Read Mokpwe Hwèwulùwèlì 13 Bible Online

Hwèwulùwèlì 13 - Mokpwe bible

Hwèwulùwèlì 13

¹Rzìi na ɛnɛ èembe e wurza o tenì ya ŋmàànja. Èŋge èembe e ma hwɛnɛ lìrzàmba la mèyòhvò na lìyomɛ̀ la mèrzehwa, na lìyomɛ la hwèkòòtò o merzehwà mà eni. Tɔ̀ ima mòohvo mo mà ohva lìnà ema lì hwɛnyɛ Lohwɛ̀.

²Èŋge èembe ema nà mà ɛnɛ̀ e ma àyɛkɛ̀nɛ ndi ikɔ̀ ja njɔ̀ɔ, ndi màtaŋgà mà eni ma mà àyɛkɛ̀nɛ matàŋgà mà mòòŋgì, ndèŋgànɛlɛ e wàna ya eni hvɛ e ma àyɛkɛ̀nɛ e wàna ya njila. È dragɔ̀ni e ma ŋgbàà eŋge èembe e konda na e wònja ya eni ya lìkànèyà.

³Mòòhvò mɔ̀kɔ mo èŋge èembe mo ma ɛneya ndi o a ɛnɛ oma mo ma hwènìrzɛ̀hwɛ̀ ŋginyà, ndi èhwènà ndɛnɛ e ma hwɛ e ma wɔ̀wɔ̀. Hwàto hwa e rze ya mɔ̀nyɛ̀ ya arzɛ hwà mà tàmà rzìi hwa wòteya lì oŋgama èŋge èembe.

⁴Hwàto hwà mà hwɛ lì kanɛ̀ eŋge dragɔ̀ni ehwànja e ma ŋgbà èŋge èembe wònjà. Hwà mà hwɛ lì kanɛ̀ hvɛ eŋge èembe, rzìi hwa a ohwa nanù ema, “Njɛnɛ a hwèlì nàa ene èembe e? Njɛnɛ a tànɛyi lì mo teŋgɛ̀nɛ̀ e njuma e?”

⁵Èŋge èembe e ma ŋgbààhwà wònjà o lì ohwa hweyà hwe kumba na ìrzìlako o lì teŋgɛ̀nɛ̀ Lohwɛ̀. È ma ŋgbààhwà ehvolo o lì gbeyàna è wònjà ya eni o tenì ya mènìmenì me ŋgbɛ̀ndɛ na ihwàkɛ.

⁶Èŋge èembe e ma lìhvowa e wàna ya eni rzìi e wòteyà lì hwɛnyɛ Lohwɛ̀. È ma hwɛnyɛ lìinà la ama Lohwɛ̀, e ma hwɛnyɛ èki ema Lohwɛ̀ a lìya, ndèŋgànɛ̀lɛ̀ e ma hwɛnyɛ hwatò hwa arzɛ ema hwa hwèlì ò ŋmanyu yà lohwà.

⁷Lohwɛ̀ è mà ŋgba eŋge èembe è wònjà o lì anana hwatò hwa eni nà ò lì hwa rzùùwanà. À mà ŋgbààhwà wònjà ò lì kànèyà màtumba nà màtumba, hwèkòmè nà hwèkòmè, tɔ̀ ima imbɔrzi nà ì nyàyi nà nyàyi jà hwatò.

⁸Hwatò hwa arzɛ hwa è rze yà mɔ̀nyɛ̀ hwa ò kanɛ̀ eŋge èembe. Hwàto ema hwa rza ò è kanɛ̀, hwa hwèlì ndi hwaŋga hwatò ema mìinà mà awu mà tìlahwe ò tenì yà è kààtì yà lòŋgɛ ndèŋgànà Lohwɛ̀ à è wèka è rze yà mɔ̀nyɛ̀. È Ŋguma yà Mɔ̀lɛ̀ŋgù ema hwa mà oŋwe, mɔ̀ ndi à hwɛni ene kààtì.

⁹È mòtò ema à hwɛ̀ni matò inyɛ à hwèyè.

¹⁰È hwèlì tɛ nanù ema mòtò à hwɛni lì ɛ̀ndɛ̀ ò hwèwòwà inyɛ à ɛ̀ndɛ̀ ò hwèwòwà, è hwèlì tɛ nanù ema mòtò à ò oŋwàhwà ndi nà è rzɔ̀lɔ̀ à ò oŋwàhwà ndi nà è rzɔ̀lɔ̀. Ène eyà è hwèlì ndi nanù ema, hwatò hwa ama Lohwɛ̀ hwa àŋgàmɛ̀nɛ̀yi lì ajùlɛ nà lì alɛ̀mbɛ̀nɛ̀ eyà yà Lohwà.

