Read Ариун Библи, Mongolian Ariun Bible, 2004 Сургаалт үгс 26 Bible Online

Сургаалт үгс 26 - Ариун Библи, Mongolian Ariun Bible, 2004 bible

Сургаалт үгс 26

¹Зун цас орох ба ургац хураах үеэр бороо орохын адилМунхаг хүнд хүндэтгэл үзүүлэх нь үл зохино.

²Далавчаа дэвэх бор шувуу болон нисэн одох хараацайтай адил шалтгаангүй хараал намждаггүй.

³Ташуур моринд, хазаар илжгэнд зориулагддаг болСаваа нь мунхгуудын нуруунд зориулагджээ.

⁴Мунхагт мунхгаар нь бүү хариул. Эс тэгвэл чи түүнтэй адил болно.

⁵Мунхаг хүн өөрийгөө цэцэн мэргэнд тооцохгүй байхын тулд түүнд мунхгаар нь хариултыг өг.

⁶Мунхгийн гараар зурвас хүргүүлэгч нь хөлөө тайрч, хүчирхийллийг ууж буй хэрэг.

⁷Мунхгийн аман дахь сургаалт үгс нь суунги хүний хэрэгцээгүй хөлтэй адил болой.

⁸Мунхаг хүнийг өргөмжлөгч нь дүүгүүрт чулуу хийж буйтай адил болой.

⁹Мунхгийн аман дахь сургаалт үгс нь согтуугийн гарт шаасан өргөстэй адил болой.

¹⁰Мунхгийг болон өнгөрөн явагсдыг дуудаж хөлсөлдөг хүн болХүн бүрийг шархдуулдаг харваачтай адил юм.

¹¹Нохой бөөлжсөө долоодогчлон мунхаг хүн мунхаглалаа давтана.

¹²Өөрөө өөрийнхөө нүдэнд мэргэн байдаг хүнийг чи үзсэн үү?Мунхаг хүнд тийм нэгнээс ч илүү засрах найдлага бий.

¹³Залхуу хүн “Замд арслан байна. Задгай талбайд догшин арслан байна” гэдэг.

¹⁴Хаалга нугасаараа нээгдэж хаагддаг шигЗалхуу хүн орон дээрээ эргэж хөрвөөнө.

¹⁵Залхуу хүн аяганд гараа хүргээд, Эргүүлээд амандаа хүргэх гэж цөхөрнө.

¹⁶Мунхаг нь өөрийгөө ухаалаг хариу өгч чадах долоон хүнээс ч илүү мэргэн хэмээдэг.

¹⁷Өөрт нь хамаагүй хэрүүл маргаанд хөндлөнгөөс оролцогч болбоосНохойг чихнээс нь зуурч авагчтай адил буюу.

¹⁸Галтай мод болон үхлийн нумыг шидэгч галзуу хүн байдаг.

¹⁹Хөршийгөө мэхэлчихээд, “Би тоглосон юм” гэх хүн тийм нэгэнтэй адил буюу.

²⁰Түлээ дутагдвал гал унтарна. Хов жив зөөгч байхгүй бол хэрүүл маргаан намжина.

²¹Модны нүүрс улайссан цогийг бий болгож, Түлээ нь галыг өрдөхийн адил хэрүүлч хүн эвдрэлцлийг өдөөнө.

²²Хов зөөгчийн үгс тансаг идээ будаа мэт байх бөгөөд ходоодны мухарт ч хүрнэ.

²³Дүрэлзэх уруул ба хорон зүрх болбоосМөнгөний хольцоор өнгөлсөн шавар сав суулга мэт буюу.

²⁴Үзэн яддаг хүн түүнийгээ уруулаараа нуудаг ч заль мэхээ зүрхэндээ хадгалдаг.

²⁵Тэр хүн нигүүлсэнгүй ярьсан ч түүнд бүү итгэ. Учир нь зүрхэнд нь долоон жигшүүрт зүйл байдаг.

²⁶Хэдийгээр заль мэхээр үзэн ядалт нь баганын цаана халхлагддаг чТүүний хар санаа нь цугларагсдын өмнө илчлэгдэнэ.

²⁷Нүхийг ухагч хүн өөрөө түүн уруугаа унана. Өөдөө шидсэн чулуу өөрийн толгой дээр унана.

²⁸Худалч хэл хуурагдагсдыг үзэн яддаг. Бялдууч ам сүйрлийг авчирдаг.