Read Ариун Библи, Mongolian Ariun Bible, 2004 Сургаалт үгс 27 Bible Online

Сургаалт үгс 27 - Ариун Библи, Mongolian Ariun Bible, 2004 bible

Сургаалт үгс 27

¹Маргаашаар бүү сайрх. Учир нь маргааш юу болохыг чи үл мэднэ.

²Өөрийн чинь ам бус харин өөр хүн, уруул чинь бус харин гаднын хүн чамайг магтаг.

³Хад чулуу хүнд ба элс ч жин татна. Харин мунхгийн өдөөн хатгалга энэ хоёроос ч хүнд аж.

⁴Хилэн бол хэрцгий, уур бол өршөөлгүй. Харин хэн атаархлыг тэсвэрлэн зогсож чадах вэ?

⁵Далдлагдсан хайраас ил зэмлэл нь хавьгүй дээр.

⁶Анд нөхрийн чинь учруулах шарх итгэмжтэй, Харин дайсны чинь үнсэлт заль мэхтэй юм.

⁷Цатгалан хүн зөгийн балыг ч хүсдэггүй. Харин өлссөн хүнд гашуун юм ч амттай санагддаг.

⁸Гэр орноосоо холдогч хүн болбоос үүрээ орхисон жигүүртэн мэт буюу.

⁹Анхилуун үнэрт тос ба сүрчиг нь зүрхийг баясгадаг болХүний зөвлөгөө анд нөхөрт нь амтат бурам мэт буюу.

¹⁰Өөрийн анд нөхрийг болон эцгийнхээ анд нөхрийг бүү орхи. Гай гамшиг чамд тохиолдоход ах дүүгийнхээ гэрийг бүү зорь. Хол суугаа ахаас чинь ойр буй хөрш чинь дээр.

¹¹Хүү минь, мэргэн байж, зүрхийг минь баярлуул. Энэ нь намайг муулагчид хариу барьж чадахын тулд юм.

¹²Хэрсүү хүн хорон мууг хараад түүнээс зайлж чаддаг болГэнэн хүн нь угтан явсаар байгаад шангаа хүртдэг.

¹³Гаднын хүний өмнөөс батлан даагчийн дээлийг тайлж ав. Харь хүний өмнөөс батлан даагч нь өөрийгөө олз болго.

¹⁴Өглөө эртлэн чанга дуугаар анд нөхрөө ерөөдөг хүнТүүнд хараал хэлж байгаатай адил тооцогдоно.

¹⁵Гэмэргэн эм болбоос бороошсон өдөр ус тасралтгүй дуслахтай адил буюу.

¹⁶Тийм эмэгтэйг номхтгох нь салхийг зогсоох болон гараараа тосыг атгаж авахтай адил буюу.

¹⁷Төмөр төмрийг ирлэдэг. Тийнхүү хүн хүнээ хурцалдаг.

¹⁸Инжрийн модыг арчлагч үр жимсийг нь идэх болно. Эзэндээ санаа тавигч нь хүндлэгдэнэ.

¹⁹Усны мандалд хүн царайгаа харахын адил хүмүүний зүрх түүний дүр төрхийг харуулна.

²⁰Үхэгсдийн орон ба Сүйрэл хэзээ ч цаддаггүй шиг хүмүүний нүд хэзээ ч ханахгүй.

²¹Мөнгө ба алтыг галын дөлөөр цэвэршүүлдэг бол хүмүүнийг өөрт нь нийцсэн магтаалаар шалгана.

²²Үр тариатай хамт мунхгийг ууранд хийгээд нүдүүрээр нүдсэн ч мунхаг нь үл арилна.

²³Мал сүргийнхээ байдлыг сайн мэд. Хонин сүрэгтээ анхаарал сайн тавь.

²⁴Учир нь эд баялаг мөнх биш. Хааны титэм ч үе дамжихгүй.

²⁵Өвс байхгүй болоход, шинэ ногоо цухуйж, уулан дээрх өвс цуглуулагдаж,

²⁶Хурганы арьс чинь хувцас болж, ямаанууд чинь чамд газрын өртгийг өгнө.

²⁷Чамайг болон гэр бүлийг чинь хооллохоор бас зарц охидыг чинь тэжээхээр чамд ямааны сүү элбэг дэлбэг байх болно.