¹¹Nà mà ɛnɛ èhvɛhvɛ èembe, ema è mà wurza ò rze yà mɔ̀nyɛ̀. È mà ohva mèrzehwa mèhwàkɛ̀ nàa ŋmɛ̀ŋgɛ mò è Ŋguma yà Mɔ̀lɛ̀ŋgù, ndi è mà ohwa ndi nàa è dragɔ̀ni.

¹²È mà gbeyàna è wònja yà arzɛ yà è èembe yà worzò, ndèŋgànɛ̀lɛ̀ à mà gbeyà ndi nanù ò worzo wò eni. È mà aka nanù ema è rze yà mɔ̀nyɛ̀ yà arzɛ nà hwatò hwa arzɛ ema hwa hwèlì ò rze yà mɔ̀nyɛ̀, hwa kanɛ̀ eŋge èembe yà worzò. Èŋge èembe yà worzo è mà hwɛ ndi èembe ema è mà ohva èhwènà ndɛnɛ ndi eŋge èhwènà è mà wɔ̀hweyà.

¹³Ène èembe ema è ùkirzɛ̀ hwehwàkɛ, è mà gbeyà mànyaka màndɛ̀nɛ̀. Ò worzo wò hwatò hwa arzɛ, è mà gbeyà mùnya mò uwɛ̀lɛ̀lɛ̀yì ò ŋmanyu yà lohwà mò undèya è rze yà mɔ̀nyɛ̀.

¹⁴Ò nyòla yà hweyà hwe mànyaka ema à mà ŋgbààhwe è wònjà ò lì gbeyà, eŋge èembe yà worzo, yɔ̀ à mà lùkɛ̀lɛ̀ hwatò hwa è rze yà mɔ̀nyɛ̀. Ndeŋgànɛ̀lɛ̀ mɔ̀ à ma hwɛ ndi lì gbeyà nanù ò worzo wò eŋge èembe ema è mà ohva èhwènà ndɛnɛ. À mà òhweyà hwatò nanù ema hwa wondɛ èrzìrzà ema wɔ̀ hwa ò kanɛ̀, ema è àyɛ̀kɛ̀nɛ̀ eŋge èembe ema è mà ohva èhwènà yà rzɔ̀lɔ̀ ndi tɔ̀ nanù è e hwèlì lòŋgɛ.

¹⁵Èèmbe ema è ùkirzɛ̀ hwehwàkɛ è mà ŋgbààhwà wònjà ò lì rzìyoweya mùùlù mò lòŋgɛ ò eŋge èrzìrzà yà eŋge èembe yà worzo. È mà gbeyà ndi nanù, aŋga nanù eŋge èrzìrzà è ohwa ndèŋgànɛ̀lɛ̀ è ò oŋwa hwatò hwa arzɛ ema hwa rza èmèlɛ̀ lì è kanɛ̀.

¹⁶Èŋge èembè ema è mà ùkirzɛ̀ hwehwàkɛ è mà imbɛ hwatò hwa arzɛ, tɔ̀ è hwɛ ndi hwatò ema hwa hwèlì wòlìtò tɔ̀ è wɔ̀ ema hwa rza enje wòlìtò, tɔ̀ hwèwàŋgì tɔ̀ mèlìrzà, tɔ̀ hwàkòmì tɔ̀ iwònjà, nanù ema hwa hwà ika èmɛ̀nɛ̀nì ò mɔ̀ɔ mò awu mo momɛ̀ tɔ̀ o imbɔ̀mbɔ̀ ja awu.

¹⁷Tɔ̀ ima mòtò ema a rzi hwɛnɛ ene èmɛ̀nɛ̀nì à rzi tànɛyi lì anda tɔ̀ lì àhwìrzɛ̀ è nyòŋga. Ène èmɛ̀nɛ̀nì è hwèlì ndi lìinà là èŋge èembe, tɔ̀ mɔ̀rzɔ̀ŋgi mò lìinà là eni.

¹⁸Lìhwìyè lì àŋgàmɛ̀nɛ̀ lì gbeyànɛ̀hwɛ̀ anu. Inyɛ̀ tɔ̀ ima mòtò ema à hwɛni lì rzɔ̀ŋgìtɛ̀nɛ̀ à kɔ̀kè jànda jà mɔ̀rzɔ̀ŋgi mò è èembe, ehwànja mò hwèlì ndi mɔ̀rzɔ̀ŋgi mò lìnà là mòtò. Oŋgo mòtò mɔ̀rzɔ̀ŋgi mò eni mò hwèlì ndi hwègbe mòtohwa nà mènì mòtohwa nà mòtohwa.