Read Mokpwe Hwèwulùwèlì 19 Bible Online

Hwèwulùwèlì 19 - Mokpwe bible

Hwèwulùwèlì 19

¹O mburza hvonda ema eŋge aŋgèlì e ma ohwe hwene hweyà hwe arzɛ, ɔndi na a hweyà yoma nàa lìlo ema lì kàrzàmi ò tenì ya e ŋgindi o ŋmanyu yà lohwà, ema lì ma hwɛ lì ohwa nanù ema, “Jèka i hwɛ na Lohwɛ̀. Lì kɔ̀tɔ̀wɔ̀, èluhwe na màyìmbi hwe uwɛ̀lɛ̀lɛ̀yi ndi o ma Lòohwà la arzu.

²È mbako ya eni e tɛmi ehve-ehve na e jɔ̀kɛ̀ ehwànja mɔ̀ à mà kɔ̀kìrzɛ̀ e molanà mondɛnɛ wa àkpàlà, ema à mà ìnɛ̀lɛ̀ hwatò hwa arzɛ hwa e rze ya mɔ̀nyɛ̀ o lì gbeye wòhwe lì akeyà na hweyà hwe eni hwe mòrzònje. Lohwɛ̀ à mà mo kɔ̀kìrzɛ̀ ehwànja mɔ̀ à mà oŋwa e mògbèèlì hwa ama Lohwɛ̀.”

³Rzìi hwa tɛ hvɛ nanù ema, “Jèka i hwɛ na Lohwɛ̀. Yutùtù ema e uwɛlɛlɛ o tenì ya ene mbowà ndɛɛndɛ ema e rzeeya nanù e hwèlì e agba o ŋmanyu natɛ̀ɛ na o gbìndèyà.”

⁴È mbàŋgɛ ya hwàmbaki na hwànìi na hweŋge hwèembè hwe ànìyɛ̀ hwe ma kpa o rze o worzo wo ama Lohwɛ̀, rzìi hwa mo kanɛ̀, mɔ̀ ema a lìya o e konda ya lìkànèyà. Hwà mà ohwa nanù ema, “Inyɛ̀ wo lìya nanù! Jèka i hwɛ na Lohwɛ̀.”

⁵Rzìi lìlo lì ma uwɛ̀lɛ̀lɛ̀yi o e konda ya lìkànèyà lì ohwa nanù ema, “È eke Lòohwà la arzu, inyɔ hwa arzɛ ema e hwèlì hwàgbèèlì hwa eni, inyɔ ema e mo ŋgbàà èluhwe, tɔ̀ e hwɛ ndi hwatò ema hwa hwèlì wòlìto tɔ̀ e wɔ̀ ema hwa rza enje wòlìto.”

⁶Rzìi na hweyà yoma nàa lìlo lì ndɛnɛ ya e ŋgindi ya hwatò, lì ma hwɛ̀ɛnɛ̀ ndi nàa malìhwà mà lìyowa ndi mo ɔndɔ̀ɔ̀, ndèŋgànɛ̀lɛ̀ nàa mɔ̀tɔ̀wu mo e ŋgala lohwà. Liŋgi lìlo lì ma ohwa nanù ema, “Jèka i hwɛ na Lohwɛ̀. Èhwànja e Rzàŋgo Lòohwà là arzu ema lì kàrzàmi a hwèlì a kànèyà.

⁷Inyɛ̀ irzɔ jo oke mɔ̀nyɛ̀ŋgì rzayi-rzayi, ndèŋgànɛ̀lɛ̀ jo a ohwa nanù ema jo oki mɔ̀nyɛ̀ŋgì na o lì mo eka, ehwànja lìrzako la lìhwa la ama e Ŋguma ya Mɔ̀lɛ̀ŋgù lì ma uka, ndeŋgànɛlɛ mɔ̀ɔ̀mbì mo eni mo mà màa lì wòŋgìrzɛ̀nɛ̀.

