Read Mokpwe Hwèwulùwèlì 8 Bible Online

Hwèwulùwèlì 8 - Mokpwe bible

Hwèwulùwèlì 8

¹È Ŋguma ya Mɔ̀lɛ̀ŋgù rzìi e rzolowa mòjeka ema mo mà ùkirzɛ̀ lìrzàmba, e ŋmanyù ya Lohwà ya arzɛ e ma hwɛ ŋmɛɛ o hvoka hvonda ya rzayiyawo ya miniti.

²Rzìi na ɛnɛ aŋgèlì lìrzamba ema i tɛmi o worzo wo ama Lohwɛ̀, i ma ŋgbààhwà lìrzàmba la màwɔ̀ɔ̀mi.

³Aŋga ndi nà à ɛnɛ ehvɛhvɛ aŋgèlì e jelì e tɛ̀mɛ̀ o worzo wo ètàwo ya itùwà, e tɛ̀tɛ̀ ewoki ya gòòlù ema aŋga ndi hwa rzɛlɛlɛ itùwà o tenì. Hwà mà mo ŋgba itùwà rzayi-rzayi nanù ema mɔ̀ à hwatɛ o hwèèmà hwe hwatò hwa ama Lohwɛ̀ o lì ŋgba màhwèyà ma gòòlù, o ètàwo ya gòòlù, eŋge ètàwo e ma hwɛ o worzo wo e konda ya lìkànèyà.

⁴Yùutùtù e ma hwɛ lì wurza o itùwà ema e aŋgèlì e ma tɛ̀tɛ̀, e ma hwɛ lì agba o ŋmanyu na maŋga màkanɛ̀ ema eŋge aŋgèlì e ma hwɛ lì kànɛlɛlɛ hwatò hwa ama Lohwɛ̀. Èŋge aŋgèlì e ma tɛ̀mɛ̀ o worzo wo ama Lohwɛ̀.

⁵Èŋge aŋgèlì rzìi e wowa eŋge ewoki ya gòòlù ema itùwà i ma onde o tenì, a e ondìrzɛ̀ na mùùnya ema mo ma uwɛ̀lɛ̀lɛ̀yi o ètàwo ya itùwà, rzìi a e koma o e rze ya mɔ̀nyɛ̀. Ène eyà e ma gbeyà e ŋmanyu yà lohwà e ma hwɛ lì kèhwa, mɔ̀tɔ̀wu mo a wurza, lìŋmɛti lì ma mɔ̀tɛ̀lɛ̀ mònyìŋgìrzɛ̀nɛ̀ hvɛ mo hwɛ.

⁶I aŋgèlì lìrzamba ema i ma ohva màwɔ̀ɔ̀mi lìrzàmba i ma wòŋgirzɛnɛ o lì tòŋga màŋga màwɔ̀ɔ̀mi.

⁷È aŋgèlì yà wòrzo e ma toŋga lìyɔ̀mi la eni. Aŋga ndi e mbuwà ya màŋyàyi na mùùnya emà ma mà hviyànɛlɛhwɛ na màyija mà ma wòteyà o lì komeya o rze yà mɔ̀nyɛ̀. Lòŋgo lɔ̀kɔ o tenì ya moŋgo mayàwò ma e rze ya mɔ̀nyɛ̀ lì ma rzeeya la arzɛ. Lòŋgo lɔ̀kɔ o tenì ya moŋgo mayàwo ma mayi na hweyàlì hwe arzɛ hwe ma rzèèya.

⁸È aŋgèlì ema e ma ùkirzɛ̀ ihwakɛ e ma tòŋga e la eni lìyɔ̀mi. Rzìi yoma ema e ma àyɛ̀kɛ̀nɛ̀ hvàko ndɛnɛ ema e ma hwɛ lì rzèèya e ma unda o ŋmànja. Lòŋgo lɔ̀kɔ o tenì ya moŋgo mayàwo la ŋmànja lì ma àyiŋgòwɛ̀ màyija.

⁹Lòŋgo lɔ̀kɔ o tenì ya moŋgo mayàwo ma hwèwèkelì hwe ŋmànja hwe ma ŋwa, ndèŋgànɛ̀lɛ̀ lòŋgo lɔ̀kɔ o tenì ya moŋgo mayàwo ma melì me ŋmànja ema me ma hwɛ o tenì ya moŋgo ŋmànja me ma hvaŋgeya.

¹⁰È aŋgèlì ema e ma ùkirzɛ̀ iyàwò e ma tòŋga lìyɔ̀mi la eni. Aŋga ndi rzombe ndɛnɛ ema e ma oŋwa nàa mòkàkò e ma uwɛ̀lɛ̀lɛ̀yi o ŋmanyu ya lìwòhwɛ là ŋmanyu rzìi e undeya lòŋgò lɔ̀kɔ o tenì ya moŋgo mayàwo ma meyorzo na hwètùŋgu hwe màlìhwa.

¹¹Lìinà la eŋge rzombe lì hwèlì ndi “Hvìyayi.” Lòŋgo lɔ̀kɔ o tenì ya moŋgo mayàwo la malìhwa lì ma ayèŋgowɛ̀ hvìyayi, ndèŋgànɛ̀lɛ̀ rzayi-rzayi ja hwatò hwà mà ŋwa na oma hwà mà nyɔ̀ɔ̀ maŋga malìhwa ema mà ma ayèŋgowɛ̀ hvìyayi.

¹²È aŋgèlì ema e ma ùkirzɛ̀ inɛyi yɔ hvɛ rzìi e tòŋga e la eni lìyɔ̀mi. Aŋga ndi yoma ya àyɛ̀rzɛ̀ɛ lòŋgò lɔ̀kɔ o tenì ya moŋgo mayàwo la igbèyi, ya àyɛ̀rzɛ̀ lòŋgo lɔ̀kɔ o tenì ya moŋgo mayàwo la ŋmɛ̀ɛlì, ndèŋgànɛ̀lɛ̀ ya àyɛ̀rzɛ̀ lòŋgo lɔ̀kɔ o tenì ya moŋgo mayàwo la irzombe. Ène eyà e ma gbeyà lòŋgo lɔ̀kɔ o tenì ya moŋgo mayàwo lì ma ayèŋgowɛ̀ jìtìtì, o rzi hwɛ tɔ̀ ŋmàye o tenì ya lòŋgò lɔ̀kɔ o tenì ya moŋgo màyàwo ma wùnyà, ndèŋgànɛ̀lɛ̀ o rzi hwɛ tɔ ŋmàye o tenì ya lòŋgo lɔ̀kɔ o tenì ya moŋgo mayàwo la wuu.

¹³Nà ma ɔ̀ŋgɔ, rzìi na ɛnɛ mbèŋgà ema e koohwa hvoo o ŋmanyu yà lìwòhwɛ̀ là ŋmanyu, rzìi eŋge mbèŋgà e ohwa na lìlo lì kàrzami nanù ema, “Mojema! Mojema! Mojema, mo o hwɛ na hwatò hwa arzɛ ema hwa lìya o rze ya mɔ̀nyɛ̀, o e hvonda ema inɛyi aŋgèlì jàyɛ jo o tòŋgɛ̀ màwɔ̀mi ma awu.”