Read Mokpwe Hwèwulùwèlì 21 Bible Online

Hwèwulùwèlì 21 - Mokpwe bible

Hwèwulùwèlì 21

¹È hvonda ema hwèkàyìrzèlèlì hwe ma akɛlɛhwɛ ɔndi nà à ɛnɛ e ŋmanyu yà lohwà hvènya nà e rze ya mɔ̀nyɛ̀ hvènya. È ŋmanyu yà lohwà na e rze ya mɔ̀nyɛ̀ ema hwe ma loma lì hwɛ hwe mà nyɔ̀ŋgɔ̀, ndèŋgànɛ̀lɛ̀ ŋmàanja hvɛ mo mà nyɔ̀ŋgɔ̀.

²Aŋga ndi nà à ɛnɛ e mbowà ndɛɛndɛ ya wòtani, e Jèrurzalɛ̀mù hvènya e uwɛ̀lɛ̀lɛ̀yi o ma Lohwɛ̀ o ŋmanyu yà lohwà. Lohwɛ̀ à mà mo rzekeya ndi nà oma hwalana hwa rzekeya mɔ̀ɔ̀mbì ema mo ɛndɛ o lìhwa.

³Nà ma hweyà lìlo lì ndɛnɛ ema lì uwɛlɛlɛyi o konda ya lìkànèyà lì ohwa nanù ema, “È ɔŋgɔ̀ tɛ, o naŋgɛ èki ya hwèlìyelì hwe ama Lohwɛ̀ e hwèlì ndi na hwatò hwa hwènàmà! Lohwɛ̀ a o lìiya na wɔ̀ èki yɔ̀kɔ ndèŋgànɛ̀lɛ̀ wɔ̀ hvɛ hwa o hwɛ ndi hwatò hwa eni. Lohwɛ̀ a o lìiya èki yɔ̀kɔ na wɔ̀.

⁴A o hwa titowa tɔ̀ ima mirzɔ̀lì o mìrzɔ ma awu. O rza o hwɛ hvɛ tɔ̀ kpelì, tɔ̀ lì ehwɛ, tɔ̀ luwa, tɔ̀ mòrziyò. È o hwɛ ndi nanù ehwànja hweyà hwe mbolowa hwe ma aka.”

⁵Mɔ̀ ema à mà lìyà o konda ya lìkànèyà rzìi a ohwa nanù ema, “È ɔŋgɔ tɛ nà mà gbeyà hweyà hwe arzɛ hwe hvènya!” Rzìi à no ohweyà hvɛ nanù ema, “Tila hwene hweyà ehwànja hwene hweyà ema na ohwa hwe hwèlì ndi e jɔ̀kɛ̀ ndèŋgànɛlɛ hwe hwèlì ndi hweyà ema tɔ̀ ima mòtò a àŋgàmɛ̀nɛ̀yi lì lòkɛ̀.”

⁶Rzìi à nò òhweyà hvɛ nanù ema, “È mà ondìrzɛ̀hwɛ̀! Imba ndi nà hwèlì Àlhvà ndèŋgànɛ̀lɛ̀ nà hwèlì Omèga, imba ndi nà hwèlì hwèwòtèlì nà lìrzùkù. Tɔ̀ njɛnɛ ema à hwɛni nyìrzɛ̀ nà mò ŋgba malìhwa ema mà uwɛ̀lɛ̀lɛ̀ ò ìtùŋgù jà malìhwa ema mòtò à nyɔ̀ɔ̀ rzìi à hwɛ ò lòŋgɛ nà ò gbìndèyà. Ndeŋgànɛ̀lɛ̀ na e ŋgba e yɔ o ŋgundu.

⁷È mòtò ema à ò rzùùwànɛ̀ mètàkà ehwànja à nò lòkɛ̀, imba nà ò mò ŋgba hwene hwèèmà hwe arzɛ. Nà ò hwɛ Lòohwà là eni ndèŋgànɛ̀lɛ̀ mɔ̀ hvɛ à ò hwɛ è ŋmanà wà ami.

⁸Ndi nà hwatò ema hwa ohvi erzorze ò tenì yà awu, hwaŋga ema hwa rza lòkɛ̀, hwaŋga ema hwa gbeyà hweyà hwe mbindo, hwatò ema hwa oŋwa hwahvɛhvɛ hwatò, hwatò ema hwa gbeyà hweyà hwe mòrzònje, hwa aŋgba mààŋga, hwatò ema hwa gbèeyà mòòhwà mà mòlàŋga nà hwatò hwa arzɛ hwa mòlàŋga, èki yà awu è hwèlì ndi yùlu yà mùnya ema è tùmbana rzayi-rzayi. Ène kpelì ndi e hwèlì e kpelì ya hwèlìŋgɛ̀.”

