Read Ариун Библи, Mongolian Ariun Bible, 2004 Матай 27 Bible Online

Матай 27 - Ариун Библи, Mongolian Ariun Bible, 2004 bible

Матай 27

¹Өглөө эрт ахлагч тахилч нар болон олны ахлагчид Есүсийг алуулахаар зөвлөлдөөд,

²Түүнийг хүлж, авч яваад захирагч Пилатад тушаав.

³Түүнээс урвасан Иудас Түүний яллагдсаныг хараад харуусаж, гучин мөнгөн зоосоо ахлах тахилч нар болоод ахлагчдад буцаан өгч,

⁴-Би гэм зэмгүй цуснаас урваснаараа нүгэл үйлдлээ гэхэд тэд-Энэ бидэнд хамаагүй, өөрөө мэд гэв.

⁵Иудас мөнгөн зооснуудыг ариун газарт чулуудаад, явж, өөрийгөө дүүжилжээ.

⁶Ахлах тахилч нар мөнгөн зооснуудыг авч, -Энэ нь цусны үнэ тул үүнийг сүмийн эрдэнэсийн санд хийх нь ёс бус юм гэв.

⁷Тэд зөвлөлдөөд тэр мөнгөөр Ваарчны Талбайг худалдан авч, харийн хүмүүсийг оршуулдаг газар болгов.

⁸Тиймээс тэр талбай энэ өдрийг хүртэл “Цуст Талбай” хэмээгдэх болжээ.

⁹Тийнхүү эш үзүүлэгч Иеремиагаар хэлүүлсэн нь биелэгдсэн бөгөөд тэр “Израилийн хөвгүүдийн Түүнд тогтоосон үнэ болох гучин мөнгөн зоосыг тэд авч,

¹⁰Эзэний надад айлдсан ёсоор Ваарчны Талбайг худалдан авав” гэж хэлсэн байжээ.

¹¹Есүс захирагчийн өмнө зогсов. Захирагч Түүнээс-Та иудейчүүдийн Хаан мөн юм уу? гэж асуухад Есүс-Та ч хэлж байна гэв.

¹²Ахлах тахилч нар болон ахлагчид Есүсийг буруутгахад Тэр юу ч хариулсангүй.

¹³Пилат Түүнд-Тэд Таны эсрэг хичнээн олон зүйл гэрчилж байгааг Та сонсохгүй байна уу? гэхэд

¹⁴Тэр түүнд нэг ч үг хэлсэнгүйд захирагч ихэд гайхжээ.

¹⁵Захирагч баяраар ард олны хүсэлтээр нэг хоригдлыг сулладаг заншилтай байв.

¹⁶Тэр үед тэд Бараб гэгч зард гарсан хоригдлыг хорьсон байлаа.

¹⁷Тэгээд ард олныг цуглах үед Пилат тэдэнд-Та нар хэнийг суллуулахыг надаас хүсэж байна? Барабыг уу, эсвэл Христ гэгдэх Есүсийг үү? гэлээ.

¹⁸Учир нь Түүнийг тэд атаархсандаа барьж өгснийг тэр мэдэж байлаа.

¹⁹Пилатыг шүүгчийн суудалд сууж байх үед эхнэр нь түүнд-Тэр зөвт Хүнд юу ч бүү хий. Би урьд шөнө зүүдэндээ Түүнээс болж ихэд шаналав гэж хэлүүлжээ.

²⁰Харин ахлах тахилч нар болоод ахлагчид олон түмнийг Барабын төлөө гуйж, харин Есүсийг хөнөөлгөхийг ятгасан байлаа.

²¹Захирагч тэдэнд-Энэ хоёрын хэнийг нь суллуулмаар байна? гэхэд тэд-Барабыг гэцгээлээ.

²²Тэгтэл Пилат-Тэгвэл Христ гэгдэх Есүсийг би яах болж байна? гэсэнд тэд бүгд л-Түүнийг цовдол гэцгээв.

²³Пилат-Яагаад, Тэр ямар муу юм үйлдсэн юм бэ? гэж асуусанд харин тэд бүгд-Түүнийг цовдол гэж улам чанга хашхирч байлаа.

