Read Ариун Библи, Mongolian Ariun Bible, 2004 Дуулал 89 Bible Online

Дуулал 89 - Ариун Библи, Mongolian Ariun Bible, 2004 bible

Дуулал 89

¹Езра хүн Еданы маскил. Би ЭЗЭНий хайр энэрлийн тухай мөнхөд дуулна. Бүх үеийнхэнд би Таны итгэлтэй байдлыг амаараа мэдүүлнэ.

²Учир нь би “Хайр энэрэл мөнхөд байгуулагдана. Та Өөрийн итгэлтэй байдлыг тэнгэрүүд дээр тогтооно” гэв.

³“Би Өөрийн сонгосон нэгэнтэй гэрээ байгуулсан. Би Өөрийн зарц Давидад тангарагласан,

⁴Би чиний үрийг мөнхөд тогтоож, Чиний хаан ширээг бүх үеийнхэнд байгуулна”.

⁵Өө, ЭЗЭН, тэнгэрүүд Таны гайхамшгуудыг магтана. Мөн ариун хүмүүсийн чуулганд Таны итгэлтэй байдлыг ч магтана.

⁶Учир нь тэнгэрт хэнийг ЭЗЭНтэй харьцуулж болох вэ?Чадалтнуудын хөвгүүдийн дундаас хэн нь ЭЗЭНтэй адил вэ?

⁷Тэр бол ариун хүмүүсийн чуулганд агуугаар эмээгдэх Бурхан, Өөрийг нь тойрч буй бүхнээс илүү сүрдэм юм.

⁸Түмэн цэргийн Бурхан ЭЗЭН, хэн Тантай адил вэ, хүчит ЭЗЭН?Таны итгэлтэй байдал ч Таныг тойрон байдаг.

⁹Та далайн догшролтыг захирдаг. Давалгаанууд нь босоход Та номхруулдаг.

¹⁰Та Өөрөө Рахабыг алагдсан хүн шиг бяц дарсан. Та Өөрийн дайснуудыг хүчит мутраараа тараасан.

¹¹Тэнгэрүүд бол Таных, газар ч бас Таных. Ертөнц ба түүнийг бүрдүүлж буй бүхнийг Та байгуулсан.

¹²Өмнөд ба умардыг Та бүтээсэн. Табор ба Хермон Таны нэрд баяртайгаар хашхирдаг.

¹³Та хүчит мутартай. Таны гар хүчтэй, Таны баруун гар өргөмжлөгдсөн.

¹⁴Зөв шударга ба шударга ёс бол Таны сэнтийн суурь юм. Хайр энэрэл ба үнэн Таны өмнө явдаг.

¹⁵Баярт дууг мэддэг ард түмэн юутай ерөөлтэй вэ!Өө, ЭЗЭН, тэд Таны нүүр царайны гэрэлд алхдаг.

¹⁶Таны нэрд тэд өдөржин баярлаж, Таны зөв шударгаар тэд өргөмжлөгддөг.

¹⁷Учир нь Та бол тэдний хүч чадлын алдар бөгөөдТаны ивээлээр бидний эвэр өргөмжлөгдсөн байдаг.

¹⁸Учир нь бидний бамбай бол ЭЗЭНийх бөгөөдИзраилийн Ариун Нэгэн бол бидний Хаан.

¹⁹Нэг удаа Та Өөрийн ариун хүмүүст үзэгдэл дотор айлдаж, “Би хүч чадалт нэгэнд тусламж өгсөн. Би ард түмнээс шилж сонгосон нэгнийг өргөмжилсөн.

²⁰Би Өөрийн зарц Давидыг олсон. Өөрийн ариун тосоор Би түүнийг тосолсон.

²¹Миний гар түүнтэй хамт байж, Миний мутар ч бас түүнийг хүчтэй болгоно.

²²Дайсан түүнээс нэхэн шаардаж чадахгүй, Хорон муугийн хүү ч түүнийг зовоож чадахгүй.

²³Харин Би түүний өмнө өстнүүдийг нь бяцалж, Түүнийг үзэн ядагчийг бут цохино.

²⁴Миний итгэлтэй байдал ба Миний хайр энэрэл түүнтэй хамт байх бөгөөдМиний нэр дээр түүний эвэр өргөмжлөгдөнө.

