Read Mokpwe Hwèwulùwèlì 6 Bible Online

Hwèwulùwèlì 6 - Mokpwe bible

Hwèwulùwèlì 6

¹Rzìi nà ɛnɛ eŋge Ŋguma ya Mɔlɛ̀ŋgù e rzolowa mòjèkà mɔ̀kɔ o ìtììtènì ja mèŋge mèjèkà lìrzamba. Rzìi na hweyà na oma èembe yɔ̀kɔ o ìtììtènì ja hweŋge hwèembè hwe aniyɛ e ohwa nanù ema, “Jà!” Lìlo la eni lì ma hwɛ̀ɛnɛ ndi nàa mɔ̀tɔ̀wù mo e ŋgala lohwà.

²Nà mà ɔŋgɔ, rzi na ɛnɛ wɔ̀rzi ema wo tanà. È mòtò ema à mà e lìya o ŋmanyu à mà tɛ̀ɛ̀tɛ̀ɛ lìkɔ̀rzi, ndèŋgànɛlɛ à mà ŋgbahwa ekòotò. A ma hwɛ ndi mòtò ema à mà hwɛ lì rzùùwa injùmà ihvonda ja arzɛ, ndèŋgànɛ̀lɛ̀ à mà woŋgirzɛnɛ o lì rzùùwa ehvɛhvɛ njuma ema à mà anane hwàkɔ̀yèlì.

³Rzìi na ɛnɛ eŋge Ŋguma ya Mɔ̀lɛ̀ŋgù na oma e ma rzolohwe mòjèkà ema mo ma ùkirzɛ̀ me hwàkɛ, nà mà hweyà èembe ema e ùkirzɛ̀yi hwehwàkɛ o ìtììtènì ja hweŋge hwèembe hwe aniyɛ e ohwa nanù ema, “Jà!”

⁴Rzìi ehvɛhvɛ wɔ̀rzi ema e teyaa rzayi-rzayi e ma wurza. È mòtò ema à mà e lìya o ŋmanyu à mà ŋgbahwa e wònja o lì ulɛ ɛ̀yɔ̀lɛ̀ o e rze ya mɔ̀nyɛ̀, aŋga nanù hwatò hwa hwènàmà hwa o àwòŋwànɛ̀ mɔ̀kɔ na ɔnɛyi. Ndeŋgànɛ̀lɛ̀ à mà ŋgbahwa rzɔ̀lɔ̀ ndɛnɛ.

⁵Nà oma nà mà ɛnɛ eŋge Ŋguma ya Mɔlɛ̀ŋgù na oma e rzolowa mòjèkà ema mo ma ùkirzɛ̀ meyàwo, nà mà hweyà èembè ema e ùkirzɛ̀ hweyàwò o ìtììtènì ja hweŋge hwèembe hwe aniyɛ e ohwa nanù ema, “Jà!” Nà ma ɔŋgɔ, rzìi na ɛnɛ wɔ̀rzi ema e indaa. È mòtò ema à mà e lìya o ŋmanyu à mà tɛ̀tɛ̀ màahvà mà lìmɛni o lìya la eni.

⁶Nà ma hweyà mamɛ ema e ma hweyɛnɛ nàa lìlo ema lì ma uwɛ̀lɛ̀lɛ̀yi o ìtììtènì ja hweŋge hwèembè hwe aniyɛ hwe ohwa nanù ema, “Lìkayi lɔ̀kɔ la mbàrzi mɛnɛ o etaŋgi ya èwòlò ya eyu yɔ̀kɔ, ndèŋgànɛ̀lɛ̀ màkayi mayawo ma kondi ya balì ema e rza andahwɛ na wolì ema wo lìtelì, o etàŋgì ya èwòlò ya eyu yɔ̀kɔ. Ndi inyɛ tɔ̀ mòtò a rzi hvàŋga màwuja na mìimba.”

⁷Rzìi na ɛnɛ eŋge Ŋguma ya Mɔ̀lɛ̀ŋgù na oma e rzolowa mòjèkà ema mo ma ùkirzɛ̀ mènii, nà mà hweyà èembe ema e ùkirzɛ̀ hwènìi o ìtììtènì ja hweŋge hwèembè hwe aniyɛ e ohwa nanù ema, “Jà!”

⁸Nà ma ɔ̀ŋgɔ, rzìi na ɛnɛ wɔ̀rzi ema e ma ɛneya mɔ̀rzɔ̀nɔ̀ nàa hwèwùlè ema hwe rzɔ̀ɔnji. Lìina la ama e mòtò ema à mà e lìya o ŋmanyu lì ma hwɛ̀lɛ̀hwɛ̀ ndi Kpelì, ndèŋgànɛ̀lɛ̀ èkomè yà hwatò ema hwa mà ŋwɛɛ e ma mo oŋgàma o mburzà. Hwà mà ŋgbahwa è wònjà o lì kànèyà lìkayi lɔ̀kɔ la e rze ya mɔ̀nyɛ̀ o ìtììtènì ja màkayi manii ja e rze ya mɔ̀nyɛ̀. Hwà mà ohwa nanù ema inyɛ a gbeyàne e rzɔ̀lɔ̀, e njawu, inyàmbɛ, na inyàmà ja wòhwe o lì oŋwa hwatò o e rze ya mɔ̀nyɛ̀.

