Read Ариун Библи, Mongolian Ariun Bible, 2004 Сургаалт үгс 4 Bible Online

Сургаалт үгс 4 - Ариун Библи, Mongolian Ariun Bible, 2004 bible

Сургаалт үгс 4

¹Хөвгүүд минь, эцгийнхээ сургамжийг сонс. Оюун ухаанаас суралцахын тулд анхааралтай байцгаа.

²Би та нарт эрүүл саруул сургаалыг заадаг. Миний сургамжийг бүү орхигдуул.

³Би эцгийнхээ хүү, эхийнхээ энхрий ганц хүү нь байхад

⁴Эцэг маань надад сургаж, “Бүх зүрх сэтгэлээрээ миний үгнээс зуурч ав. Миний тушаалуудыг сахи. Тэгвэл амьдарна.

⁵Мэргэн ухаан болон оюун ухааныг олж ав. Амнаас минь гарсан үгнээс бүү эргэ, бүү март.

⁶Мэргэн ухааныг бүү огоор. Тэр чамайг хамгаална. Мэргэн ухааныг хайрла. Тэр чамайг сэргийлнэ.

⁷Мэргэн ухааны эхлэл болбоос түүнийг олж авах, Олж авсан бүхнээрээ ухааныг олж авах явдал болой.

⁸Мэргэн ухааныг үнэлж цэгнэ. Тэр чамайг өргөмжилнө. Хэрэв чи түүнийг тэврэх аваас тэр чамайг алдаршуулна.

⁹Мэргэн ухаан чиний тэргүүн дээр нигүүлслийн цэцгийн титэм тавина. Тэр чамд гоо үзэсгэлэнгийн титмийг өргөн барина” гэж хэлсэн.

¹⁰Хүү минь, сонс. Хэлж байгааг минь хүлээн ав. Амьдралын чинь он жилүүд нэмэгдэх болно.

¹¹Би чамайг мэргэн ухааны замаар хөтөллөө. Би чамайг цэх шулуун жимээр дагуулж явсан.

¹²Чамайг алхах үед алхаа чинь саадгүй байна. Хэрэв гүйх аваас чи бүдэрч унахгүй.

¹³Сургамжийг зууран барь. Алдаж үл болно. Мэргэн ухааныг хамгаал, Учир нь тэр бол чиний амь мөн.

¹⁴Хар санаатнуудын жимд хөлөө бүү тавь. Хорон муу хүмүүсийн замаар алхаж болохгүй.

¹⁵Түүнээс зайлсхий. Түүгээр дайран гарах ч хэрэггүй. Түүнээс эргэн, хажуугаар нь өнгөр.

¹⁶Учир нь тэд хорон мууг үйлдээгүй цагтаа нойрсож чаддаггүй юм. Хэн нэгнийг бүдрүүлж унагаагүй цагт тэдний нойр нь хулждаг.

¹⁷Учир нь тэд хар санааны талхыг идэж, Хүчирхийллийн дарснаас уудаг.

¹⁸Харин шударга зөв хүмүүсийн жим болбоос үүрийн гэгээ мэт агаад, Тэр нь өдрийг авчрах хүртэл улам тод гэрэлтсээр байх болно.

¹⁹Хар санаатны зам нь харанхуй мэт буюу. Тэд юунд бүдэрч байгаагаа ч үл мэднэ.

²⁰Хүү минь, миний үгэнд анхаарлаа хандуул. Үгсийг маань чих тавин сонс.

²¹Тэднийг хараанаасаа алдаж болохгүй. Тэднийг өр зүрхэндээ хадгалж яв.

²²Учир нь гэвэл миний үгс бол тэдгээрийг олсон нэгэнд амь бөгөөдТэр хүний бүх биед эрүүл мэнд юм.

²³Юуны түрүүнд зүрхээ хамгаал. Учир нь түүнээс амийн булгууд ундран гардаг юм.

²⁴Мэхлэгч амыг цааш тавь. Заль мэхтэй үгсийг өөрөөсөө холдуул.

²⁵Нүд чинь өмнө байгаагаа цэх хараг. Харц чинь урагшаа эгц тусаг.

²⁶Хөлийнхөө доорх замыг хар. Тэгвэл бүх зам чинь дайвшгүй байх болно.

²⁷Зүүн, баруун талын аль уруу нь ч бүү гуйв. Хөлөө хорон муугаас зайлуулж яв.