Read Ариун Библи, Mongolian Ariun Bible, 2004 Дуулал 102 Bible Online

Дуулал 102 - Ариун Библи, Mongolian Ariun Bible, 2004 bible

Дуулал 102

¹Шаналж, гомдлоо ЭЗЭНий өмнө уудлах үеийн зовлонт хүний залбирал. Өө, ЭЗЭН, миний залбирлыг сонсооч!Миний тусламж гуйсан хашхиралт Танд хүрэг.

²Зовлон бэрхшээлийн минь өдөр надаас нүүрээ бүү нуугаач. Над уруу чихээ хандуулаач. Миний дуудах өдөр надад хурдан хариулаач.

³Учир нь миний өдрүүд утаа шиг замхарсан бөгөөдЯснууд минь ч цуцал мод шиг шатсан.

⁴Зүрх минь зүлэг ногоо шиг ширх хорхойд баригдаж, хагдарсан. Би талхаа идэхээ ч үнэхээр мартсан.

⁵Ёолох дууны минь чангаас болжЯс минь маханд минь наалдав.

⁶Би хээр талын хотон шувуутай ижилссэн. Би зэлүүд нутгийн шар шувуу шиг болсон.

⁷Би сэрүүн хэвтдэг, Би дээвэр дээрх ганцаардсан шувуу шиг болсон.

⁸Миний дайснууд намайг өдөржингөө буруутгасан. Надад хорссон хүмүүс миний нэрийг хараалд ашигласан.

⁹Учир нь би үнсийг талх шиг идэж, Уух усаа нулимстайгаа хольсон нь

¹⁰Таны зэвүүцэл болон Таны хилэнгээс болсон юм. Учир нь Та намайг дээш өргөөд, шидсэн.

¹¹Миний өдрүүд уртассан сүүдэр шиг бөгөөдБи өвс шиг гандан хатаж байна.

¹²Харин ЭЗЭН Та мөнхөд оршдог, Таны нэр ч үеийн үед байдаг.

¹³Та босож, Сионыг өрөвдөнө. Учир нь түүнийг нигүүлсэх цаг одоо ирлээ, Тогтоосон цаг ирлээ.

¹⁴Таны зарц нар түүний чулуунд үнэхээр баярлаж, Түүний тоос шороог ч өрөвддөг.

¹⁵Ингээд үндэстнүүд ЭЗЭНий нэрээс, Дэлхийн бүх хаад Таны алдраас эмээнэ.

¹⁶Учир нь ЭЗЭН Сионыг босгон байгуулжээ. Тэр Өөрийн цог жавхлангийн дунд үзэгдсэн.

¹⁷Тэрээр үгээгүйчүүдийн залбирлыг хүлээн авч, Тэдний залбирлыг жигшдэггүй.

¹⁸Хожим бүтээгдэх хүмүүс ЭЗЭНийг магтахын тулдЭнэ нь ирэх үеийнхний төлөө бичигдэнэ.

¹⁹Учир нь Тэр Өөрийн ариун өндөрлөгөөс харсан. Тэнгэрээс ЭЗЭН газар дэлхийг ширтсэн.

²⁰Энэ нь хоригдлын ёолохыг сонсож, Үхлийн ял авсан хүмүүсийг чөлөөлөхийн тулд юм.

²¹Ингэснээр Сионд ЭЗЭНий нэрийг, Иерусалимд Түүний магтаалыг

²²Хүмүүсийг хамтдаа ирж, ЭЗЭНд үйлчлэхээр хаанчлалуудыг цуглахад тунхаглах ажгуу.

²³Тэрээр зам зуур миний хүч чадлыг сулруулсан. Тэр миний өдрүүдийг богиносгосон.

²⁴Би “Бурхан минь ээ, өдрүүдийн минь дундаас намайг бүү аваач. Таны жилүүд үеийн үед байдаг юм.

²⁵Та эрт үед газар дэлхийн суурийг тавьсан. Тэнгэрүүд ч Таны гарын бүтээл юм.

²⁶Тэд ч сөнөнө, харин Та мөнх оршино. Тэдгээр нь бүгд өмсгөл шиг элэгдэнэ. Хувцас шиг Та тэднийг солих бөгөөд тэд ч солигдоно.

²⁷Гэвч Та хэвээрээ болоодТаны он жилүүд төгсөхгүй.

²⁸Таны зарц нарын үр хүүхдүүд үргэлжлүүлэн амьдарч, Тэдний үр удмууд Таны өмнө бат зогсоно” гэдэг.