Read Ариун Библи, Mongolian Ariun Bible, 2004 2 Самуел 9 Bible Online

2 Самуел 9 - Ариун Библи, Mongolian Ariun Bible, 2004 bible

2 Самуел 9

¹Дараа нь Давид-Саулын гэрээс амьд үлдсэн хүн байхгүй юу? Би Ионатаны төлөө тэр хүнд энэрэл үзүүлэх юмсан гэв.

²Зиба гэдэг нэртэй, Саулын гэрийн зарц байсан бөгөөд түүнийг Давид дээр дуудаж ирүүлэв. Хаан түүнээс-Чи Зиба мөн үү? гэхэд тэр-Таны боол би байна гэв.

³Хаан-Саулын гэрээс хэн нэгэн нь үлдээгүй юу? Би түүнд Бурханы энэрлийг үзүүлмээр байна гэв. Зиба хаанд-Ионатаны хөлгүй хүү нь бий гэв.

⁴Хаан түүнээс-Тэр хаана байна? гэж асуухад Зиба хаанд-Ло-дебарт байдаг Аммиелын хүү Махирын гэрт байгаа гэж хариулав.

⁵Тэгээд Давид хаан хүн илгээн, Ло-дебараас Аммиелын хүү Махирын гэрээс түүнийг авчруулав.

⁶Саулын ач, Ионатаны хүү Мефибошет Давид дээр ирж, нүүрээрээ газар унан мөргөв. Давид-Мефибошет гэхэд тэр-Таны боол би энд байна гэв.

⁷Давид түүнд-Бүү эмээ! Би чиний эцэг Ионатаны төлөө чамд энэрлийг заавал үзүүлж, чиний өвөг эцэг Саулын бүх газрыг чамд эргүүлж өгнө. Чи миний ширээнд тогтмол хооллох болно гэв.

⁸Мефибошет дахин мөргөн-Үхсэн нохой мэт боол би чинь хэн болоод таны халамжийг хүртэнэ вэ? гэв.

⁹Тэгэхэд Саулын боол Зибаг хаан дуудаж, -Саулд болон түүний бүхэл гэрт харьяалагдах хамаг юмыг би чиний эзний ач хүүд өглөө.

¹⁰Танай эзний ач хүү хоол хүнстэй золгохын тулд чи өөрөө хөвгүүд болон боолуудтайгаа түүнд зориулан газрыг хагалж, үр жимсийг нь авчирч өгч бай. Гэлээ ч эзний чинь ач хүү Мефибошет миний ширээнд тогтмол хооллох болно гэв. Зиба арван таван хөвгүүн, хорин боолтой ажээ.

¹¹Тэгэхэд Зиба хаанд-Хаан эзний минь боолдоо тушаасан бүгдийн дагуу боол тань гүйцэтгэх болно гэв. Ингээд Мефибошет хааны хөвгүүдийн нэг адил Давидын ширээнд хооллох болов.

¹²Мефибошетод Миха хэмээх нэртэй балчир хөвгүүн байв. Зибагийн гэрт амьдардаг бүгд Мефибошетын зарц нар болов.

¹³Ингээд Мефибошет хааны ширээнд тогтмол хооллодог байсан тул Иерусалимд амьдрав. Тэр хоёр хөлгүй байв.