⁹Aŋgèlì hvɔ̀kɔ ya lìŋgi lìrzamba la aŋgèlì ema i ma ohva lìrzamba la hwèwoki ema hwe ma ondìrzɛ̀hwɛ na ikàndɛ lìrzamba ja lìrzùkù, e ma ja rzìi e no òhweyà nanù ema, “Jà, na o uŋmɛ̀lɛ̀ mɔ̀ɔ̀mbì, e jòjìyɛ̀ ya e Ŋgumà ya Mɔ̀lɛ̀ŋgù.”

¹⁰Èlìŋgɛ̀ yà wòtani rzìi e no rzihweyà, rzìi eŋge aŋgèlì e no ɛ̀ndɛ̀nɛ̀ o e ŋmanyu yà hvàko ema e kàrzàmi rzayi-rzayi. È mà no ika o ŋmanyu o lì no uŋmɛ̀lɛ̀ Jèrurzalɛ̀mù e mbowà ndɛ̀ɛndɛ̀ ya wòtani ema e rzàŋgi, na oma e uwɛ̀lɛ̀lɛ̀yi o ma Lohwɛ̀ o ŋmanyu yà lohwà.

¹¹È ma hwɛ lì hvànya na ŋmàye mo ama Lohwɛ̀. Èŋge mbowà ndɛɛndɛ e ma hwɛ lì hvànya ndi nàa lìŋyàyi la wòlìto ema lì àhwirzɛ̀hwɛ̀ wolì ema wo koki, e ma hvànya ndi nàa jarzipa ndèŋgànɛ̀lɛ̀ e ma ɛnɛhwɛ o tenì.

¹²Ène mbowà ndɛɛndɛ e ma hwɛnɛ ŋgawo ndɛnɛ ema e ma kàrzàmà ema e ma ohva lìyome la mawohva na mahwakɛ, na lìyome la aŋgèlì na ihwakɛ ema i ma ɔŋgeya màŋga mawohva. Mìinà mà lìyome la matumba nà mahwakɛ ma hwatò hwa Irzàyɛ̀lì ma mà tìlahwa o màŋga mawohva.

¹³O ma hwɛ mawohva mayawo o ehvàrzu ema igbèyi jo uwɛlɛlɛ, mawohva mayawo o ehvàrzu ya lɛ̀lu, mawohva mayawo ehvàrzu ya mbɛ̀ŋgɛ na mayawo hvɛ o ehvàrzu ema igbèyi i naŋgeya.

¹⁴Èŋge ŋgawo ya eŋge mbowà ndɛɛndɛ e ma oŋgahwa ndi o ŋmanyu ya lìyome la mènɔ̀ŋgɔ̀ na mehwakɛ, mìinà mà lìyome la àpɔ̀rzìtòlò na mahwakɛ me ama e Ŋgumà ya Mɔ̀lɛ̀ŋgù me mà tìlahwa o ŋmanyu ya mene mènɔ̀ŋgɔ.

¹⁵È aŋgèlì ema e ma no òhweyà hwene hweyà, e ma ohva eeye ya lìmɛ̀nì ya gòòlù ò lì mɛ̀nɛ̀ eŋge mbowà ndɛɛndɛ, mawohva na hwerzu hwe eni.

¹⁶Èŋge mbowà ndɛɛndɛ e ma ohva marzuku manii, mɔ̀tɛyi na lì teyama la eni lì ma hwɛ ndi lìmɛ̀nì lɔ̀kɔ. È aŋgèlì e ma mɛ̀nɛ̀ ene mbowà ndɛɛndɛ na eeye ya eni ya lìmɛ̀nì ya gòòlù. Limɛni la eni lì ma hwɛ ndi ikolì jɔ̀kɔ hwègbe hweta hwe màilì. Mɔ̀tɛ̀yi, lìteyàma na lì kàrzàma lì ma hwɛ ndi lìmɛni lɔ̀kɔ.

¹⁷Èŋge aŋgèlì e ma mɛnɛ hvɛ lìkàrzàma la eŋge ŋgawo, lì ma hwɛ meni mòtohwa me mɛta, mɔ̀ à mà gbeyàna lìmɛni ema hwatò hwa arzɛ hwa gbeyàna.

¹⁸Yòoma ema hwà mà gbeyàne o lì oŋgana eŋge ŋgawo e ma hwɛ̀lɛ̀hwɛ̀ ndi jarzipa, hwà mà gbeyàna ndi gòòlù ema e rza ohvɛ tɔ̀ mbindo o tenì, ema e uŋmɛ̀lɛ̀ nàa lìyɛni o lì oŋga eŋge mbowà.

