Read Ариун Библи, Mongolian Ariun Bible, 2004 Матай 14 Bible Online

Матай 14 - Ариун Библи, Mongolian Ariun Bible, 2004 bible

Матай 14

¹Тэр үед захирагч Херод Есүсийн тухай сураг сонсов.

²Херод зарц нартаа-Энэ бол баптисм хүртээгч Иохан мөн. Тэр үхлээс амилжээ. Түүний дотор гайхамшигт хүч үйлчилж байгаагийн учир нь энэ юм гэжээ.

³Учир нь Херод дүү Филипийнхээ эхнэр Херодиагаас болж Иоханыг бариулж шоронд хорьсон байлаа.

⁴Яагаад гэвэл Иохан Херодод-Та хууль бусаар Херодиаг авсан байна гэж хэлсэн ажээ.

⁵Хэдийгээр тэр Иоханыг алахыг хүссэн боловч хурсан олноос айж байлаа. Учир нь тэд Иоханыг эш үзүүлэгч гэж үздэг байв.

⁶Харин Херодын төрсөн өдрөөр Херодиагийн охин олны өмнө бүжиглэж, Херодод таалагдав.

⁷Тиймээс Херод түүнд юу гуйсныг чинь өгье гэж андгайлан амлав.

⁸Охин эхийнхээ ятгаснаар-Энэ царан дээр баптисм хүртээгч Иоханы толгойг тавиад надад өгөөч гэж гуйжээ.

⁹Хэдийгээр хаан харууссан боловч өгсөн андгай болон ирсэн зочдоосоо болоод өгтүгэй гэж тушаав.

¹⁰Ингээд тэр хүн илгээж Иоханыг шоронд цаазлуулжээ.

¹¹Толгойг нь царан дээр авчирч охинд өгсөнд тэр эхдээ аваачиж өгөв.

¹²Иоханы шавь нар ирээд биеийг нь аван оршуулаад, явж Есүст мэдэгдэв.

¹³Есүс үүнийг сонсоод тэндээс гарч завиар зэлүүд газар уруу ганцаараа явжээ. Хурсан олон сонсоод, хотоос гарч Түүнийг явганаар дагалаа.

¹⁴Эрэг дээр гарахдаа Есүс асар олон хүн байхыг хараад тэднийг ихэд өрөвдөн, өвчтөнүүдийг нь эдгээв.

¹⁵Орой болох үед шавь нар нь Түүн дээр ирж, -Энэ газар зэлүүд мөн цаг хэдийн талийжээ. Хурсан олныг тараан явуулаач! Тэгвэл тэд гацаанууд уруу явж, өөрсдөдөө хоол хүнс худалдаж авах болно шүү дээ гэцгээв.

¹⁶Харин Есүс тэдэнд-Тэд явах хэрэггүй. Та нар тэдэнд идэх юм өг гэхэд,

¹⁷тэд Түүнд-Бидэнд ердөө л таван талх, хоёрхон загас байна гэсэнд

¹⁸-Нааш нь аваад ир гэж Тэр хэлэв.

¹⁹Есүс хурсан олонд зүлгэн дээр суухыг тушаагаад таван талх, хоёр загасыг авч, тэнгэр өөд ширтэж, хүнсийг ерөөгөөд талхаа хувааж шавь нартаа өгөв. Шавь нар нь хурсан олонд өгөхөд

²⁰тэд бүгд идэж, цаджээ. Тэгээд тэд үлдэгдэл өвдөл цөвдлийг нь цуглуулахад арван хоёр сагс дүүрэв.

²¹Тэнд эмэгтэйчүүд, хүүхдүүдээс гадна таван мянга орчим эрчүүд байж идсэн ажээ.

²²Есүс хурсан олныг явуулах зуураа даруй шавь нараа завинд нь албадан суулгаж, Өөрийнхөө түрүүнд тэднийг нөгөө эрэг уруу явуулав.

²³Хурсан олныг явуулсны дараа Тэр ганцаараа залбирахаар ууланд гарчээ. Орой болоход Тэр тэнд ганцаараа байв.

²⁴Харин завь хэдийн эргээс олон бээр холдсон байв. Салхи өөдөөс нь салхилж байсан тул давалгаанд түрэгдэн байлаа.

²⁵Шөнийн дөрөвдүгээр манааны үед Тэр нууран дээгүүр алхан тэднийг зүглэн ирж явав.

²⁶Нууран дээгүүр алхаж яваа Түүнийг хараад шавь нар нь сандарч, -Энэ чинь хий үзэгдэл байна гээд айснаасаа болж хашхиралдав.

²⁷Харин тэр даруй Есүс тэдэнд-Зоригтой бай. Би байна. Бүү ай гэжээ.

²⁸Петр Түүнд-Эзэн, хэрэв Та мөн юм бол, усан дээгүүр алхаж Өөр уруу тань ирэхийг надад тушаагаач гэхэд

²⁹Тэр-Ир гэлээ. Петр завинаасаа гарч, усан дээгүүр алхлан Есүс уруу явав.

³⁰Харин Петр салхи хараад, айн, живж эхлэв. Тэгээд-Эзэн, намайг авраач гэж орилоход нь,

³¹Есүс тэр даруй гараа сунган, түүнийг зууран, -Бага итгэлт минь, чи юунд эргэлзэв? гэжээ.

³²Тэр хоёрыг завин дээр гарахад, салхи зогсжээ.

³³Завин дээр байсан хүмүүс Түүнд мөргөж-Та бол үнэхээр Бурханы Хүү мөн гэцгээв.

³⁴Тэгээд тэд нуурыг гаталж, Геннесаретын нутагт хүрчээ.

³⁵Тэр нутгийн хүмүүс Түүнийг таниад, хавь орчмынхоо бүх газарт хүн илгээж өвчтэй хүн бүрийг Түүн уруу авчирлаа.

³⁶Тэд зөвхөн дээлийнх нь хормойд гар хүрэхийг л гуйж байв. Тэгээд хүрсэн бүхэн эдгэж байлаа.