Read Mokpwe Hwèwulùwèlì 18 Bible Online

Hwèwulùwèlì 18 - Mokpwe bible

Hwèwulùwèlì 18

¹Ò mburza yà hwene hweyà, nà mà ɛnɛ è hvɛhvɛ aŋgèlì è mà uwɛ̀lɛ̀lɛ̀yi ò ŋmanyu yà lohwà lì rzihwa ò rze, è mà ohva wònja ndɛnɛ, ŋmàye mò eni mò mà hvààlɛ̀ è rze yà mɔ̀nyɛ̀ yà arzɛ.

²È mà tɛ nà lìlo lì kàrzàmi nanù ema, “È mà rzuuhwa, Babìlɔ̀nì, è mbowà ndɛ̀ɛ̀ndɛ̀ è rzùùhwi! È mà timba ndi è mbowà ya hwèlìŋgɛ̀ hwe wòhwe, èki ema hwèlìŋgɛ̀ hwe arzɛ hwe mbìndò hwe hwèlì, na èki ya hwenɔ̀ni hwe mbìndò ema hwatò hwa kɔ̀ɔ.

³Èhwànja hwatò hwa arzɛ hwa hwèkòmè hwe e rze ya mɔ̀nyɛ̀ hwà mà hwɛnɛ e nyɔ̀ŋgì ya lì gbeyà hweyà hwe wòhwe ema à mà hwɛ lì gbeyà ndèŋgànà mɔ̀ à e hwa ŋgba mìimba emà mà hwa womìrzɛ. Ikìŋgɛ ja e rze ya mɔ̀nyɛ̀ i ma gbeyà mòrzònje na mɔ̀. Ndèŋganɛlɛ hwatò hwa rze ema hwa anda na lì àhwirzɛ̀ e nyòŋga, hwà mà tuwa hwèwàŋgì ehwànja hwà mà ohva e nyɔ̀ŋgi ndɛnɛ ya lì gbeyà hweyà hwa eni hwe wòhwe.”

⁴Rzìi na hweyà lìhvɛhvɛ lìlo lì ma uhweyà o ŋmanyu yà lohwà, lì ma ohwa nanù ema, “Hwàto hwa ami e wurze o tenì ya eŋge mbowà, aŋga nanù e rza hwɛ mondeŋge na wɔ̀ o lì gbeyà wòhwe, aŋga nanù inyɔ e rza o luwa lìkayi o e kɔ̀kìrzɛ̀ ya awu.

⁵Wòhwe wo eni wo koki o nyo ya eni ema wo olo natɛ̀ɛ o a ɛnɛ oma e uka o ŋmanyu yà lohwà, ndèŋgànà Lohwɛ̀ à mà ɔ̀ŋgɛ̀lɛ̀ hweyà hwe wòhwe ema à mà gbeye.

⁶Inyɔ e mo gbèeyà hweyà ŋgànà hvɔ̀kɔ na oma mɔ̀hvɛ à mà e gbèeyà. Inyɔ e mo taŋgeya ŋgelì ihwàkɛ o nyòla hweyà hwe wòhwe ema à mà gbèeyà. È mo ondìrzɛlɛlɛ lìwonde la eni na elàndi ema e imbami ŋgelì ihwakɛ lì aka e yɔ ema mɔ̀ à mà e ŋgbe.

⁷È mo ŋgbe rzayi-rzayi ja mètàkà na ndùtù ŋgelì ihwakɛ nàa èluhwe na lìwɔ̀wìrzɛ̀ la nyo ema à mà aŋgbɛ mɔ̀ ŋmìti. Mɔ̀ a ohwa o tenì ya ŋmèma mo eni nanù ema, ‘Nà lìyayi ndi nàa gbàta, na rza enje mòkurze mo molanà, ndèŋgànɛ̀lɛ̀ na rza o ɛhwɛ hvɛ tɔ̀ wùnyà.’

⁸O nyòla ene eyà, o wùnyà wɔ̀kɔ mɔ̀ à o hvàalɛ̀hwɛ̀ ikàndɛ. Iŋgi kandɛ i hwèlì ndi; e nyàmbɛ, lì ɛhwɛ na e njawu. A o konirzɛhwɛ na mùnya, ehwànja Rzàŋgo Lohwɛ̀, mɔ̀ ema a o mo kàyìrzɛ a olo.”

⁹Ikìŋgɛ ja e rze ya mɔ̀nyɛ̀ ema i ma gbeyà mòrzònje na mɔ̀, ndèŋgànɛ̀lɛ̀ hwà mà hwɛ o mòndeŋgè na mɔ̀ o lì ohva e nyɔ̀ŋgi ya lì gbeyà hweyà hwe wòhwe, hwa o eeya na lì ɛhwɛ na oma hwa o ɛnɛ yutùtù na oma e wurza e hvonda ema a rzeeya.

