Read Mokpwe Hwèwulùwèlì 20 Bible Online

Hwèwulùwèlì 20 - Mokpwe bible

Hwèwulùwèlì 20

¹Nà oma oŋgo mòtò à mà rzùùwànè hwàkɔ̀yèlì, rzìi nà ɛnɛ aŋgèlì ema è mà uwɛ̀lɛ̀lɛ̀yi ò ŋmanyu yà lohwà è rzìhwa, è mà ohva ìlìhvòwànì jà ehvɔ̀ndi ema è rza ohvɛ lìrzùkù. È mà tɛtɛ hvɛ ŋgɔ̀kɔ̀hwi ndɛnɛ ema è mà hwɛnɛ mòrzimbɔ̀.

²Èŋge aŋgèlì è hvùma è dragɔ̀ni, wòŋgo gbahwà wò è hvonda yà kòwàà, ema wò hwèlì è Dɛhvùlì nà Mòkarzɛ̀. È aŋgèlì è mà mò kàka ò tenì yà ikolì jà meya.

³È aŋgèlì rzi è mò aŋgba ò tènì yà ehvɔ̀ndi ema è rza ohvɛ lìrzùkù. Rzìi e umba a e jeka o ŋmanyu ya eni o lì mo tɛ̀mìrzɛ̀ nanù ema a rza lukɛlɛ hwatò hwa e rze ya mɔ̀nyɛ̀ hvɛ, natɛ̀ɛ ikolì ja meya jo o kuwa. O mburzà nanù a àŋgàmɛ̀nɛ̀yi lì rzolowahwa o ŋmanà hvoka ya hvonda.

⁴Rzìi na ɛnɛ ikonda ja màkànèyà ema hwatò ema hwà mà ji lìya wɔ̀ ndi Lohwɛ̀ à mà ŋgbe e wònja o lì kànèyà hwatò. Rzìi na ɛnɛ e mòtò wa tenì wa hwatò ema hwà mà ŋwɛɛ. Hwà mà hwa oŋwa ehwànja hwà mà hwɛ lì ohwa e jɔ̀kɛ̀ ema Yerzù à mà jàne ehwànja hwà mà hwɛ lì ohwa ŋmɛ̀ndì ema mo uwɛ̀lɛ̀lɛ̀yi o ma Lohwɛ̀. Wɔ̀ hwà mà hwa oŋwa ehwànja wɔ̀ hwa rzi kanɛ̀ eŋge nyàmà yà wòhwe tɔ̀ èlìŋgɛ̀ ya eni ehwànja wɔ̀ hwa rzì emeyà lì luwa èèmbanelì ya eni o imbɔ̀mbɔ tɔ̀ o màà mà awu. Wɔ̀ hwà mà tìmba o lòŋgɛ rzìi hwa hwɛ na Krirztò o lìkànèyà o tenì ya ikolì ja meya.

⁵Hwanɛ̀yi hwa arzɛ ema hwà mà ŋwa hwa rzi timbe o lòŋgɛ natɛ̀ɛ ikolì ja meya i ma aka. Hwehvùmuwelì hwe kpelì hwe worzò hwe ene.

⁶Mònàmɛ̀ mo o hwɛ na hwaŋga ema hwa o hwɛ o hwehvùmuwelì hwe worzo. Hwa hwèlì ndi hwatò ema hwa hwèlì wòtani. È kpelì ema e hwèlì e kpelì ya hwèlìŋgɛ̀, e rza hwɛnì màyìmbì o ŋmanyu ya hwatò ema hwa hwèlì o hwehvùmuwelì hwe kpelì hwe worzo. Ndi wɔ̀ hwa o hwɛ ipilìrzi ja ama Lohwɛ̀ na e ja ama Krirztò, ndèŋgànɛ̀lɛ̀ wɔ̀ hwa o hwɛ na mɔ̀ o lìkànèyà o tenì ya ikolì ja meya.

⁷È hvonda ema iŋgi ikolì ja meya ja o aka, hwa o rzolowa Mòkarzɛ̀ o hwèwòwà.

