Read Ариун Библи, Mongolian Ariun Bible, 2004 Эхлэл 27 Bible Online

Эхлэл 27 - Ариун Библи, Mongolian Ariun Bible, 2004 bible

Эхлэл 27

¹Исаак хөгширч, хараа нь муудан, харж чадахаа больсон үедээ ууган хүү Есаваа-Хүү минь! гэж дуудсанд хүү нь-Би энд байна гэхэд

²Исаак-Би хөгширч, үхэх өдрөө мэдэхгүй байна.

³Тийм болохоор чи одоо зэвсэг, нум саадгаа авч, хээр талд гараад, миний төлөө ан хийж,

⁴миний дуртай амтат хоолыг хийж, надад авчирч идүүлэн, үхэхээс минь өмнө зүрх сэтгэлээр минь өөрийгөө ерөөлгө гэв.

⁵Исаакийг хүү Есавдаа үг хэлж байхад нь Ребека түүнийг нь сонсож байжээ. Есав ан хийхээр хээр тал уруу одов.

⁶Ребека өөрийн хүү Иаковт-Чиний ах Есавд аавын чинь хэлсэн үгийг би сонслоо.

⁷Надад ангийн мах авчирч, амттай хоол хийж, надад идүүлэн, үхэхээс минь урд ЭЗЭНий өмнө өөрийгөө ерөөлгө гэж байна.

⁸Тиймээс хүү минь, одоо миний чамд тушааж хэлэх үгийг сонс!

⁹Чи мал дээрээ очоод хоёр сайн ишиг надад авчирвал би түүгээр аавын чинь дуртай сайхан хоолыг хийж өгье.

¹⁰Чи түүнийг аавдаа аваачиж өгөөд идүүлэн, үхэхийнх нь өмнө түүгээр ерөөлгө гэв.

¹¹Иаков эх Ребекадаа-Миний ах Есав бол үсэрхэг хүн, би гөлгөр арьстай хүн.

¹²Аав минь намайг тэмтэрч үзвэл би түүний нүдэнд мэхлэгч гэж үзэгдэн, ерөөгдөх нь байтугай хараагдах болно гэв.

¹³Эх нь түүнд-Хүү минь, чамд ирэх чиний хараалыг надад оноог. Харин чи зөвхөн миний үгэнд орж, яваад ишигнүүдийг надад авчирч өг гэсэнд,

¹⁴Тэр одож, түүнийг авч, ээждээ авчирч өгөв. Тэгээд ээж нь эцгийнх нь дуртай сайхан хоолыг хийжээ.

¹⁵Ребека гэртээ байсан ууган хүү Есавынхаа хамгийн сайхан хувцсыг авч, бага хүү Иаковтаа өмсгөж,

¹⁶ишигний арьсаар гар болон хүзүүний нь гөлгөр хэсгийг ороожээ.

¹⁷Өөрийн хийсэн амтат хоол, талхыг хүү Иаковт өгөв.

¹⁸Иаков эцэг дээрээ очиж, -Аав минь ээ! гэж дуудсанд аав нь-Би энд байна. Хүү минь чи хэн бэ? гэж хэлэхэд

¹⁹Иаков эцэгтээ хандан-Би таны ууган хүү Есав байна. Би таны надад хэлсэн ёсоор хийлээ. Та өндийж суугаад, миний агнасан ангийн махнаас зооглож, зүрх сэтгэлээсээ намайг ерөөж өгнө үү? гэсэнд

²⁰Исаак өөрийн хүүдээ-Хүү минь, чи яасан хурдан агнасан юм бэ? гэхэд тэр-Учир нь таны Бурхан ЭЗЭН түүнийг надтай саадгүй учруулсан юм гэж хариулав.

²¹Исаак Иаковт хандаж-Хүү минь, наашаа ойртож ир! Үнэхээр чи миний ууган хүү Есав мөн үү, биш үү гэдгийг чинь би тэмтэрч үзье гэжээ.

²²Иаков эцэг Исаактаа ойртон очиход Исаак түүнийг тэмтэрч-Дуу чинь Иаковын дуу атал, гар чинь Есавын гар байна гээд,

²³түүний гар нь ах Есавынх шиг үсэрхэг байсан учир түүнийг ялгаж таньсангүй ерөөжээ.

²⁴Тэгээд Исаак-Чи үнэхээр миний хүү Есав мөн үү? гэсэнд Иаков-Тийм ээ гэжээ.

²⁵Исаак-Надад агнасан ангийн махаа авчир! Би хүүгийнхээ агнасан ангийн махнаас идээд, зүрх сэтгэлээрээ чамайг ерөөн адислая! гэхэд Иаков түүнд авчирч, тэр идэв. Тэгээд тэр бас түүнд дарс авчирч өгсөнд, тэрээр уужээ.

