyɛ̀, na o ŋmànja, ehwànja e Dɛhvùlì à mà e rzihweyà na hwetato hwe ndɛnɛ, ehwànja a hwi nanù ema e hvonda ya eni e ma utuhwa.”

¹³Nà oma e dragɔ̀ni e ma ɛnɛ nanù ema, e ma hvimbahwa o rze ya mɔ̀nyɛ̀, e wòteyà lì oŋgama oŋgo mòlana ema à mà ŋyàa oŋgo ŋmanà wa munyanà.

¹⁴Oŋgo molàna à mà ŋgbààhwà mahvahve mahwakɛ ma mbela ndɛnɛ, o lì mo oŋgowàna o lì koohwa lì ɛndɛ o èki ema e ma mo rzekahwɛlɛ o mòrzànjɛ, èki ema gbàahwà wo rza uka, èki ema mɔ̀ à o luwɛ lìhwoŋgo meya meyawo na ehvàrzu, èki ema e dragɔ̀ni e rza o mo tàkìrzɛ̀.

¹⁵Rzìi woŋgo gbàahwà wo rzɔ̀yeya oŋgo mòlana hweyɔlì. Èŋge eyɔ̀lì e ma rzoowa ndi nàa morzo mondɛnɛ, o lì indirzɛ oŋgo molàna.

¹⁶Ndi mɔ̀nyɛ̀ mo ma oŋgòwànà oŋgo molàna rzìi mo mɛɛ moŋgo morzo ema mo ma uwɛ̀lɛ̀lɛ̀yi o wàna ya e dragɔ̀ni.

¹⁷Rzìi eŋge dragɔ̀ni e tàtànà oŋgo molàna, rzìi e ɛndɛ o lì anana enɛyi nyɔ̀ŋgɔ̀ni ya ama oŋgo molàna, na hwatò hwa arzɛ ema hwa gbeyà na oma Lohwɛ̀ a àrzeyà, ndèŋgànɛ̀lɛ̀ hwaŋga ema hwa tɛmeya Yerzù e mboŋgi.

¹⁸Èŋge dragɔ̀ni rzìi e tɛ̀mɛ̀ o rzàawà ya ŋmànja.