⁸Èhwànja à mà tanɛyi, Lohwɛ̀ à mà mo ŋgbàà e wònja o lì wɔ̀tɔ̀ màatù emà mà kɔ̀lɔhwi na lìhwatu la gbamù ema lì hwɛ̀lɛ̀hwɛ̀ nanù ema lìniyɛni. Lì hvàànyà ndèŋgànɛ̀lɛ̀ lì rzàŋgi.” Lìŋgi lìhwatu la gbamù lì hwèlì ndi nàa hwèèmà ema hwatò hwa Lohwà hwa gbeyà ema Lohwɛ̀ a lìŋgàni.

⁹Èŋge aŋgèlì rzìi e no ohweyà nanù ema, “Tila nanù ema, mònàmɛ̀ na hwaŋga ema hwa yowɛhwɛyi o e ndèma ya lìhwa ya ama e Ŋguma ya Mɔ̀lɛ̀ŋgù.” Èŋge aŋgèlì rzìi e lata hvɛ o lì ohwa nanù ema, “Hwene hweyà hwe jɔ̀kɛ̀ hwe uwɛ̀lɛ̀lɛ̀yi ndi o ma Lohwɛ̀.”

¹⁰Rzìi na kpa o worzo wo eni o lì mo kanɛ̀. Ndi e aŋgèlì e ma no ohweyà nanù ema, “Jàyɛ̀ o rza gbeyà nanù, na hwèlì ndi mògbèèlì wa ama Lohwɛ̀ nàa o wa, na hwèlì ndi nàa hwahvɛhvɛ hwatò ema hwa lòkɛ̀yì Krirztò. Nà hwèlì ndi nàa mɔ̀kɔ ema a tɛmi o e jɔ̀kɛ̀ ema Yerzù à mà okolɛ. Lohwɛ̀ ndi inyɔ e àŋgàmɛ̀nɛ̀yi o lì kanɛ̀.” È jɔ̀kɛ̀ ema Yerzù a wulu yɔ̀ ndi e ŋgbelì hwatò màyìmbi o lì ohwa ŋmɛ̀ndì mo ama Lohwɛ̀.

¹¹Nà ma ɛnɛ e ŋmanyu yà lohwà e lìhvohwèlì. Rzìi na ɔŋgɔ rzìi na ɛnɛ wɔ̀rzi ema e tana, e mòtò ema à mà e lìya o ŋmanyu à mà hwɛ̀lɛ̀hwɛ̀ ndi Èhve-ehve na Jɔ̀kɛ̀. Mɔ̀ a kàyìrzɛ hwatò ŋgànà ema e hvomɛ̀nɛ̀yi ndèŋgànɛ̀lɛ̀ a anana hwàkɔ̀yèlì.

¹²Mìirzɔ ma eni ma hwɛ o tenì nàa mùnya ema mo oŋwa ndèŋgànɛ̀lɛ̀ a wɔ̀ti hwèkòòtò rzayi-rzayi o mòòhvò mo eni. A ohvi lìinà ema lì tìlahwì o nyo ya eni nanù ema tɔ̀ mòtò a rza hwiyɛ lì aka tɛ mɔ̀ ŋmìti.

¹³A wɔ̀ti mòŋgòmbè ema mo ma inahwa o màyija ndèŋgànɛ̀lɛ̀ lìnà ema hwà mà mo hwɛlɛnɛ lì ma hwɛ ndi, Eyà ya Lohwà.

¹⁴Hwàànelì hwa njuma hwa e ŋmanyu yà lohwà hwà mà wɔ̀tɔ̀ mààtu ma gbamù emà ma mà kɔ̀lɔ̀wɔ̀ ndi na erzanja ema e hwɛ̀lɛ̀hwɛ̀ nanù ema lìniyɛni, hwe ma hwɛ ndi mbɔ̀mi ndèŋgànɛ̀lɛ̀ hwe ma rzàŋga. Hwà mà lìya o ŋmanyu ya iwɔ̀rzi ema i tana ndèŋgànɛ̀lɛ̀ hwà mà hwɛ lì mo oŋgama.