²⁶Тэгээд эцэг Исаак нь-Хүү минь, наашаа дөхөж ирээд, намайг үнс гэхэд

²⁷Иаков ойртон очиж, түүнийг үнссэнд эцэг нь хувцсыг нь үнэртээд, түүнийг ерөөн адислаж, -Миний хүүгийн үнэр нь ЭЗЭНий ерөөсөн хээрийн үнэр байна.

²⁸Бурхан чамд тэнгэрийн шүүдэр, Газрын баялаг, Арвин их үр тариа, Дарс хайрлах болтугай!

²⁹Ард олон чамд зарагдаж, Үндэстнүүд чамд сөгдөн мөргөх болтугай!Чи ах дүү нарынхаа эзэн болж, Эхийн чинь хөвгүүд чамд мөргөн сөгдөж, Чамайг хараасан нь хараалд идэгдэж, Чамайг ерөөсөн нь ерөөгдөх болтугай! хэмээв.

³⁰Исаак Иаковыг ивээн адислаж дуусмагц, Иаков эцэг Исаакийн өмнөөс босоод гарч явсны дараа, түүний ах Есав ангаасаа буцаж ирээд,

³¹амтат хоол хийж, түүнийгээ эцэгтээ аваачаад, -Эцэг минь ээ, өндийж суугаад, хүүгийнхээ агнасан ангийн махнаас идэж, зүрх сэтгэлээрээ намайг ерөөн адислана уу? гэжээ.

³²Эцэг Исаак нь-Чи хэн бэ? гэж түүнээс асуухад-Би таны хүү, таны ууган хүү Есав байна гэжээ.

³³Исаак ихэд цочирдон-Тэгвэл надад ангийн мах авчирч өгсөн тэр хүн хэн бэ? Би чамайг ирэхээс өмнө бүгдийг нь идээд, түүнийг ерөөсөн билээ. Тэр л гарцаагүй ерөөгдөх болно гэв.

³⁴Есав эцгийнхээ үгийг сонсоод, бархиран уйлж, эцэгтээ-Эцэг минь, намайг ерөөн адислаач! Намайг ч бас тэгээч! гэсэнд

³⁵Исаак-Чиний дүү залилан ирж, чиний ерөөлийг авчихжээ гэж хэлсэнд

³⁶Есав-Түүнийг Иаков гэж нэрлэдэг нь оносон бус уу? Түүний намайг мэхэлсэн нь хоёр дахь удаагаа боллоо. Тэрээр ууган хүү байх миний эрхийг авчихаад, одоо бас надад оногдох ерөөлийг авчихлаа гэж хэлээд-Надад хүртээх ерөөл адис танд үлдээгүй гэж үү? гэсэнд

³⁷Исаак Есавд хариулж, -Би түүнийг чиний эзэн болгож, бүх ах дүү нарыг чинь түүнд зарцаар өгч, бас үр тариа, дарсаар түүнийг хангасан учир хүү минь би чамдаа юу хийж өгч чадах билээ гэв.

³⁸Есав эцэгтээ хандаж-Эцэг минь ээ! Танд ганцхан л ерөөл адис байдаг юм уу? Эцэг минь ээ, намайг ерөөн адислаач. Намайг ч бас тэгээч! гэж хэлээд чангаар уйлав.

³⁹Түүний эцэг Исаак түүнд хандаж-Чиний суух газар бол газрын баялгаас хол, Тэнгэрийн шүүдрээс хол юм.

⁴⁰Чи сэлмээрээ амьдарч, дүүдээ зарагдана. Хэзээ чи уяанаасаа тайлагдана, Тэр цагт чи түүний буулгыг хүзүүн дээрээсээ авч хаяна гэжээ.

⁴¹Эцэг нь Иаковыг ерөөсөн тэр ерөөлөөс болж, Есав Иаковыг үзэн ядаж, өөрөө өөртөө “Эцгийнхээ төлөө эмгэнэх өдөр ойрхон ирж байгаа учир би дүү Иаковаа ална” гэж хэлжээ.

⁴²Ууган хүү Есавын нь энэ үг Ребекад хүрэхэд бага хүү Иаковтаа хэл явуулж, дуудан ирүүлээд, -Есав ах чинь чамайг ална гэж төлөвлөн өөрийгөө тайтгаруулж байна.

⁴³Тийм учраас одоо хүү минь, чи миний үгийг даган босож, Харанд байгаа миний ах Лабан уруу зугтан очоод,

⁴⁴ахынхаа уурыг гартал, хэдэн өдөр түүнтэй хамт бай.

⁴⁵Ахын чинь уур гарч, өөрт нь хийсэн зүйлийг чинь мартвал би чамд хэл явуулж дуудан, чамайг тэндээс авчиръя. Яалаа гэж би та хоёрыг нэг өдөр алдах билээ гэв.

⁴⁶Ребека Исаакт хандан-Би хитчүүдийн охидоос болж амьдрах дургүй боллоо. Хэрэв Иаков түүн шиг энэ нутгийн охидоос, хитчүүдийн охидоос эхнэр авбал миний амьдрал юу болохсон билээ? гэв.