Read Mokpwe Hwèwulùwèlì 5 Bible Online

Hwèwulùwèlì 5 - Mokpwe bible

Hwèwulùwèlì 5

¹Nà ɛni kààti ema e lìŋgɛ̀lɛ̀hwɛyi, o lìya la mome la è mɔ̀ ema a lìyayi o konda yà lìkànèyà. Èŋge kààti ema e lìŋgɛ̀lɛ̀hwɛ e ma ohva motìla o imburza ja ahwakɛ, e ma lìŋgɛ̀lɛ̀hwɛ ndèŋganɛlɛ e ma jekahwa na lìrzamba la mèjèkà.

²Ndèŋganɛlɛ, nà ma ɛnɛ aŋgèlì ya màyìmbì e ohwa na lìlo ema lì kàrzàmi nanù ema, “Njɛnɛ a kànɛyi o lì gba mene mèjèkà rzìi a lìhvowa ene kààti ema e lìŋgɛ̀lɛ̀hwɛ e?”

³Ndi tɔ̀ o ŋmanyu yà lohwà, tɔ̀ o e rze ya mɔ̀nyɛ̀, tɔ̀ o èkomè ya hwatò ema hwà mà ŋwɛɛ, o rzi hwɛ tɔ̀ mòtò ema à mà tànɛ lì wuluhwa eŋge kààti ema e lìŋgɛ̀lɛ̀hwɛ tɔ̀ o lì e ɔŋgɔ o tenì.

⁴Nà ma eeya rzayi-rzayi èhwanja na rzi ɛnɛ tɔ̀ mòtò tɔ̀ mɔ̀kɔ ema à mà kànɛyi o lì wuluhwa tɔ̀ o lì ɔŋgɔ o tenì ya eŋge kààti ema e lìŋgɛ̀lɛ̀hwɛ.

⁵Ɔndi mòmbaki mɔ̀kɔ a no òhweyà nanù ema, “O rza eeya. Ɔ̀ŋgɔ tɛ, e njila ema e uwɛ̀lɛ̀lɛ̀yi o lìtumba la wònyà Yudà, o e nyɔ̀ŋgɔ̀ni ya ama Kiŋgɛ Dàhwitì, à mà rzuwàna e njuma. Mɔ̀ a kànɛyi lì gba lìrzamba la mèjèkà na lì wuluhwa eŋge kààti ema e lìŋgɛ̀lɛ̀hwɛ.”

⁶Nà mà ɔ̀ŋgɔ rzìi na ɛnɛ e Ŋguma ya Mɔ̀lɛ̀ŋgù, e tɛmi o ìtììtènì ja e konda ya lìkànèyà ema e tòŋgahwi na hweŋge hwèembè hwe àniiyɛ na hwàmbaki. Èŋge Ŋguma ya Mɔ̀lɛ̀ŋgù e ma ɛneya ndi nàa e mɔ̀ ema hwà mà oŋwe. È ma ohva lìrzamba la merzehwa na lìrzamba la mìirzɔ̀. Lìŋgi lìrzàmba la mirzɔ̀ lɔ ndi lì hwèlì lìrzàmba la hwèlìŋgɛ̀ la ama Lohwɛ̀ ema Lohwɛ̀ à mà ome o tenì ya e rze ya mɔ̀nyɛ̀ ya arzɛ.

⁷Èŋge Ŋguma ya Mɔ̀lɛ̀ŋgù e ma ɛ̀ndɛ rzìi e wowa e kààti ema e lìŋgɛ̀lɛ̀hwɛ o lìya la mome la è mɔ̀ ema à mà lìiya o konda ya lìkànèyà.