¹⁵Rzɔ̀lɔ̀ ema e eeya rzayi-rzayi ema à mà gbeyàne o lì anana hwatò hwa hwèkòmè hwe e rze ya mɔ̀nyɛ̀ e ma wurza o tenì ya e wàna ya eni. Mɔ̀ ŋmìti a o hwa kànèyà na màa emà mà eti. Mɔ̀ ŋmìti a o yàaya hwehvùma ema hwa nyuka o lì gbeyà mìimba, o lì uŋmɛ̀lɛ̀ hwètàtò hwe ndɛnɛ hwe ama Lohwɛ̀ lì kàrzàmi.

¹⁶O mòŋgòmbè mo eni na o e rzorzo ya eni lìni lìnà lì tìlahwi aŋga nanù ema, “Kiŋgɛ wa ikiŋgɛ ja arzɛ na e Rzàŋgo ya irzaŋgo ja arzɛ.”

¹⁷Nà ma ɛnɛ aŋgèlì ema e tɛmi o tenì ya igbèyi. È ma tɛɛya hwenɔ̀ni hwe arzɛ ema hwe kòhwà o lìwòhwɛ la ŋmanyu na lìlo lì ndɛnɛ nanù ema, “È jèe, e arzàŋganɛ, o e ndèma ndɛnɛ ema Lohwɛ̀ a o wòŋgìrzɛ.

¹⁸Inyɛ̀ e jèe e lee inyàmà nyo ja ikìŋgɛ, inyàmà nyo ja hwàkànèlì hwa hwààna njuma, inyàmà nyo ja hwatò hwa màyìmbì, inyàmà nyo ja iwɔ̀rzi na inyàmà nyo ja hwatò ema hwa ji lìyayi o ŋmanyu, e jèe e lee inyàmà nyo ja hwatò hwa hwènàmà hwa arzɛ, inyàmà nyo ja iwònjà na hwàkòmì, hwatò ema hwa hwèlì wòlìto na hwaŋga ema hwa rza enje wòlìto.”

¹⁹Rzìi nà ɛnɛ è nyàmà yà wòhwe nà ikìŋgɛ jà è rze yà mɔ̀nyɛ̀ nà hwàànèlì hwa awu hwa njùma hwa arzàŋganɛ ò lì anàna è mɔ̀ ema à mà loma lì jà rzì à lìya ò ŋmanyu yà è wɔ̀rzi ema è tana nà hwàànèlì hwa eni hwa njuma.

²⁰Rzìi hwa lɛmbɛ eŋge nyàmà yà wòhwe nà hwà-òhwèlì hwa hwèlìŋgɛ̀ hwa mòlàŋgà. Oŋgo mòòhwèlì wà èlìŋgɛ̀ wà mòlàŋga à mà hwɛ ò worzo wò eni, à mà hwɛ lì uŋmɛ̀lɛ̀ embànelì ò lì lùkɛ̀lɛ̀lɛ̀ hwatò ema hwa mà luwɛ eembànelì yà eŋge nyàmà yà wòhwe ndèŋgànɛ̀lɛ̀ hwa mà hwɛ lì kanɛ̀ eŋge elìŋgɛ̀. È hvonda ema hwà mà hwɛ lòŋgɛ hwà mà hwa hvimba wɔ̀ hwahwàkɛ o tenì ya ehvɔ̀ndi ya mùnya, ndèŋgànɛ̀lɛ̀ hwà mà rzeeya na mùùnya ema mo ma hwɛ lì tumbana rzayi-rzayi.

²¹È wɔ̀ ema hwà mà tɛɛnɛ hwà mà oŋwahwa na e rzɔ̀lɔ̀ ema e ma wurza o tenì ya e wàna ya e mòtò ema à mà lìya o ŋmanyu ya e wɔ̀rzi. Hwenɔ̀ni hwe arzɛ hwe ma ujeya o mburza ya hweleelì hwe inyàmà nyo ja awu.