Read Ариун Библи, Mongolian Ariun Bible, 2004 Матай 15 Bible Online

Матай 15 - Ариун Библи, Mongolian Ariun Bible, 2004 bible

Матай 15

¹Тэгтэл Иерусалимаас хэсэг фарисайчууд болоод хуулийн багш нар Есүс дээр ирж,

²-Таны шавь нар юунд ахмадын ёс заншлыг зөрчинө вэ? Тэд талх идэхдээ гараа угаахгүй юм гэцгээхэд

³Тэр хариуд нь тэдэнд-Яагаад та нар өөрсдөө ёс заншлынхаа төлөө Бурханы тушаалуудыг зөрчинө вэ?

⁴Бурхан “Эцэг, эхээ хүндэл”, “Эцэг, эхээ муугаар хэлэгчийг ал” гэж айлдсан.

⁵Гэтэл та нар “Хэрэв хэн эцэг, эсвэл эхдээ “Та нарт тусалж магадгүй байсан өөрийн ямар ч зүйлээ Бурханд өргөсөн” гэж хэлнэ,

⁶тэр нь эцгээ, эсвэл эхээ хүндлэх хэрэггүй” гэдэг. Та нар ийнхүү ёс заншлынхаа төлөө Бурханы үгийг хүчингүй болголоо.

⁷Зальхай хүмүүс ээ, Исаиа та нарын тухай зөв эш үзүүлсэн юм. Ингэхдээ

⁸“Энэ ард түмэн Намайг амаараа хүндэлдэг. Гэвч тэдний зүрх Надаас алс хол байдаг.

⁹Тэд хүнээс гарсан тушаал зааврыг сургаж, Надад дэмий хоосноор мөргөж байна”

¹⁰Хурсан олныг Тэрээр Өөр уруугаа дуудсаны дараа тэдэнд-Сонс, ухаар.

¹¹Аманд орсон юм хүнийг бузарладаггүй, харин амнаас гарч буй нь хүнийг бузарладаг юм гэхэд

¹²шавь нар нь ойртож очоод Түүнд-Энэ үгсийг тань сонсоод фарисайчууд гомдсоныг Та мэдэв үү? гэжээ.

¹³Харин Есүс хариуд нь-Тэнгэрлэг Эцэгийн минь тариагүй алив ургамал үндсээрээ сугалагдана.

¹⁴Тэднийг орхи. Тэд бол сохруудыг удирддаг сохрууд юм. Хэрэв сохор нь сохроо удирдвал, тэд хоёул нүхэнд унах болно гэхэд,

¹⁵Петр Түүнд-Энэ сургаалт зүйрлэлийг бидэнд тайлбарлаж өгөөч гэсэнд,

¹⁶Тэр-Та нар мөн л ойлгохгүй хэвээр байна уу?

¹⁷Ам уруу орох алив зүйл гэдсэнд ороод арилдгийг ойлгохгүй байна гэж үү?

¹⁸Харин амнаас гарах зүйл зүрхнээс гарч, тэдгээр нь хүнийг бузарладаг.

¹⁹Зүрхнээс хорон муу бодол, аллага, завхайрал, садар самуун, хулгай, худал гэрчлэл, гүтгэлэг зэрэг нь гардаг.

²⁰Эдгээр нь хүнийг бузарладаг. Харин гараа угаалгүй идэх нь хүнийг бузарладаггүй гэжээ.

²¹Есүс тэндээс явж, Тир болон Сидоны нутагт ирэв.

²²Нэгэн Канаан эмэгтэй тэр мужаас ирж, -Давидын Хүү Эзэн, намайг өршөөгөөч. Охиныг маань чөтгөр хэрцгийгээр эзэмдэж байна гэж орилов.

²³Харин Есүс түүнд нэг ч үг хэлсэнгүй. Тэгтэл шавь нар нь ирээд, Түүнээс-Түүнийг явуулаач. Тэр эмэгтэй бидний араас хашхирсаар байна шүү дээ гэж гуйв.

²⁴Гэтэл Есүс-Би зөвхөн Израилийн гэрийн алдагдсан хонинууд уруу илгээгдсэн юм гэсэн

²⁵боловч өнөөх эмэгтэй дөхөж ирээд, Түүний өмнө мөргөж, -Эзэн, надад туслаач гэхэд,

²⁶Есүс-Хүүхдүүдийн талхыг авч, нохдод хаяж өгөх нь сайн хэрэг бишээ гэв.

²⁷Харин тэр-Тийм ээ, Эзэн. Гэвч ноход ч эздийнхээ ширээнээс унасан үйрмэгээр хооллодог шүү дээ гэсэнд,

²⁸Есүс-Эмэгтэй ээ, итгэл чинь агуу юм. Чиний хүссэнээр бүтэг гэхэд, охин нь тэр дороо эдгэрчээ.

²⁹Тэгээд Есүс тэндээс явж, Галил нуурын хавьд ирээд, ууланд гарч тэндээ сууж байлаа.

³⁰Маш олон хүн Түүн дээр доголон, тахир дутуу, сохор, дүлий болон олон хүнийг авч ирээд хөл дор нь тавилаа. Тэр тэднийг эдгээв.

³¹Хэлгүйчүүдийн ярихыг, тахир дутуу хүмүүсийн эрүүл болохыг, хазгар доголонгуудын явахыг, сохруудын харахыг хурсан олон үзээд гайхан, Израилийн Бурханыг алдаршуулав.

³²Есүс шавь нараа Өөр дээрээ дуудаад, тэдэнд-Би энэ хурсан олныг өрөвдөж байна. Тэд Надтай хамт гурван өдрийн турш байж, ямар ч идэх юмгүй болжээ. Би тэднийг өлөн зэлмүүн явуулмааргүй байна. Тэд замдаа сульдах вий гэхэд нь,

³³шавь нар нь Түүнд-Бид энэ зэлүүд газар ийм олон хүмүүсийг цатгах талхыг хаанаас олох билээ? гэсэнд,

³⁴Есүс-Та нарт хэдэн талх байна? гэв. Тэд-Долоо. Бас хэдэн жижиг загас байна гэлээ.

³⁵Тэр хурсан олонд газар суухыг тушаагаад,

³⁶долоон талх, мөн загасыг авч талархал өргөн хуваагаад, шавь нартаа өгч эхэлсэнд тэд хүмүүст тараан өгөв.

³⁷Бүгд идэж цадаад үлдсэн хэлтэрхийнүүдийг цуглуулахад долоон том сагс дүүрсэн байлаа.

³⁸Эмэгтэйчүүд, хүүхдүүдээс гадна тэнд байсан дөрвөн мянган эрчүүд идсэн юм.

³⁹Тэгээд хурсан олныг явуулаад, Тэр завинд сууж, Магаданы нутагт очив.