Read Ариун Библи, Mongolian Ariun Bible, 2004 Дуулал 104 Bible Online

Дуулал 104 - Ариун Библи, Mongolian Ariun Bible, 2004 bible

Дуулал 104

¹Сэтгэл минь ээ, ЭЗЭНийг магтагтун. Миний Бурхан ЭЗЭН Та бол агуу их юм. Та цог жавхлан, сүр хүчээр хувцасласан.

²Тэгэхдээ хувцас өмсдөгийн адил Өөртөө гэрлийг өмсөж, Тэнгэрийг хөшиг шиг татдаг.

³Тэр Өөрийн дээд тасалгааны тулгуурыг усан дотор тавьдаг. Тэрээр үүлсийг Өөрийн тэрэг болгон хөлөглөдөг. Тэрээр салхины жигүүрээр явдаг.

⁴Тэрээр салхийг Өөрийн элч, Галын дөлийг Өөрийн үйлчлэгч болгодог.

⁵Үүрд мөнхөд гуйвуулж дайвуулахгүйн тулдТэрээр газар дэлхийг суурин дээр нь тогтоон тавьсан.

⁶Та түүнийг хувцсаар халхлахын адил гүнээр бүрхсэн. Их ус уулсын дээр байлаа.

⁷Таны зэмлэлээс тэд зугтаж, Таны аянгын дуунаас тэд зайлан одсон.

⁸Уулс өргөгдсөн. Хөндий талуудТаны тэдэнд оноож тогтоосон газар уруу доош суусан.

⁹Тэднийг газрыг бүрхэхээр буцаж ирүүлэхгүйн тулд, Тэднийг халиулахгүйн тулд Та их усны хязгаарыг тогтоосон юм.

¹⁰Тэрээр хөндийд булаг оргилуулдаг. Тэдгээр нь уулсын дундуур урсдаг.

¹¹Тэдгээр нь хээр талын араатан амьтан бүрийг ундаалж, Хулангуудын цангааг ч тайлдаг.

¹²Тэдгээрийн дэргэд огторгуйн шувууд нутагшиж, Мөчрүүдийн дунд дуулан жиргэдэг.

¹³Тэр Өөрийн дээд тасалгаанаас уулсыг усалдаг. Түүний үйлсийн үр жимсэнд газар дэлхий хангалуун байдаг.

¹⁴Тэрээр мал сүрэгт зориулан өвсийг, Хүний хөдөлмөрт зориулан хүнсний ногоог ургуулдаг. Энэ нь түүгээр газар шорооноос хүнсийг болон

¹⁵Хүний зүрхийг баясгадаг дарсыг, Нүүрийг өнгөлдөг тосыг болонХүний зүрхийг тэнхрүүлдэг хоол хүнсийг гаргуулахын тулд юм.

¹⁶ЭЗЭНий модод, Түүний тарьсан Ливаны хуш модод арвин ихээр ундаалдаг юм.

¹⁷Тэнд шувууд болонНарс модыг оромж болгодог өрөвтас ч үүрээ засдаг.

¹⁸Өндөр уулс янгирт зориулагдсан. Хадан цохио доргоны хоргодох газар болдог.

¹⁹Тэрээр цаг хугацааг заахаар сарыг бүтээсэн. Нар ч шингэх газраа мэддэг.

²⁰Та харанхуйг томилсонд тэр нь шөнө болдог. Тэгэхэд ойн бүх араатан амьтад хэсэн явдаг.

²¹Залуу арслангууд идэшнийхээ хойноос архирч, Бурханаас хүнсээ гуйдаг.

²²Нар мандахад тэд буцаж, Агуйнууддаа очин хэвтдэг.

²³Хүн ч ажиллахаар, Үдэш болтол хөдөлмөрлөхөөр гардаг.

²⁴Өө, ЭЗЭН, Таны үйлс хичнээн их вэ!Мэргэн ухаанаар Та тэд бүхнийг бүтээсэн. Газар дэлхий Таны баялгаар дүүрэн юм.

²⁵Агуу, өргөн далай байдаг бөгөөдТэнд тоо томшгүй олон мөлхөгчид буюуТом, жижиг амьтад бий.

²⁶Тэнд усан онгоцнууд нааш цааш явдаг бөгөөдТэнд тоглож байхаар Таны бүтээсэн Левиатан ч бий.

²⁷Тогтоосон цагт нь хоол хүнсийг нь өгөхийг таньТэд бүгд хүлээж байдаг.

²⁸Таныг тэдэнд өгвөл тэд түүж авдаг. Таныг мутраа дэлгэхэд тэд сайн сайханд ханадаг.

²⁹Таныг нүүрээ нуухад тэд хямардаг. Таныг тэдний амьсгалыг авахад тэд үхэж, Хөрс шороондоо буцдаг.

³⁰Та Өөрийн Сүнсийг илгээхэд тэд бүтээгддэг. Тэгээд Та газрын өнгө төрхийг шинэчилдэг.

³¹ЭЗЭНий алдар мөнхөд байх болтугай. ЭЗЭН Өөрийн үйлсэд баярлах болтугай.

³²Түүнийг газар дэлхий уруу харахад тэр нь чичирдэг. Түүнийг уулсад хүрэхэд тэдгээр нь утаа гаргадаг.

³³Би амьдрах хугацаандаа ЭЗЭНд дуу дуулна. Би амьд байхдаа Бурханаа магтан дуулна.

³⁴Миний бясалгалууд Түүнд тааламжтай байх болтугай. Би ЭЗЭНий дотор баярлах болно.

³⁵Нүгэлтнүүд газар дэлхийгээс зайлуулагдаж, Хорон муу хүмүүс байхгүй болог. Сэтгэл минь ээ, ЭЗЭНийг магтагтун. ЭЗЭНийг магтагтун.