Read Ариун Библи, Mongolian Ariun Bible, 2004 Матай 26 Bible Online

Матай 26 - Ариун Библи, Mongolian Ariun Bible, 2004 bible

Матай 26

¹Есүс энэ бүх үгсээ хэлж дуусаад шавь нартаа

²-Хоёр хоногийн дараа Дээгүүр Өнгөрөх баяр болохыг та нар мэднэ. Хүний Хүү цовдлуулахаар тушаагдана гэлээ.

³Тэр үед тэргүүн тахилч Каиафын ордонд ахлах тахилч нар болон олны ахлагчид цуглаад,

⁴Есүсийг зальжин аргаар барьж, алахаар хуйвалдацгаав.

⁵Гэхдээ тэд-Олон түмний дунд үймээн гаргахгүйн тулд баярын үеэр болохгүй хэмээцгээв.

⁶Есүсийг Бетанд, уяман өвчтэй Симоны гэрт байхад

⁷их үнэтэй тос бүхий гөлтгөнөн сав барьсан эмэгтэй Түүн дээр ирээд, Түүнийг тухлан суугаад хооллох үед толгой дээр нь тосоо цутгав.

⁸Шавь нар үүнийг хараад уурлаж, -Юунд ийм үрэлгэн байна вэ?

⁹Энэ тосыг өндөр үнээр зарж, мөнгийг нь ядууст өгч болох байлаа шүү дээ гэцгээв.

¹⁰Харин Есүс үүнийг мэдээд, тэдэнд-Та нар энэ эмэгтэйд юунд төвөг удна вэ? Тэр Надад сайныг үйлдэв.

¹¹Учир нь та нар үргэлж ядуустай цуг байна. Харин та нар Надтай үргэлж цуг байхгүй.

¹²Энэ эмэгтэй биен дээр минь үнэртнийг цутгаснаараа Намайг оршуулгад бэлтгэж байгаа юм.

¹³Үнэнээр Би та нарт хэлье. Энэхүү сайн мэдээ бүх дэлхийн хаа ч тунхаглагдсан, энэ эмэгтэйг дурсаж, түүний үйлс яригдах болно гэлээ.

¹⁴Тэр үед арван хоёрын нэг болох Искариотын Иудас ахлах тахилч нар уруу очиж,

¹⁵-Түүнийг та нарт тушаавал та нар надад юу өгмөөр байна? гэхэд тэд түүнд гучин мөнгөн зоос дэнслээд өгөв.

¹⁶Тэр мөчөөс эхлэн тэр Есүсийг барьж өгөх аятай боломжийг хайв.

¹⁷Исгээгүй Талхны баярын эхний өдөр шавь нар Түүн уруу ирж, -Танд зориулан Дээгүүр Өнгөрөх баярын зоогийг хаана бэлдүүлэхийг Та хүсэж байна? гэж асуухад

¹⁸Тэр-Хот уруу, нэгэн хүн дээр оч. Түүнд “Багш “Миний цаг ойртож байна. Би танайд шавь нартайгаа хамт Дээгүүр Өнгөрөх баярыг тэмдэглэнэ” гэсэн” гэж хэл гэв.

¹⁹Шавь нар нь Есүсийн айлдсанаар үйлдэж, Дээгүүр Өнгөрөх баярт бэлдэв.

²⁰Орой болоход Тэр шавь нарын хамт ширээнд тухлан сууж байлаа.

²¹Тэднийг зооглон байх үед Тэр-Үнэнээр Би та нарт хэлье. Та нарын нэг чинь Надаас урвана хэмээхэд

²²тэд ихэд гуниглан, дор бүрдээ л Түүнээс-Би биш биз дээ, Эзэн минь! гэцгээв.

²³Тэр-Миний хамт тавганд гараа дүрэгч нь Надаас урвах болно.

²⁴Хүний Хүү Өөрийнх нь тухай бичигдсэнчлэн явна. Харин Хүний Хүүг бариулах тэр хүн золгүй еэ! Тэр хүн төрөөгүй байсан бол дээр байх байсан гэлээ.

²⁵Есүсээс урвасан Иудас-Би биш биз дээ, Рабби? гэхэд Тэр-Чи өөрөө хэллээ гэв.

²⁶Тэднийг зооглон байх үед Есүс хэсэг талх аваад ерөөсний дараа, хуваан шавь нартаа өгөөд, -Май, ид. Энэ бол Миний бие гэлээ.

²⁷Тэгээд Тэр аяга авч, талархлаа өргөөд, тэдэнд өгөнгөө-Үүнээс та нар бүгдээрээ ууцгаа.

