Read Ариун Библи, Mongolian Ariun Bible, 2004 Иеремиагийн гашуудал 3 Bible Online

Иеремиагийн гашуудал 3 - Ариун Библи, Mongolian Ariun Bible, 2004 bible

Иеремиагийн гашуудал 3

¹Түүний хилэнгийн саваанаас болж зовлон үзсэн хүн нь би байна.

²Тэр намайг тууж, гэрэлд бус, харанхуйд алхуулсан.

³Үнэхээр миний эсрэг Тэрээр бүх л өдрийн туршид дахин дахин мутраа эргүүлсэн.

⁴Тэр миний арьс махыг тураан эцээж, яснуудыг минь хэмхчсэн.

⁵Тэр намайг уй гашуу, хүнд бэрхээр бүслэн ороов.

⁶Он удаан үхэгсдийн адилаар намайг Тэр харанхуй газруудад оршин суулгав.

⁷Би гадагш гарч чадахааргүйгээр Тэр намайг хашив. Тэрээр гинжийг минь хүнд болгов.

⁸Хашхиран, тусламж дуудахад минь ч Тэрээр залбирлыг минь хаасан.

⁹Тэр миний замыг цавчсан чулуугаар хааж, миний жимийг тахир болгов.

¹⁰Миний хувьд Тэрээр отон хэвтэж буй баавгай мэт, Далд газруудад байх арслан мэт юм.

¹¹Тэрээр замуудыг минь хажуу тийш эргүүлж, намайг хэсэгчлэн тастав. Тэр намайг үгүйрүүлэв.

¹²Тэрээр нумаа татаж, намайг сумныхаа бай болгов.

¹³Тэрээр саадган дахь сумнуудаа миний дотор эрхтэн уруу оруулахаар боллоо.

¹⁴Би өөрийн бүх хүнд тохуурхал буюу бүхэл өдрийнх нь шог дуу нь боллоо.

¹⁵Тэр намайг гашуудлаар дүүргэж, намайг агиар согтоов.

¹⁶Тэрээр хайргаар шүдийг минь хугачиж, намайг тоосон дунд нөмрүүлэв.

¹⁷Сэтгэл минь амар амгалангаас хагацан, би жаргалыг мартав.

¹⁸Тиймээс би “Миний хүч чадал, мөн ЭЗЭНээс хүлээх найдвар минь ч мөхөв” гэж байна.

¹⁹Миний зовлон болон тэнүүчлэлийг, агь ба гашуудлыг санаач.

²⁰Миний сэтгэл үнэхээр дурсан санаж, миний дотор бөхийсөн байна.

²¹Үүнийг би оюун бодолдоо дурсан саналаа, тиймээс надад найдвар бий.

²²ЭЗЭНий хайр энэрэл үнэндээ хэзээ ч дуусахгүй. Учир нь Түүний өршөөл хэзээ ч унахгүй.

²³Тэдгээр нь өглөө бүр шинэ юм. Таны итгэлтэй байдал агуу ажээ.

²⁴“ЭЗЭН бол миний хувь” гэж сэтгэл минь хэлж байна. “Тийм учраас би Түүнд найддаг”.

²⁵Түүнийг хүлээгсдэд, Түүнийг хайсан хүнд ЭЗЭН сайн ажээ.

²⁶ЭЗЭНий авралыг тэр чимээгүйхэн хүлээх нь сайн болой.

²⁷Залуу насандаа буулгыг үүрэх нь хүнд сайн болой.

²⁸Тэрээр түүний дээр тавьснаас хойш ганцаараа суун, чимээгүй байг.

²⁹Тэр хүн амаа шороон дотор хийг, тэнд найдвар байж магад.

³⁰Тэрээр цохигчид хацраа өгч, зэмлэлээр дүүрэг.

³¹Учир нь Эзэн мөнхөд татгалзахгүй.

³²Хэрэв Тэрээр гансралд хүргэдэг бол, Өөрийн арвин их хайр энэрлийн дагуу Тэрээр өршөөх бөлгөө.

³³Учир нь Тэрээр хүсэмжлэн зовоож, хүний хөвгүүдийг гансруулдаггүй.