⁹E Ŋguma ya Mɔ̀lɛ̀ŋgù rzìi e rzolowa mòjèkà ema mo ma ùkirzɛ̀ meta. Rzìi na ɔŋgɔ o rze ya ètàwo ya itùwà rzi na ɛnɛ hwèlìŋgɛ̀ hwe hwatò ema hwà mà oŋwahwa ehwànja hwà mà hwɛ o lì ohwa eyà yà Lohwà ndèŋgànɛ̀lɛ̀ hwà mà hwɛ lì ohwa hweyà hwe jɔ̀kɛ̀ lì hvomɛ̀nɛ̀ Lohwɛ̀ nyayi ema irzɔ i hwi nanù ema hwe hwèlì ndi e jɔ̀kɛ̀.

¹⁰Hweŋge hwèlìŋgɛ̀ hwe ma londa na lìlo lì kàrzàmi nanù ema, “Ìi Rzàŋgo Lohwɛ̀ ema o Kàrzàmi, ema o hwèlì wòtani na lì hwɛ jɔ̀kɛ̀, ima hvoka hvonda ndèŋgànà o e kàyìrzɛ hwatò hwa e rze ya mɔ̀nyɛ̀ na o lì hwa kɔ̀kìrzɛ̀ ehwànja hwa jo òŋwi e?”

¹¹Ndeŋgànɛlɛ tɔ̀ ima mɔ̀kɔ wa awu à mà ŋgbahwa mòŋgombè mò mbɔ̀mi, rzìi hwa ohwàhwɛlɛ nanù ema hwa ambɛ̀lɛ̀ hvɛ ŋmanà hvoka hvonda, natɛ̀ɛ na e hvonda ema mɔ̀rzɔ̀ŋgi mo hwahvɛhvɛ hwàgbèèlì ema hwa hwèlì nàa wɔ na wònyànyàŋgò hwa awu hwa ama Krirztò ema hwà mà hwɛnɛ lì oŋwahwa na oma wɔ̀hvɛ hwà mà oŋwahwɛ mo ondìrzɛ̀hwɛ.

¹²Eŋge Ŋguma ya Mɔlɛ̀ŋgù rzìi e rzolowa mòjèkà ema mo ma ùkirzɛ̀ mòtohwa. O ma hwɛ mònyìŋgìrzɛ̀nɛ̀ mo ndɛnɛ. Igbèe i ma àyèŋgòwɛ̀ jùùjùù rzayi-rzayi, ŋmɛ̀lì mɔ̀ hvɛ mo a teeya nàa màyija.

¹³Irzombe ja lìwòhwɛ la ŋmanyu i ma kùwa lì unda o rze ya mɔ̀nyɛ̀, na oma hwetɔwɛtɔwɛ hwe hwehvùma hwe komeya o rze e hwèlì tɛ ema e mbɛ̀hvɛ̀nì e nyìŋgìrzɛ̀nɛ̀yi tɛ gbee.

¹⁴Lìwòhwɛ la ŋmanyu lì ma nyɔ̀ŋgɔ̀ ndi nàa e kààti ema e lìŋgɛ̀lɛ̀hwɛyi ema e ma enyowahwa e lìŋgɛ̀lɛ̀hwɛ̀. Ndeŋgànɛ̀lɛ̀ ihvàko ja arzɛ na hweyondi hwe arzɛ hwe ma ulɛhwɛ o èki hwe awu.

¹⁵Rzìi ikiŋgɛ̀ ja e rze ya mɔ̀nyɛ̀, iŋgumu, hwàkànèlì hwa hwàanèlì hwa njùma, hwèwàŋgì hwe hwatò, hwatò hwa màyìmbì, hwàkòmì na iwònjà hwa o utàmà o tenì ya hwèèŋgà na o hwèwòmà hwe mànyàyi o ihvàko.

¹⁶Wɔ̀ hwà mà ohwirzɛnɛ ihvàko na hwewoma hwe màŋyàyi nanù ema, “È jo rzuweya, e jo hwande, aŋga nanù e mɔ̀ ema a lìyayi o konda ya lìkànèyà a rza jo ɛnɛ ndèŋgànɛ̀lɛ̀ nanù ema hwetàtò hwe ama e Ŋgùma ya Mɔ̀lɛ̀ŋgù hwe rza jo ɔ̀lɛ.

¹⁷Èhwànja Wùnyà wo wòhwe ema hwètàtò hwe awu hwe wurza o ewoka wo ma uka, ndèŋgànɛlɛ tɔ̀ mòtò a rza tànɛyi lì tɛ̀mɛ̀ o lì wo teŋgɛ̀nɛ̀.”