²⁸Учир нь энэ бол нүглүүдийн уучлалын тулд олны төлөө урсгах гэрээний Миний цус.

²⁹Харин Би та нарт хэлье. Үүнээс хойш Би энэ усан үзмийн дарсыг та нартай хамт Эцэгийнхээ хаанчлалд дахин шинээр уух өдрийг хүртэл ер уухгүй гэв.

³⁰Тэд магтуу дуулсныхаа дараа, Чидун уул өөд явцгаав.

³¹Тэгэхэд Есүс тэдэнд-Та нар энэ шөнө Надаас болж бүгд бүдрэх болно. Учир нь “Би хоньчинг цохиж унагахад хонин сүрэг тарж бутарна” гэж бичигдсэн билээ.

³²Харин Би амилуулагдсаны дараа, та нараас өмнө Галилд очно гэв.

³³Петр Түүнд-Танаас болж бүгд бүдэрлээ ч, би хэзээ ч бүдрэхгүй гэв.

³⁴Есүс-Үнэнээр Би чамд хэлье. Энэ шөнө азарган тахиа донгодохоос өмнө чи Намайг гурван удаа үгүйсгэнэ дээ гэв.

³⁵Тэгтэл Петр Түүнд-Би хичнээн Тантай хамт үхэх ёстой болсон ч, Таныг үгүйсгэхгүй гэхэд шавь нар бүгдээрээ бас тэгж хэлцгээв.

³⁶Есүс тэдний хамт Гетсемани хэмээн нэрлэдэг газар ирж, шавь нартаа-Намайг тэнд очиж залбирах зуур энд сууцгааж бай гээд,

³⁷Тэр Өөрийн хамт Петр болон Зебедеен хоёр хүүг авч явав. Тэр зовж, шаналж эхлэв.

³⁸Тэгээд тэдэнд-Сэтгэл минь үхтлээ зовж байна. Энд үлдээд, Надтай хамт сэргэг байцгаа гэв.

³⁹Тэр тэднээс жаахан цаашаа яваад, нүүрээрээ унаж, -Эцэг минь, хэрэв боломжтой бол Надаас энэ аягыг өнгөрүүлээч. Гэвч Миний хүслээр биш, харин Таны хүслээр болог гэж залбирлаа.

⁴⁰Тэгээд Тэр шавь нар уруугаа ирж, тэдний унтаж байхыг хараад, Петрт-Та нар чинь Надтай хамт ганцхан цаг ч сэргэг байж чадахгүй улс уу?

⁴¹Соригдохгүйн тулд сэргэг бай, залбир. Сүнс хүсэж байна, харин махан бие сул дорой юм гэв.

⁴²Тэр дахин хоёр дахь удаагаа явж, залбиран-Эцэг минь, хэрэв Би үүнийг уухаас нааш энэ нь өнгөрөхгүй юм бол, Таны хүсэл биелэг гэлээ.

⁴³Есүс дахин ирж, тэдний унтаж байхыг харав. Тэдний нүд анилдаж байлаа.

⁴⁴Тэр тэднийг дахин орхин холдон явж, өмнө хэлснийгээ хэлж, гурав дахь удаагаа залбирав.

⁴⁵Тэгээд Тэр шавь нар дээрээ ирж, -Та нар одоо хүртэл унтаж, амарсаар байна уу? Харагтун. Цаг ойртчихлоо. Хүний Хүү нүгэлтнүүдийн гарт орж байна.

⁴⁶Бос, явцгаая. Харагтун. Намайг бариулагч ойртон ирлээ гэлээ.

⁴⁷Түүнийг ийн ярьж байх зуур арван хоёрын нэг болох Иудас ахлагч тахилч нар болон олон түмний ахлагчдаас илд, шийдэмтэй бөөн хүмүүсийг дагуулан хүрч ирэв.

⁴⁸Түүнээс урваж байсан нэгэн нь тэдэнд-Би хэнийг үнсэнэ, Тэр нь мөн. Түүнийг барь хэмээн битүү дохио өгчээ.

⁴⁹Тэр даруй Есүс уруу очиж, -Амар байна уу, Рабби? гээд Түүнийг үнсэв.

⁵⁰Есүс түүнд-Анд минь, чи яах гэж ирэв? гэлээ. Тэгээд тэд ирээд Есүсийг барьж аваад баривчлав.

⁵¹Есүстэй хамт байсан хүмүүсийн нэг нь гараа сунган илдээ сугалаад тэргүүн тахилчийн боолыг цохиж, чихийг нь тас цавчжээ.

⁵²Есүс түүнд-Илдээ хуйнд нь хий. Илд агсагч бүхэн илдээр хөнөөгдөнө.