³⁴Газар нутгийн бүх хоригдлуудыг Түүний хөл доор няцлах,

³⁵Хамгийн Дээд Нэгэний оршихуйд зөв шударга хүнийг үгүйсгэх,

³⁶шүүлтэн дээр нь хүнийг мэхлэх зэрэг эдгээр зүйлсийг Эзэн үл сайшаадаг.

³⁷Эзэн тушаагаагүйсэн бол хэн хэлэхэд тэр нь болж өнгөрдөг вэ?

³⁸Сайн болон муугийн аль аль нь Хамгийн Дээд Нэгэний амнаас гардаггүй гэж үү?

³⁹Амьд хүн дүрстэн болон хүн нүглээ шийтгүүлж байхдаа юунд гомдох ёстой вэ?

⁴⁰Өөрсдийн замуудыг нягтлан ажиглаад, ЭЗЭН уруу буцацгаая.

⁴¹Тэнгэр дэх Бурханы зүг бид өөрсдийн зүрх болон гараа өргөдөг.

⁴²Бид нүгэл үйлдэн, тэрсэлсэн бөгөөд Та уучлаагүй билээ.

⁴³Та уураар хучин, биднийг мөшгөсөн. Та өршөөлгүйгээр хядсан.

⁴⁴Ямар ч залбирлыг нэвтрүүлэхгүйн тулд Та Өөрийгөө үүлээр хучив.

⁴⁵Та биднийг ард түмнүүдийн дунд хог хаягдал, баас болгосон.

⁴⁶Бидний бүх дайснууд бидний эсрэг амаа нээв.

⁴⁷Мэгдэлт болон урхи, сүйрэл болон үгүйрэл бидэнд учрав.

⁴⁸Миний ард түмний охины сүйрлийн улмаас нүд минь усны урсгалаар урсана.

⁴⁹Миний нүд зогсолтгүйгээр, тасралтгүй асгардаг бөгөөд

⁵⁰ЭЗЭНийг доошоо харж, тэнгэрээс харах хүртэл ингэдэг юм.

⁵¹Хотын минь бүх охидоос болж миний нүд сэтгэлд минь шаналал авчирна.

⁵²Миний дайснууд шалтгаангүйгээр намайг шувуу адил харважээ.

⁵³Тэд намайг нүхэн дотор чимээгүй болгон, миний дээр чулуу тавив.

⁵⁴Толгой дээр минь ус урссан. “Би таслагдав” гэж би хэлэв.

⁵⁵Хамгийн гүн нүхнээс би Таны нэрээр дуудлаа, ЭЗЭН.

⁵⁶“Миний тайтгарлаас, тусламж гуйсан хашхиралтаас минь чихээ бүү нуугаач” гэсэн миний дууг Та сонсжээ.

⁵⁷Би Тан уруу дуудахад Та ойртон иржээ. “Бүү ай!” гэж Та айлдав.

⁵⁸Эзэн, Та миний сэтгэлийн хэргийг өмгөөлжээ. Та амийг минь зольсон.

⁵⁹ЭЗЭН, Та миний дарамтыг харсан билээ. Хэргийг минь шүүгээч.

⁶⁰Тэдний бүх өс хонзонг, миний эсрэг тэдний бүх далд явуулгыг Та харсан билээ.

⁶¹ЭЗЭН, тэдний зэмлэлийг, миний эсрэг тэдний бүх далд явуулгуудыг Та сонссон билээ.

⁶²Над уруу дайрагчдын уруул хийгээд тэдний шивнээ бүхэл өдрийн турш миний эсрэг байна.

⁶³Тэдний сууж, босохыг хараач. Би тэдний шог дуу нь юм.

⁶⁴ЭЗЭН, Та тэдэнд гарынх нь үйлсийн дагуу хариу өгөх болно.

⁶⁵Та тэдэнд зүрхний хатуурлыг өгөх бөгөөд Таны хараал тэдний дээр байх болно.

⁶⁶Та уурандаа тэднийг мөшгөж, ЭЗЭНий тэнгэрийн дороос тэднийг устгах болно!