Read Ариун Библи, Mongolian Ariun Bible, 2004 Эхлэл 11 Bible Online

Эхлэл 11 - Ариун Библи, Mongolian Ariun Bible, 2004 bible

Эхлэл 11

¹Бүх дэлхий нэг хэлтэй, нэг аялгуутай байлаа.

²Тэд дорно зүг уруу нүүж, Шинарын хөндий тал газрыг олж, тэндээ нутагшин суурьшжээ.

³Тэд бие биедээ-Тоосго цохиж, түүнийгээ бүрэн гүйцэд болтол нь шатаацгаая гэж хэлээд, чулууны оронд тоосго, шаврын оронд давирхай хэрэглэжээ.

⁴Тэгээд тэд-За, бид хот болон тэнгэрт тулам оройтой өндөр цамхаг барьж байгуулан, нэрээ алдаршуулцгаая. Эс тэгвээс бид бүх дэлхий дээр тарж бутрах болно гэж хэлэлцжээ.

⁵ЭЗЭН хүний хөвгүүдийн барьж байгуулсан хот ба цамхгийг үзэхээр бууж иржээ.

⁶ЭЗЭН айлдсан нь-Эдгээр хүмүүс нэг үндэстэн, бас нэг хэлтэн учир тэд үүнийг хийж эхэлсэн бөгөөд хойшид тэдний хийхээр төлөвлөсөн ямар ч зүйл тэдний хувьд боломжтой болно.

⁷Бид бууцгааж, тэдний хэлийг тэнд нь хутгалдуулан самууруулъя. Ингэснээр тэд бие биенийхээ яриаг ойлгохгүй болно гэжээ.

⁸Тэгээд ЭЗЭН тэднийг тэндээс бүх дэлхийгээр тараасанд тэд хот байгуулахаа зогсоожээ.

⁹ЭЗЭН тэнд бүх газар дэлхийн хэлийг хутгалдуулан самууруулсан учир түүнийг Бабел гэж нэрлэв. ЭЗЭН тэндээс тэднийг бүх дэлхий даяар тараалаа.

¹⁰Шемийн үр удам ийм болой. Шем зуун настайдаа буюу үер болсноос хойш хоёр жилийн дараа Арпахшадыг төрүүлжээ.

¹¹Тэрээр Арпахшадыг төрүүлснээс хойш таван зуу насалж, үр хүүхдүүдтэй болов.

¹²Арпахшад гучин таван настайдаа Шелаг төрүүлжээ.

¹³Тэрээр Шелаг төрүүлснээсээ хойш дөрвөн зуун гуч насалж, үр хүүхдүүдтэй болжээ.

¹⁴Шела гучин настайдаа Еберийг төрүүлэв.

¹⁵Тэрээр Еберийг төрүүлснээс хойш дөрвөн зуун гурав насалж, мөн л үр хүүхдүүдтэй болжээ.

¹⁶Ебер гучин дөрвөн настайдаа Пелегийг төрүүлэв.

¹⁷Тэрээр Пелегийг төрүүлснээс хойш дөрвөн зуун гуч насалж, үр хүүхдүүдтэй болжээ.

¹⁸Пелег гучин настайдаа Реуг төрүүлжээ.

¹⁹Реуг төрүүлснээс хойш тэрээр, хоёр зуун ес насалж, үр хүүхдүүдтэй болжээ.

²⁰Реу гучин хоёр настайдаа Серугийг төрүүлэв.

²¹Серугийг төрүүлснээс хойш тэрээр хоёр зуун долоо насалж, үр хүүхдүүдтэй болжээ.

²²Серуг гучин настайдаа Нахорыг төрүүлжээ.

²³Тэрээр Нахорыг төрүүлснээс хойш хоёр зуу насалж, үр хүүхдүүдтэй болжээ.

²⁴Нахор хорин есөн настайдаа Тераг төрүүлэв.

²⁵Тэрээр Тераг төрүүлснээс хойш зуун арван ес насалж, үр хүүхдүүдтэй болжээ.

²⁶Тера далан настайдаа Абрам, Нахор, Харан гурвыг төрүүлжээ.

²⁷Терагийн үр удам ийм болой. Тера нь Абрам, Нахор, Харан гурвыг төрүүлж, Харан нь Лотыг төрүүлжээ.

²⁸Харан нь эцэг Терагаас өмнө өөрийн төрсөн газар Халдеин Урт үхэв.

²⁹Тэгээд Абрам, Нахор хоёр эхнэр авцгаажээ. Абрамын эхнэр нь Сараи, Нахорын эхнэр нь Хараны охин Милка байв. Харан нь Милкагийн эцэг болон Искагийн эцэг болой.

³⁰Сараи хүүсэр эм байсан учир хүүхэдгүй байлаа.

³¹Тера хүү Абрам, өөрийн ач хүү болох Хараны хүү Лот болон өөрийн бэр, Абрамын эхнэр Сараи нарыг авч, хамтдаа Халдеин Ураас Канаан нутгийг зорин хөдлөөд, Харанд ирж, тэндээ суужээ.

³²Тера хоёр зуун тав наслаад, Харанд үхэв.