Read Ариун Библи, Mongolian Ariun Bible, 2004 Матай 22 Bible Online

Матай 22 - Ариун Библи, Mongolian Ariun Bible, 2004 bible

Матай 22

¹Есүс тэдэнд сургаалт зүйрлэлээр дахин айлдсан нь

²-Тэнгэрийн хаанчлалыг хүүгийнхээ хуримын найрыг хийсэн хаантай зүйрлэж болно.

³Хаан хуриманд уригдсан хүмүүсийг дуудуулахаар боолуудаа илгээсэн боловч, тэд ирэхийг хүссэнгүй.

⁴Тэр дахин “Уригдсан хүмүүст “Зоогийг бэлдлээ. Үхэр болон бордсон малаа гаргаж бүгдийг базааж бэлдлээ. Хуриманд морилон ир” гэж хэл” гээд өөр боолуудаа илгээв.

⁵Гэтэл тэд үл тоомсорлон өөрсдийнхөө мөрөөр явж, нэг нь тариан талбай уруугаа, нөгөө нь ажил уруугаа явав.

⁶Бусад нь хааны боолуудыг барин авч, доромжлон гутаагаад алжээ.

⁷Хаан уурлаад, цэргүүдээ илгээн тэдгээр алуурчдыг хөнөөгөөд, хотыг нь галдан шатаав.

⁸Тэгээд тэр боолууддаа “Хурим бэлэн боллоо. Харин уригдагсан хүмүүс маань зохисгүй хүмүүс байжээ.

⁹Тиймээс та нар гол гудамжаар явж, тааралдсан болгоноо хуриманд морилон ирэхийг урь” гэхэд

¹⁰тэдгээр боолууд гудамжинд гарч тааралдсан сайн, муу хүмүүсийг бүгдийг цуглуулав. Хуримын танхим зоогийн зочдоор дүүрчээ.

¹¹Харин хаан зоогийн зочдыг харахаар орж ирээд хуримын хувцас өмсөөгүй нэгэн хүнийг хараад,

¹²түүнд “Анд минь, чи хуримын хувцасгүйгээр хэрхэн энд орж ирэв?” гэхэд тэр үг дуугүй байв.

¹³Тэгтэл хаан зарц нартаа “Түүний гар, хөлийг хүлээд гаднах харанхуйд хая. Тэнд тэр уйлж, шүдээ хавирах болно” гэж хэлжээ.

¹⁴Учир нь дуудагдсан нь олон хэдий ч сонгогдсон нь цөөхөн гэж ярив.

¹⁵Тэгээд фарисайчууд явж, Есүсийг хэлсэн үгэнд нь яаж унагаахаа хамтдаа зөвлөлдөв.

¹⁶Тэд өөрсдийн шавь нарыг херодынхонтой хамт Түүн уруу илгээж, ингэж асуулгалаа. -Багш аа, бид Таны үнэнч хийгээд Бурханы замыг үнэнээр заадгийг тань, хэнийг ч ялгаварладаггүй тул хэнд ч тал засдаггүйг тань мэднэ.

¹⁷Тиймээс Та юу бодож байгаагаа бидэнд хэлээч? Бид Цезарьт албан татвар өгөх нь хуульд нийцэх үү, эсвэл үгүй юу? гэхэд

¹⁸Есүс тэдний хорон санааг мэдээд, -Хоёр нүүрт хүмүүс ээ, та нар юунд Намайг сорино вэ?

¹⁹Надад татварт өгдөг зоосыг үзүүлээдэх гэв. Тэд Түүнд нэг денар өгсөнд,

²⁰Тэр-Энэ хэний дүрс, бичээс вэ? гэж асуув.

²¹Тэд Түүнд-Цезарийнх гэхэд Есүс-Тэгвэл Цезарийн юмыг Цезарьт, Бурханы юмыг Бурханд өг гэлээ.

²²Үүнийг сонсоод тэд мэл гайхаж Түүнийг орхин одлоо.

²³Тэр өдөр (амилалт гэж байхгүй хэмээдэг) садукайчууд Түүн дээр ирж, Түүнээс асуусан нь

²⁴-Багш аа, Мосе “Хэрэв эр хүн нь үр хүүхэдгүй үхвэл, түүний дүү эхнэртэй нь гэрлэж ахынхаа үр удмыг залгуулах ёстой” гэж хэлсэн.

²⁵Бидэнтэй хамт ах дүү долоон хүн байсан юм. Ууган нь эхнэр авч, үр удмаа үлдээлгүй үхэхэд дүү нь эхнэртэй нь гэрлэв.

²⁶Хоёр дахь, гурав дахиас авахуулан долоо дахь нь хүртэл ийнхүү үхэв.

²⁷Бүхний эцэст мөнөөх эмэгтэй ч үхэв.

²⁸Иймээс амилалт дээр мөнөөх эмэгтэй тэр долоогийн хэнийх нь эхнэр болох вэ? Бүгд л түүнтэй гэрлэсэн шүү дээ гэхэд,

²⁹Есүс хариуд нь тэдэнд-Та нар Судрыг ч, Бурханы хүчийг ч мэдэхгүйгээс болж төөрөлдөж байна.

³⁰Амилалт дээр тэд гэрлэх ч үгүй, нөхөрт ч гарахгүй, харин тэнгэр дэх тэнгэр элч нартай адил болох юм.

³¹Харин үхэгсдийн амилалтын тухайд Бурханаас та нарт

³²“Би бол Абрахамын Бурхан, Исаакийн Бурхан, Иаковын Бурхан” хэмээн айлдсаныг та нар уншаагүй хэрэг үү? Тэр бол үхэгсдийнх бус, харин амьдын Бурхан гэж хэлэв.

³³Үүнийг сонсоод олон түмэн Түүний сургаалд гайхаж байлаа.

³⁴Харин Есүс садукайчуудыг дуугүй болгосныг фарисайчууд сонсоод цуглав.

³⁵Тэдний нэг болох хуульч Түүнийг сорьж

³⁶-Багш аа, Хууль дахь агуу тушаал нь аль вэ? гэж асуув.

³⁷Тэр түүнд-“Чи бүх зүрх, бүх сэтгэл, бүх оюун ухаанаараа өөрийн Бурхан Эзэнээ хайрла”.

³⁸Энэ бол агуу нь бөгөөд хамгийн чухал тушаал мөн.

³⁹Удаах нь “Чи хөршөө өөрийн адил хайрла” гэсэнтэй адил юм.

⁴⁰Энэ хоёр тушаал дээр бүх Хууль болоод Эш үзүүлэгчид тулгуурладаг юм гэлээ.

⁴¹Фарисайчуудыг цуглах зуур Есүс тэднээс

⁴²-Та нар Христийн тухай юу гэж боддог вэ? Тэр хэний хүү вэ? гэж асуухад тэд-Давидынх гэцгээв.

⁴³Тэр тэдэнд-Тэгвэл яагаад Давид Сүнсээр Түүнийг “Эзэн” гэж дуудаад,

⁴⁴“Эзэн, миний Эзэнд“Би Чиний дайснуудыг хөл дор чинь тавих хүртэлМиний баруун гарт залрагтун” гэсэн”

⁴⁵Хэрэв Давид Түүнийг “Эзэн” хэмээн дууддаг бол Тэр яаж түүний хүү байх билээ? гэж айлдав.

⁴⁶Хэн ч хариуд нь Түүнд үг хэлж чадаагүй бөгөөд тэр өдрөөс хойш нэг ч хүн Түүнээс юм асуухыг зүрхэлсэнгүй.