¹⁰Hwa o tɛ̀mɛ̀ hvoo ehwànja hwa oka wɔ̀ŋgɔ̀ nanù ema wɔ̀ hvɛ hwa o taka na oma mɔ̀hvɛ a taka. Ndeŋgànɛ̀lɛ̀ hwa o tɛ nanù ema, “Jiyeyi, jiyeyi, ene mbowà ndɛɛndɛ ya màyìmbi, Bàbìlɔ̀nì, o hvoka ya awa hvɔ̀kɔ mɛnɛ ɔndi o lu e kɔ̀kìrzɛ̀ nanù e?”

¹¹È wɔ̀ hwa e rze ya mɔ̀nyɛ̀ ema hwa anda na lì àhwirzɛ̀ inyòŋga, hwa o mo eeya na lì ɛhwɛ, ehwànja tɔ̀ mòtò a rza o anda hwerzàŋgo hwe awu hvɛ.

¹²Liŋgi lìrzàŋgo lì hwèlì ndi, e gòòlù, e rzìlìhwà, hwàanà màŋyàyi ma wòlìtò ema mà hvàànyà, na hwàanà màŋyàyi ema mà hwèlì wòlìtò. Hweŋge hwema hwe ma hwɛ hvɛ ndi hwerzanja ema hwe andahwa na wolì ema wo koki, yɔ̀kɔ ema e hwɛ̀lɛ̀hwɛ̀ lìniyɛni, ehvɛhvɛ ema e hwɛ̀lɛ̀hwɛ̀ rzilìki, ihvɛhvɛ ema i teya, e nyayi ema ikiŋgɛ i wɔ̀tɔ̀, ndèŋgànɛ̀lɛ̀ e hweyɔ ema hwe teeya rzayi-rzayi. Hweŋge hwèèmà hwe ma hwɛ hwèhwàmbo ema hwe uwɛ̀lɛ̀lɛ̀yi o gbee ema hwe ohvi hwèrzùnju hwe hvɛ̀ɛ̀hvɛ̀, na hwèèmà ema hwe wondɛhwɛyi ema hwe àhwirzɛ̀hwɛ̀ wolì ema wo koki. Hweŋge hwèèmà hwe ma hwɛ hvɛ ndi hwèèmà ema hwe wondɛhwɛyi na màrzoŋgà mà njɔ̀kù na hwɛ̀ɛkɛ̀, brɔ̀nrzi na màŋyàyi ema mà hvàànyà ema mà hwɛ̀lɛ̀hwɛ̀ mabɛ̀lì.

¹³Hwà mà ohva hvɛ hwèèmà nàa rzìnàmɔ̀nì, hwèèmà hwe erzunju ya hvɛ̀ɛ̀hvɛ̀, itùwà, màyì, hvìlakìnrzɛ̀, mìimba, lìyɔ̀ki la Njàhwɛ̀, lìwu la mbarzi ema lì hwɛ̀lɛ̀hwɛ̀ nanù ema hwìti. Hwà mà hwɛ hvɛ lì àhwirzɛ̀ inyàka na mɛ̀ɛ̀lɛ̀ŋgù, iwɔ̀rzi na hwèhwàmbànì, na hwàkòmì na hwatò ema hwa mà lɛmbɛ.

¹⁴È wɔ̀ ema hwa anda na lì awìrzɛ̀ inyòŋga hwà mà mo òhwirzɛnɛ nanù ema, “Hweema hwe gbamù hwe arzɛ ema e ma àhvìtɛ̀, hwe rza o hwɛ hvɛ na inyɔ. O ma wɔ̀lɛnɛ hwèèmà hwe arzɛ ema hwe hwèlì gbamù na mòlòŋgà, ndèŋgànɛ̀lɛ̀ o rza o hwe luwa hvɛ tɔ̀ wùnyà.”

¹⁵È wɔ̀ ema hwà mà hwɛ lì anda na lì àhwirzɛ̀ ini nyòŋga, ema hwa ohvi hwene hwèèmà hwà mà nàmà o nyòla hwene hwema. Hwa o tɛ̀mɛ̀ hvoo ehwànja hwa oka wɔ̀ŋgɔ̀ nanù ema wɔ̀hvɛ hwa o luwa mono mòtàkà ema mɔ̀hvɛ a luwa, hwa o eeya na lì ɛhwɛ.

¹⁶Hwa hwèlì hwa tɛ nanù ema, “Jiyeyi, jiyeyi, o wa ene mbowà ndɛɛndɛ, ema o ma hwɛ lì wɔ̀tɔ̀ mààtu ma gbamù ema mà kɔ̀lɔhwi na hwèrzànjà hwe gbamù ema hwe hwɛ̀lɛ̀hwɛ̀ nanù ema lìniyɛni, ndèŋgànɛ̀lɛ̀ o wɔ̀ti màlena, na e mɔ̀ ema mà teeya rzayi-rzayi. O wa ema o ma hwɛ lì wɔ̀tɔ̀ hwèèmà hwe gòòlù, hwèèmà ema hwe wèkahwì na hwàanà màŋyàyi ma wòlìtò emà mà hvàànyà, na hwahvɛhvɛ hwàanà màŋyàyi emà mà andawa na wolì ema wo koki, emà mà hwɛ̀lɛ̀hwɛ̀ nanù ema pɛ̀ɛlì.