⁵³Арван хоёр легионоос олон тэнгэр элчийг одоохон Өөр уруугаа илгээхээр би Эцгээсээ гуйж чадахгүй гэж чи бодож байна уу?

⁵⁴Тэгвэл энэ нь болох ёстой гэсэн Судар яаж биелэгдэх билээ? гэв.

⁵⁵Тэр үед Есүс хурсан олонд-Та нар Намайг дээрэмчин барихтай адил санан илд, шийдэмтэй ирээ юү? Өдөр бүр сүмд байж сургаал заадаг байхад минь та нар Намайг бариагүй.

⁵⁶Харин энэ бүхэн нь эш үзүүлэгчдийн Судар биелэгдэхийн тул болов гэв. Тэгтэл бүх шавь нар Түүнийг орхин зугтав.

⁵⁷Есүсийг барьсан хүмүүс Түүнийг тэргүүн тахилч Каиафт хүргэлээ. Тэнд хуулийн багш нар болон ахлагчид цугласан байв.

⁵⁸Харин Петр мөн Түүнийг алсуур тэргүүн тахилчийн хашаа хүртэл дагаж, дотогш орон, зарц нарын хамт юу болохыг харж суув.

⁵⁹Ахлах тахилч нар хийгээд бүх Зөвлөл Есүсийг хөнөөхийн тулд Түүний эсрэг худал гэрчлэл олохыг оролдсоор байлаа.

⁶⁰Хэдийгээр хуурамч гэрч нар олноор гарч ирсэн боловч, тэд юу ч олсонгүй. Харин сүүлд нь хоёр хүн гарч ирээд,

⁶¹-Энэ хүн “Би Бурханы сүмийг устгаад, гурав хоногийн дотор дахин барьж чадна” гэж хэлж байсан гэв.

⁶²Тэргүүн тахилч босож, Түүнд-Чамд хариулах юм алга уу? Эдгээр хүмүүс Чиний эсрэг юу гэж гэрчилж байгаа юм бэ? гэлээ.

⁶³Гэвч Есүс дуугүй байлаа. Тэгтэл тэргүүн тахилч Түүнд-Чамайг амьд Бурханаар тангараглуулъя. Чи Бурханы Хүү, Христ мөн юм уу? Бидэнд хэлээч гэв.

⁶⁴Есүс түүнд-Та ч өөрөө хэллээ. Харин Би та нарт хэлье. Та нар үүнээс хойш Хүчит Нэгэний баруун талд залрах Хүний Хүүг тэнгэрийн үүлэн дээр залран ирэхийг харах болно гэж айлдав.

⁶⁵Тэргүүн тахилч дээлээ хүү татан, -Тэр Бурханыг доромжлов. Бидэнд өөр гэрчийн хэрэг байна уу? Үзэгтүн. Та нар доромжлолыг сонсоцгоолоо.

⁶⁶Та нар юу гэж бодож байна? гэхэд тэд-Тэр үхэх ёстой гэцгээлээ.

⁶⁷Тэд Түүний нүүр уруу нулимж, Түүнийг нударгалан, зарим нь алгадаад,

⁶⁸-Чамайг хэн цохисныг эш үзүүлээдэх, эрхэм Христ ээ? гэцгээв.

⁶⁹Петрийг гадаа хашаан дотор сууж байтал нэгэн шивэгчин түүнд ойртон ирж, -Чи ч бас Галилын Есүстэй хамт байсан шүү дээ гэхэд

⁷⁰харин тэр бүгдийн өмнө үүнийг үгүйсгээд, -Чиний юу ярьж байгааг би ойлгохгүй байна гэв.

⁷¹Петрийг хашааны хаалга хавьд ирэхэд өөр шивэгчин түүнийг хараад, тэнд байсан хүмүүст-Энэ хүн Назарын Есүстэй хамт байсан гэж хэлэв.

⁷²Тэр дахин үүнийг үгүйсгэж, -Би энэ хүнийг танихгүй хэмээн ам өчгөө өгөв.

⁷³Тэгтэл удалгүй, тэнд зогсож байсан хүмүүс ирээд-Чи тэдний нэг гарцаагүй мөн. Ярианаас чинь л илт байна гэлцэв.

⁷⁴Петр хараал тавин тангараглаж, -Би энэ хүнийг танихгүй гэлээ. Тэр даруйд тахиа донгодов.

⁷⁵Тэгтэл Петр “Тахиа донгодохоос өмнө чи Намайг гурвантаа үгүйсгэнэ дээ” гэж айлдаж байсан Есүсийн үгийг санаад, гадагшаа гарч яван, гашуунаар уйлав.