⁸Mɔ̀ a rzolowahwi tɛ o hwèwòwà, a o ɛndɛ o injuka ja aniyɛ ja e rze ya mɔ̀nyɛ̀, o lì lukɛlɛ hwatò hwa arzɛ ema hwa hwèlì o e rze ya mɔ̀nyɛ̀. Ini njuka ja aniyɛ ja e rze ya mɔ̀nyɛ̀ i hwèlì ndi Gɔ̀gi na Magɔ̀gi. Mòkarzɛ̀ a hwa rzaŋga wɔ̀ hwa arzɛ èki yɔ̀kɔ o njùma. Ndeŋgànɛlɛ hwa o koka ndi nàa e nyàŋga ema e hwèlì o rzàawà ya ŋmànja.

⁹Wɔ̀ hwà mà tàalɛ o e rze ya mɔ̀nyɛ̀ ya arzɛ, rzìi hwa tòŋga èki ema Lohwɛ̀ a lìŋgàni ekì ema hwatò hwa eni hwa hwèlì. Ndi mùnya mo ma uwɛ̀lɛ̀lɛ̀yi o ŋmanyu yà lohwà rzìi mo kùwa lì hwa rzɛlɛ.

¹⁰Rzìi e Dɛhvùlì ema è mà hwa lùkɛ̀lɛ̀, è mà hvimbahwa ò yùlu yà mùnya ema e tumbana rzayi-rzayi, o èki ema eŋge nyàmà yà wòhwe na hwà-òhwèlì hwa hwèlìŋgɛ̀ hwa mòlàŋgà, hwa hwèlì. Ndeŋgànɛlɛ aŋga ndi wɔ̀ hwa o tàkɛ rzayi-rzayi ŋmèrze nà wuu natɛ̀ɛ nà ò gbìndèyà.

¹¹Nà ma ɛnɛ kònda ndɛnɛ̀ yà lìkànèyà ema e tanà, na e mòtò ema à mà e lìya o ŋmanyu. Aŋga ndi e rze ya mɔ̀nyɛ̀ na lìwòhwɛ la ŋmanyu hwe ma nyɔ̀ŋge o worzò wo eni, ndèŋgànɛ̀lɛ̀ hwe rzi ɛnɛhwɛ hvɛ.

¹²Aŋga ndi nà mà ɛnɛ hwatò ema hwa mà màa lì ŋwa, hwatò ema hwa hwèlì wòlìto nà hwaŋga ema hwa rza enje wòlìtò, hwa tɛ̀mì ò worzò wò eŋge kònda yà lìkànèyà. È kààti ema Lohwɛ̀ à mà tile hwɛ̀ɛ̀mɛ̀ hwe awu ò tenì, hwa mà è lìhvowa, ndèŋgànɛ̀lɛ̀ ehvɛhvɛ è mà lìhvowàhwa. Èŋge ndi è mà ohva mìinà mà hwatò ema hwa ò hwɛ̀ɛ̀ nà Lohwɛ̀ natɛ̀ɛ nà ò gbìndèyà. Lohwɛ̀ à ò kàyìrzɛ̀ hwatò ema hwa mà ŋwɛ̀ɛ̀, lì wowàna hwɛ̀ɛ̀mɛ̀ hwe awu nà oma è tìlahwì ò tenì yà eŋge kààti.

¹³Hwàto ema hwa mà ŋwèeyà ò tenì yà ŋmànja, hwa mà ɛndɛ ò mà Lohwɛ̀ aŋga nanù à hwa kàyìrzɛ̀. Ndeŋgànɛlɛ hwanɛyi hwatò ema hwa mà ŋwɛ̀ɛ̀ ema hwa hwèlì ò èkomè yà hwatò ema hwa mà ŋwɛ̀ɛ̀, wɔ̀ hvɛ hwa ò tɛ̀mɛ̀ ò worzo wò ama Lohwɛ̀ aŋga nanù mɔ̀ à ò hwa kàyìrzɛ̀ lì wowàna hwɛ̀ɛ̀mɛ̀ hwe awu.

¹⁴È kpelì nà èkomè yà hwatò ema hwa mà ŋwɛ̀ɛ̀ hwa mà komàhwa ò tenì yà yùlu yà mùnya. Ène kpelì yà yùlu yà mùnya è hwèlì ndi kpelì yà hwèlìŋgɛ̀.

¹⁵Tɔ̀ njɛnɛ ema lìinà là eni lì rzi tìlahwɛ ò tenì yà è kààtì yà lòŋgɛ, à ò hvìmbàhwà ò tenì yà yùlu yà mùnya.