Read Ариун Библи, Mongolian Ariun Bible, 2004 Дуулал 55 Bible Online

Дуулал 55 - Ариун Библи, Mongolian Ariun Bible, 2004 bible

Дуулал 55

¹Найрал дууны удирдаачид. Утсан хөгжмөн дээр. Давидын Маскил. Бурхан, залбиралд минь чих тавиач. Намайг гуйхад бүү нуугдаач.

²Намайг анхааран сонсож, надад хариулаач. Би гомдол дотроо шаналж, үнэхээр санаа алдаж байна.

³Энэ нь дайсны дуу болонХорон муу хүний дарамтаас болсон болой. Учир нь тэд надад хор хөнөөл авчирдаг бөгөөдУур дотор тэд намайг үзэн яддаг.

⁴Миний дотор зүрх минь шимширч, Үхлийн аюулууд ч намайг нөмөрсөн.

⁵Айдас, чичрэл надад ирж, Би аймшигт автжээ.

⁶“Би тагтаа шиг жигүүртэй байсан ч болоосой!Тэгвэл би зайлан нисэж, амрахсан.

⁷Харагтун, би алс хол дайжиж, Цөлд саатан суух байсан.

⁸Би хуй салхи, шуурганаасХоргодох газар уруугаа яаран очих байсан” гэж би хэлэв.

⁹Би хотод хүчирхийлэл болон маргааныг харсан учирҮймүүлээч, Эзэн, тэдний хэлүүдийг хутгалдуулаач.

¹⁰Тэд өдөр, шөнөгүй хэрмэн дээгүүр нь тойрон явдаг бөгөөдТүүний дотор гэм буруу болон худал байдаг.

¹¹Түүний дотор сүйрэл бий. Дарлал болон мэхлэл гудамжнаас нь салдаггүй.

¹²Учир нь энэ бол намайг доромжилдог миний дайсан биш билээ. Тийм байсан бол би тэсэхсэн. Мөн энэ нь миний эсрэг өөрийгөө өргөмжилдөг намайг үзэн ядагч ч биш. Тийм байсан бол би түүнээс нуугдахсан.

¹³Гэвч энэ бол надтай нэг зиндаатай хүн болох чи, Миний анд нөхөр бөгөөд миний дотнын найз билээ.

¹⁴Бид хамтдаа амттай яриа дэлгэж, Бурханы өргөөнд олон хүмүүсийн дундуур алхаж байсан.

¹⁵Тэдэн дээр үхэл гэнэт ирэг. Тэд Үхэгсдийн орон уруу амьдаараа яваг. Учир нь бузар муу нь тэдний амьдардаг газар, тэдний дунд байна.

¹⁶Би Бурханыг дуудаж, ЭЗЭН намайг аварна.

¹⁷Үдэш, өглөө болон үд дунд ч би гомдоллон, үглэх бөгөөдТэрээр дууг минь сонсоно.

¹⁸Надтай тэмцэлдэгч тэд олон учраасТэр сэтгэлийг минь миний эсрэг буй тулалдаанаас амар тайвнаар аварна.

¹⁹Эртнээс сэнтийд залран буй нэгэн болохБурхан сонсоод тэдэнд хариулна. Тэд өөрчлөгддөггүй бөгөөд Бурханаас эмээдэггүй.

²⁰Тэр өөртэй нь амар тайван байгчдын эсрэг гараа сунгажээ. Тэр өөрийн гэрээг зөрчжээ.

²¹Түүний яриа цөцгийн тосноос ч ялдам байсан, Харин зүрхэнд нь дайсагнал байв. Түүний үгс тосноос ч уян зөөлөн байсан, Гэвч тэд сугалсан илд мэт байв.

²²Ачаагаа ЭЗЭНд даатга, Тэр чамайг өмгөөлнө. Зөв шударгыг ганхахыг Тэр хэзээ ч зөвшөөрөхгүй.

²³Харин ч, Бурхан, Та тэднийг сүйрлийн нүхэнд унагана. Цус урсгагч, мэхлэгч хүмүүс насныхаа хагасыг ч наслахгүй. Харин би Танд итгэх болно. Дуулал