⁸O mburza hvonda ema mɔ̀ à mà wowe e kààti ema e lìŋgɛ̀lɛ̀hwɛ, hweŋge hwèembè hwe ànìiyɛ̀ na eŋge mbàŋgɛ ya hwàmbaki na hwànìi hwà mà kpa o rze o wòrzo wo ama eŋge Ŋguma ya Mɔlɛ̀ŋgù. Hwàŋga hwàmbaki hwa hwatò, tɔ̀ ima mɔ̀ wa awu à mà tɛ̀ɛ̀tɛ̀ɛ mondindi na mɔnjɔ mo luku mo gòòlù ema mo ma onda na itùwà. Iŋgi itùwà jɔ̀ ndi i hwèlì lìkànɛ la hwatò hwa ama Lohwɛ̀.

⁹Hwa mà èmba mɔ̀rzɔ̀kɔ̀ mòhvènya, nanù ema, “Ò kànɛ̀yi lì wòwa è kààti ema è lìŋgɛ̀lɛ̀hwɛ nà ò lì rzòlòwà mòjèkà mò eni, ò kànɛyi ehwànja ò mà oŋwàhwa, ndèŋgànɛ̀lɛ̀ ò mà kɔ̀tɔ̀wɔ̀ hwatò hwa ama Lohwɛ̀ nà màyija mà aŋgɔ. Ò mà gbeyà hwa mà timba ndi hwatò hwa ama Lohwɛ̀. Hwa mà uwɛ̀lɛ̀lɛ̀yi ò mahvɛhvɛ màtumba, hwa ò ohwa ihvɛhvɛ mbɔrzi, hwa uwɛ̀lɛ̀lɛ̀yi ò hwehvɛhvɛ hwèkòmè, ndèŋgànɛ̀lɛ̀ hwa hwèlì inyayi jà hwatò hwa arzɛ.

¹⁰À mà hwa gbeyà ò lì hwɛ ipilìrzi ema ì gbèeyà Lòohwà là arzu, ndèŋgànɛ̀lɛ̀ wɔ̀ hwa ò kànèyà è rze yà mɔ̀nyɛ̀.”

¹¹Nà mà ɔ̀ŋgɔ hvɛ, rzìi nà hweyà màlo mà rzayi-rzayi jà aŋgèlì. Wɔ̀ hwa mà tòŋga eŋge èki yà è konda yà lìkànèyà, ò èki ema hweŋge hwèembe hwe àniyɛ̀ nà hwàmbaki hwa hwatò hwa mà hwɛ. Iŋgi aŋgèlì ì mà hwɛ hwèkolì nà hwèkolì nà hwèlùnì nà hwèlùnì.

¹²Wɔ̀ hwa mà emba nà lìlo lì kàrzàmi, nanù ema, “È Ŋguma yà Mɔ̀lɛ̀ŋgù ema è mà oŋwàhwà, è kànɛyi ò lì lùwa màyimbi, erzàŋgo, lìhwiyè, ŋginyà, èluhwe, wonyàki nà jèka.”

¹³Rzìi nà hweyà hwèwèkelì hwe arzɛ ema hwe hwèlì ò ŋmanyu yà lohwà, nà ò è rze yà mɔ̀nyɛ̀, ò èkòmè ya hwatò ema hwa mà ŋwɛ̀ɛ̀, ò tenì yà ŋmànja, nà hwèèmà hwe arzɛ ema hwe hwèlì ò tenì yà ŋmàànja hwe emba nanù ema, “Jèka, èluhwe, wònyaki nà màyìmbì, inyɛ hwe hwɛ ò è mɔ̀ ema à lììyàyi ò konda yà lìkànèyà, ndèŋgànɛ̀lɛ̀ inyɛ hwe hwɛ nà è Ŋgumà yà Mɔ̀lɛ̀ŋgù, ò gbìndèyà nà ò gbìndèyà.”

¹⁴Hweŋge hwèembè hwe aniyɛ hwe ma hwɛ lì ohwa nanù ema, “Inyɛ̀ wo lìya nanù.” Èŋge mbàŋgɛ ya hwàmbaki na hwànìi rzìi e kpa o rze rzìi e kànɛ e Ŋguma ya Mɔ̀lɛ̀ŋgù.