²⁵Би бас түүний гарыг далай дээр, Түүний баруун гарыг гол мөрөнгүүд дээр байлгана.

²⁶Тэр Над уруу “Та бол миний Эцэг, Миний Бурхан болон миний авралын хад” гэж хашхирна.

²⁷Би мөн түүнийг ууган хүү, Газар дэлхийн хаадаас хамгийн дээд хаан болгоно.

²⁸Би Өөрийн хайр энэрлээ түүний төлөө мөнхөд хадгалж, Өөрийн гэрээг ч түүнд батжуулна.

²⁹Ингээд Би түүний үр удмыг мөнхөд тогтоож, Түүний сэнтийг тэнгэрийн өдрүүд мэт болгоно.

³⁰Хэрэв түүний хөвгүүд Миний хуулийг мартаж, Миний шүүлтийн дагуу явахгүй бол,

³¹Хэрэв тэд Миний тогтоолуудыг зөрчиж, Миний тушаалуудыг биелүүлэхгүй бол,

³²Би тэдний алдаа зөрчлийг таягаараа, Тэдний гэм бурууг саваагаар шийтгэнэ.

³³Харин Би Өөрийн хайр энэрлийг түүнээс таслахгүй, Итгэлгүйгээр ч үйлдэхгүй.

³⁴Өөрийн гэрээг би зөрчихгүй, Амнаас гарсан авиагаа өөрчлөхгүй.

³⁵Би Өөрийн ариун байдлаар нэгэнтээ тангарагласан бөгөөдБи Давидад худал хэлэхгүй.

³⁶Түүний үр удам нь мөнхөд амьдарч, Түүний сэнтий Миний өмнөх нар шиг байна.

³⁷Тэр нь сар шиг мөнхөд байхаар тогтоогдох бөгөөдТэнгэрийн гэрч итгэмжит юм” гэв.

³⁸Харин Та хаян, татгалзаж, Өөрийн тослогдогчийн эсрэг хилэнгээр дүүрэн байв.

³⁹Та Өөрийн зарцын гэрээг хайхраагүй. Та түүний титмийг шороонд бузарласан.

⁴⁰Та түүний бүх ханыг эвдсэн. Та түүний бат цайзуудыг сүйрүүлсэн.

⁴¹Замаар өнгөрөн явагч бүхэн түүнийг тоносон. Тэр өөрийн хөршүүдэд буруутгагдсан.

⁴²Та түүний өстнүүдийн баруун гарыг өргөмжилсөн. Та бүх дайснуудыг нь баярлуулсан.

⁴³Та бас илднийх нь ирийг мохоож, Түүнийг тулалдаанд бат зогсож чадахгүй болгосон.

⁴⁴Та түүний сүр жавхланг дуусган, Түүний сэнтийг газарт хөмрөв.

⁴⁵Та түүний залуу насны өдрүүдийг богиносгосон. Та түүнийг ичгүүрээр нөмрүүлсэн.

⁴⁶Өө, ЭЗЭН, хэдий болтол вэ?Та Өөрийгөө мөнхөд нуух уу?Таны уур хилэн гал мэт шатах уу?

⁴⁷Миний амьдралын хугацааг санаач. Та хүний хөвгүүдийг юунд дэмий хоосон бүтээгээ вэ!

⁴⁸Ямар хүн үхлийг үзэлгүй амьдарч чадах вэ?Тэрээр өөрийн сэтгэлийг Үхэгсдийн орны эрхшээлээс аварч чадах уу?

⁴⁹Өө, Эзэн, итгэлтэй байдал дотроо Таны Давидад тангарагласанУрьдын хайр энэрэл тань хаана байна вэ?

⁵⁰Өө, Эзэн, Өөрийн зарц нарын доромжлолыг санаач. Би өвөртөө бүх олон түмний доромжлолыг хэрхэн тээдгийг ч санаач.

⁵¹Өө, ЭЗЭН, тэдгээрээр Таны дайснууд доромжлон, Тэдгээрээр тэд Таны тослогдогчийн алхам бүрийг доромжилсон.

⁵²ЭЗЭН мөнхөд магтагдах болтугай!Амен, Амен.