¹⁹Manyayi ma mènɔ̀ŋgɔ̀ ma eŋge ŋgawo, ma mà hwɛ ndi imbumbu ja màŋyàyi ja arzɛ ema ja andàhwa wolì ema wo koki. Manyayi ma mɔ̀nɔ̀ŋgɔ̀ ma worzo ma mà hwɛ ndi jàrzipa, e mɔ̀ ema mo mò ùkirzɛ̀ mahwakɛ mo mà hwɛ ndi rzàhviya, e mɔ̀ emà ma mà ùkirzɛ̀ meyawo mo ma hwɛ ndi àgɛ̀tì, e mɔ̀ ema mo ma ùkirzɛ̀ manìi mo mà hwɛ ndi ɛmɛ̀làdì,

²⁰e mɔ̀ ema mò mà ùkirzɛ̀ meta mo mà hwɛ ndi onirzi, e mɔ̀ ema mo ma ùkirzɛ̀ mòtòhwa mo ma hwɛ ndi kànelìyànì, e mɔ̀ ema mo ma ùkirzɛ̀ lìrzamba mo ma hwɛ ndi klìrzòlàtì, e mɔ̀ ema mo ma ùkirzɛ̀ wàmbi mo ma hwɛ ndi bɛ̀ɛ̀lì, e mɔ̀ ema mo ma ùkirzɛ̀ luuwa mo ma hwɛ ndi tòpàrzì, e mɔ̀ ema mo ma ùkirzɛ̀ lìyome mo ma hwɛ ndi chàlrzɛ̀dònì, e mɔ̀ ema mo ma ùkirzɛ̀ lìyome na mɔ̀kɔ mo ma hwɛ ndi yàrzìnì, e mɔ̀ ema mo ma ùkirzɛ̀ lìyome na mahwàkɛ̀ mo ma hwɛ ndi àmetìrzì.

²¹Lìyome la màwòhva na mahwakɛ ma mà hwɛ ndi lìyome la màŋyàyi ma wòlìto na mahwakɛ, tɔ̀ ima lìyohva la kɔ̀tɔ tɛ lì ma wekahwa ndi na lìŋyàyi lɔ̀kɔ la wòlìto. Mòombò ema mo ma akeyà o tenì ya eŋge mbowà ndɛɛndɛ mo ma hwɛ ndi gòòlù ema a rza hwɛnɛ mbindo o tenì ema e ma hwɛ lì hvànya.

²²O tenì ya eŋge mbowà ndɛɛndɛ na rza ɛnɛ e Ndawò ya Lohwà, ehwànja e Rzàŋgo Lòohwɛ̀ lì kàrzami na e Ŋgumà ya Mɔ̀lɛ̀ŋgù wɔ̀ ndi hwa hwèlì nàa e ndawò yà Lohwà.

²³Ène mbowà ndɛɛndɛ e rza arza igbèyi tɔ̀ ŋmɛ̀ɛlì o lì e hvàyeya ehwànja èluhwe ya ama Lohwɛ̀ yɔ̀ ndi e hwèlì ŋmàye mo eni, ndèŋgànɛ̀lɛ̀ e Ŋgumà ya Mɔ̀lɛ̀ŋgù ndi à gbèyi nàa ètùlu ya eni.

²⁴Hwàto hwa arzɛ hwa e rze ya mɔ̀nyɛ̀, hwa o gbeyàna moŋgo ŋmàye o lì gbeyà hweyà hwe awu ema hwa àŋgàmɛ̀nɛ̀ lì gbeyà wùnyà tɛ. Ikìŋgɛ ja e rze ya mɔ̀nyɛ̀ jo o jànà mònàmɛ̀ mo awu o eŋge mbowà ndɛɛndɛ.

²⁵O rza o hwɛ tɔ̀ wùnyà ema lìyome la mawohva na mahwakɛ ma ene ŋgawo ma ene mbowà ndɛɛndɛ ma o umbawa, ehwànja wuu wo rza o hwɛ o tenì ya ene mbowà ndɛɛndɛ.

²⁶Hwa o jànà hwèèmà hwe gbamù, na mònàmɛ̀ mo hwatò hwa e rze ya mɔ̀nyɛ̀ o tenì ya ene mbowà ndɛɛndɛ.

²⁷Tɔ̀ yoma yà mbìndo tɔ̀ yɔ̀kɔ, tɔ̀ mòtò ema à gbeyà hweyà hwe wòhwe, tɔ̀ mòtò ema à kɔ̀ɔ hweyà, tɔ̀ mɔ̀kɔ wà awu a rza ò kpèeyà ò tenì yà eŋge mbowà ndɛ̀ɛ̀ndɛ̀. Hwàto ema mìinà mà awu mà hwèlì ò tenì yà è kààti yà lòŋgɛ yà ama è Ŋgumà yà Mɔ̀lɛ̀ŋgù wɔ̀ mɛnɛ ndi hwa ò kpèeyà ò tenì.