¹⁷O awa hvɔ̀kɔ mɛnɛ mono mònàmɛ̀ mo arzɛ mo ma nyɔ̀ŋgɔ̀.” Hwàto ema hwa kànèyà mèelì me ŋmànja, na hwatò ema hwa ɛndɛ yɔ̀ndɔ na mèelì me ŋmànja, hwatò ema hwa gbeyà èwòlò o tenì ya mèelì me ŋmànja, hwatò ema hwa anda na lì awìrzɛ̀ inyoŋga o tenì ya ŋmànja, hwà mà tɛ̀mɛ̀ hvoo,

¹⁸na oma hwà mà ɛnɛ Yùutùtù ema e wurza na oma à mà hwɛ lì rzeeya. Hwà mà tɛ nanù ema, “O rzì hwɛ a hwɛ ehvɛhvɛ mbowà ndɛɛndɛ nàa ene mbowà ndɛɛndɛ!”

¹⁹Aŋga ndi hwa a koma e rzɔ̀hwɛ o mèyòhvò me awu ehwànja hwà mà hwɛ lì eeya, na lì ɛhwɛ, na lì ohwa nanù ema, “Jiyeyi, jiyeyi, na e mbowà ndɛɛndɛ, ema hwaŋga ema hwà mà ohva mèelì me ŋmànja ema hwà mà nàmeyà o nyòla ya hwèèmà hwe eni. O awa hvɔ̀kɔ mɛnɛ à mà wɔ̀lɛnɛ hwene hwèèmà hwe arzɛ.”

²⁰Inyɔ ema e hwèlì o ŋmanyu yà lohwà e oke mɔ̀nyɛ̀ŋgì o nyòla e kɔ̀kìrzɛ̀ ema oŋgo molanà à mà luwe. Inyɔ hwatò hwa ama Lohwɛ̀, i àpɔ̀rzìtòlò na hwà-òhwèlì hwa hwèlìŋgɛ̀ e oke mɔ̀nyɛ̀ŋgì ehwànja Lohwɛ̀ à mà akɛlɛ e mbako o lì mo teŋgɛ̀nɛ̀ o nyòla mamɛ ema mɔ̀ à e gbèelì.

²¹Aŋgèlì ndɛnɛ rzìi e anjilɛ lìŋyàyi lì ndɛnɛ ema lì ma akɛnɛ lìŋyàyi lì ndɛnɛ ema hwa gbeyàna o lì nyuka hwènyɔ̀ɔ̀nì hwe hwehvùma, rzìi e lì undirzɛ o tenì ya ŋmànja, rzìi a ohwa nanù ema, “Nànù ndi hwa o undirzɛ e mbowà ndɛɛndɛ ya Babìlɔ̀nì o rze na mòhvùŋgu, ndeŋgànɛlɛ hwatò hwa rza o e ɛnɛhwɛ hvɛ.

²²O eŋge hvonda mɔ̀tɔ̀wù mo mondindi ema hwà mà oke, hwàyèmbèlì hwa mɛ̀rzɔ̀kɔ̀, hwatoŋgèlì hwa ihvole na mawɔ̀mi, me rza o hwɛ̀ɛnɛ̀ hvɛ o e mbowà ndɛnɛ ya anyu. Tɔ̀ mògbèèlì tɔ̀ mɔ̀kɔ wa tɔ̀ ima nyayi ya èwòlò a rza o luwahwa hvɛ o ìtììtènì ya anyu, moombàni mo marzini emà mà rzika hwèèmà, mo rza o hwɛ̀ɛnɛ hvɛ tɔ̀ wùnyà.

²³O e mbowà ndɛnɛ ya aŋgɔ, etùlù e rza o hvànya hvɛ tɔ̀ wùnyà, lìlo la mɔ̀nyɛ̀ŋgì la mɔ̀ɔ̀mbì na e mohwɛ̀ɛ̀nɛ wa mɔ̀ɔ̀mbì lì rza o hwɛ̀ɛnɛ hvɛ tɔ̀ wùnyà. Hwa o hvàŋga eŋge mbowà ndɛnɛ ehwànja, hwatò hwa aŋgɔ̀ hwa nyòŋga ya lì anda na lì ahwìrzɛ wɔ̀ ndi hwà mà hwɛ iŋgumu ja nyòŋga o e rze ya mɔ̀nyɛ̀ ya arzɛ, ndèŋgànɛ̀lɛ̀ hwatò hwa arzɛ hwa hwèkòmè hwe e rze ya mɔ̀nyɛ̀, o ma gbeyàna màagikì ma aŋgɔ o lì hwa lukɛlɛ.”

²⁴Lohwɛ̀ à mà kɔ̀kìrzɛ̀ Babìlɔ̀nì ehwànja, hwatò hwa Babìlɔ̀nì hwà mà oŋwa hwà-òhwèlì hwa hwèlìŋgɛ̀, hwatò hwa wòtani hwa ama Lohwɛ̀ na hwahvɛhvɛ hwatò ema hwà mà ŋwɛ o e rze ya mɔ̀nyɛ̀.