Read Ариун Библи, Mongolian Ariun Bible, 2004 Эхлэл 29 Bible Online

Эхлэл 29 - Ариун Библи, Mongolian Ariun Bible, 2004 bible

Эхлэл 29

¹Иаков цааш хөдлөн, дорнын хүмүүсийн нутагт хүрчээ.

²Тэрээр харвал, талд нэгэн худаг байх ба дэргэд нь гурван хэсэг хонин сүрэг хэвтэж байв. Учир нь хоньчид тэр худгаас хонио усалдаг ажээ. Худгийнхаа амыг чулуугаар дараад,

³бүх сүргийг цуглах үед худгийн амнаас чулууг өнхрүүлэн зайлуулж, хонио услаад, дараа нь уг чулуугаа худгийн амсар дээр буцаан тавьдаг байжээ.

⁴Иаков тэдэнд хандаж-Ах дүү нар минь, та нар хаанаас ирсэн бэ? гэж асуусанд тэд-Бид Харанаас ирсэн гэжээ.

⁵Иаков тэднээс-Та нар Нахорын ач хүү Лабаныг таних уу? гэхэд тэд-Бид түүнийг мэднэ гэв.

⁶Иаков тэднээс-Тэр сайн уу? гэж асуусанд тэд-Сайн. Түүний охин Рахел одоо хонио туугаад ирнэ гэж хариулав.

⁷Иаков-Өдөр яагаа ч үгүй байна. Хонин сүрэг цуглах цаг болоогүй байна. Хонио услаад, бэлчээрт гарга гэв.

⁸Тэд-Бид чадахгүй. Бүх сүргийг цуглахаар хоньчид худгийн амсраас чулууг өнхрүүлэн зайлуулаад, бид хонио усалдаг гэв.

⁹Иаковыг тэдэнтэй ярьж байхад, Рахел эцгийнхээ хонийг тууж ирэв. Тэрээр хоньчин байжээ.

¹⁰Иаков нагац ах Лабаны охин Рахел болон нагац ах Лабаны хонийг хараад ойртон очиж, худгийн амнаас чулууг өнхрүүлэн зайлуулж, нагац ах Лабаны хонин сүргийг услав.

¹¹Тэгээд Иаков Рахелыг үнсээд, чанга дуугаар уйлан,

¹²Рахелд өөрийгөө эцгийнх нь дүү Ребекагийн хүү гэдгээ хэлсэнд тэрээр гүйн явж, эцэгтээ хэлэв.

¹³Лабан охин дүүгийнхээ хүү Иаковын тухай сонсоод, түүнтэй уулзахаар гүйн очиж, тэврэн, үнсээд, гэртээ дагуулан оров. Иаков өөрийнхөө тухай бүгдийг Лабанд ярьж өгчээ.

¹⁴Лабан түүнд-Чи бол яах аргагүй миний мах цусны тасархай мөн гэв. Тэгээд Иаков түүнтэй нэг сар хамт суужээ.

¹⁵Лабан Иаковт-Чи миний дүү боловч, чи надад ажил хийж өгөхдөө хөлсгүй хийх ёстой гэж үү? Юугаар чамд хөлс төлөх вэ? Надад хэлээч! гэв.

¹⁶Лабан хоёр охинтой бөгөөд томынх нь нэр Леа, багынх нь нэр Рахел болой.

¹⁷Леа хараа муутай, харин Рахел нь үзэсгэлэнтэй, гоолиг ажээ.

¹⁸Иаков Рахелд дурласан тул-Би таны бага охин Рахелын төлөө долоон жил танд зарцлагдъя гэсэнд

¹⁹Лабан-Түүнийг өөр хүнд өгснөөс чамд өгсөн нь дээр. Надтай хамт бай гэжээ.

²⁰Иаков Рахелын төлөө долоон жил Лабанд зарагджээ. Иаков түүнд хайртай байсан тул долоон жил нь түүнд хэдхэн хоног мэт санагджээ.

²¹Иаков Лабанд-Миний хугацаа дууссан учир эхнэрийг минь надад өгөөч. Би түүн дээр оръё гэжээ.

²²Лабан тэр нутгийн бүх хүмүүсийг цуглуулан найр хийв.

²³Үдэш нь Лабан охин Леагаа Иаковт авчирсанд, Иаков түүн дээр оржээ.

²⁴Лабан өөрийн зарц бүсгүй Зилпаг охин Леадаа шивэгчин болгон өгчээ.

²⁵Иаков өглөө нь хартал тэр нь Леа байв. Тэгээд тэрээр Лабанд-Та надад яагаад ингэсэн бэ? Би Рахелын төлөө танд зарцлагдсан биш үү? Та юунд намайг мэхэлсэн бэ? гэхэд

²⁶Лабан-Манай нутагт эгчээс нь түрүүлж дүүг нь өгөх ёс байхгүй.

²⁷Үүний төлөө долоо хоногийг гүйцээ. Тэгээд бид чамд Рахелыг нь ч өгнө. Чи түүний төлөө надад дахин долоон жил зарцлагдах болно гэжээ.

²⁸Тэгээд Иаков хэлсэн ёсоор нь хийжээ. Иаков тэр долоо хоногийг гүйцээсэнд, Лабан түүнд өөрийн охин Рахелыг ч эхнэр болгон өгчээ.

²⁹Лабан өөрийн зарц бүсгүй Билхаг охин Рахелдаа шивэгчнээр өгчээ.

³⁰Иаков бас Рахел дээр орж, түүнийг Леагаас илүү хайрлан, дахин долоон жил Лабанд зарцлагджээ.

³¹ЭЗЭН Леаг нөхрөөсөө хайр хишиг хүртээгүйг үзээд, Леагийн умайг нээв. Харин Рахел нь үргүй байжээ.

³²Леа жирэмсэлж, хүү төрүүлээд, түүнийгээ Реубен гэж нэрлэжээ. Тэгээд тэрээр-ЭЗЭН миний зовлонг харсан учир одоо миний нөхөр намайг хайрлах болно гэж хэлжээ.

³³Тэр бас дахин жирэмсэлж, хүү төрүүлээд, -ЭЗЭН миний хайр хишиг хүртээгүйг сонсоод, энэ хүүг бас надад өглөө гээд түүнийгээ Симеон гэж нэрлэжээ.

³⁴Тэр бас жирэмсэлж, дахин хүү төрүүлж, -Би түүнд гурван хүү төрүүлж өгсөн учир миний нөхөр одоо надад татагдах болно гээд түүнийгээ Леви гэжээ.

³⁵Тэр бас жирэмсэлж, дахин хүү төрүүлээд-Энэ удаа би ЭЗЭНийг магтана гээд түүнийгээ Иуда гэжээ. Тэгээд түүний хүүхэд төрүүлэх нь зогсжээ.