Read Ариун Библи, Mongolian Ariun Bible, 2004 Дуулал 46 Bible Online

Дуулал 46 - Ариун Библи, Mongolian Ariun Bible, 2004 bible

Дуулал 46

¹Найрал дууны удирдаачид. Аламотод тааруулсан, Корагийн хөвгүүдийн дуулал. Дуу. Бурхан бол бидний хоргодох газар болон хүч чадал, Зовлон дундах бодит тусламж юм.

²Тиймээс газар дэлхий өөрчлөгдөхөд ч, уулс далайн гүн уруу нуран ороход ч бид айхгүй.

³Ус хүржигнэн хүрхэрч, Уулс бардамналд нь ганхан чичрэвч айхгүй.

⁴Бурханы хот буюу Хамгийн Дээд Нэгэний ариун оршихуйг баясгадаг урсгалтай гол байдаг.

⁵Бурхан түүний голд оршин байгаа бөгөөд тэр нь ганхахгүй. Бурхан түүнд үүрийн гэгээнээр тусална.

⁶Улс үндэстнүүд түрхэрч, хаанчлалууд ганхав. Түүнийг дуугарсанд газар хайлав.

⁷Түмэн цэргийн ЭЗЭН бидэнтэй хамт. Иаковын Бурхан бол бидний хүчит цайз юм.

⁸Ирж, Бурханы үйлсийг харагтун. Тэрээр газар дэлхийг сүйрүүлсэн.

⁹Тэрээр дэлхийн хязгаарт хүртэл дайныг зогсоодог. Тэр нумыг хугалан, жадыг хоёр хэсэгт хуваадаг. Тэрээр тэрэгнүүдийг галдан шатаадаг.

¹⁰Тэмцэлдэхээ больж, намайг Бурхан гэдгийг мэд. Би улс үндэстнүүдийн дунд өргөмжлөгдөнө, Би дэлхийд өргөмжлөгдөнө.

¹¹Түмэн цэргийн ЭЗЭН бидэнтэй хамт. Иаковын Бурхан бол бидний хүчит цайз.