²⁴Пилат энэ нь яавч нэмэргүй, харин ч бүр үймээн самуун дэгдэж эхлэхийг хараад, ус авч, хурсан олны өмнө гараа угаан-Би энэ Хүний цусанд буруугүй. Өөрсдөө мэдтүгэй гэжээ.

²⁵Тэгтэл бүх хүмүүс-Түүний цус бидний болон бидний үр хүүхдүүдийн дээр байг гэцгээв.

²⁶Тэгээд тэр Барабыг тэдэнд суллан, Есүсийг ташуурдсаны дараа цовдлуулахаар болжээ.

²⁷Тэгэхэд захирагчийн цэргүүд Есүсийг ордонд авчирч Ромын бүтэн ангийг цуглуулж Түүнийг тойруулав.

²⁸Тэд Түүнийг нүцгэлээд час улаан нөмрөг нөмөргөж,

²⁹үүргэнээр титэм сүлжсэний дараа толгой дээр нь тавьж, баруун гарт нь хулс атгуулжээ. Тэд Түүний өмнө сөгдөж, -Иудейчүүдийн Хаанд мэндчилье хэмээн дооглон,

³⁰Түүн уруу нулимж, хулсыг нь аваад толгой уруу нь цохилоо.

³¹Тэд Есүсийг дооглосны дараа Түүнээс нөмрөгийг нь тайлж хувцсыг нь өмсгөв. Тэгээд Түүнийг цовдлохоор авч явлаа.

³²Тэд гарч явахдаа Курений Симон гэгчтэй тааралдаж түүнийг албадаж Есүсийн загалмайг үүрүүлэв.

³³Тэгээд тэд Гавлын Газар гэсэн утгатай Голгота гэдэг газарт хүрч ирээд

³⁴цөстэй хольсон дарсыг Түүнд уулгахаар өгөв. Тэр хэдийгээр амссан ч уухгүй байв.

³⁵Тэд Түүнийг цовдолсны дараа, хоорондоо шодон хувцсыг нь хувааж аваад,

³⁶суун тэндээ Түүнийг харгалзаж байв.

³⁷Тэд Түүний толгойн дээр “Энэ бол Есүс, иудейчүүдийн Хаан” гэж бичсэн пайзыг хадлаа.

³⁸Тэр үед Түүнтэй хамт хоёр дээрэмчин цовдлуулж, нэг нь баруун талд, нөгөө нь зүүн талд байлаа.

³⁹Дэргэдүүр нь өнгөрөгсөд толгой сэгсрэн, Түүнийг доромжилж

⁴⁰-Сүмийг нурааж, гурав хоногийн дотор барьдаг хүн Чи Өөрийгөө авраач. Хэрэв Чи Бурханы Хүү мөн юм бол, загалмайнаасаа буугаач гэцгээж байлаа.

⁴¹Түүнчлэн ахлагч тахилч нар ч хуулийн багш нар болоод ахлагчдын хамт Түүнийг элэглэн дооглож,

⁴²-Тэр бусдыг аварсан боловч Өөрийгөө аварч чаддаггүй. Тэр бол Израилийн Хаан. Тэр одоо загалмайнаасаа бууг, тэгвэл бид Түүнд итгэнэ.

⁴³Тэр Бурханд найдаж байсан биз дээ. Хэрэв Бурхан Түүнийг таалдаг юм бол одоо л Түүнийг авраг. Энэ хүн чинь “Би бол Бурханы Хүү” гэсэн биз дээ гэцгээв.

⁴⁴Хамт цовдлогдсон дээрэмчид ч Түүнийг мөн доромжилж байлаа.

⁴⁵Зургадугаар цагаас есдүгээр цаг хүртэл бүх газрыг харанхуй нөмрөн авлаа.

⁴⁶Есдүгээр цагийн орчим Есүс чанга дуугаар-Ели, Ели, лама сабахтани? гэж хашхирлаа. Энэ нь “Бурхан минь, Бурхан минь, юунд Та Намайг орхив?” гэсэн үг аж.

⁴⁷Тэнд зогсож байсан хүмүүсийн зарим нь үүнийг сонсоод, -Энэ хүн Елиаг дуудаж байна гэв.

⁴⁸Тэдний нэг нь тэр даруй гүйж, далайн хөвөн авч, цагаан цуу шингээгээд, хулсанд торгоон, Түүнд уулгахаар өглөө.

⁴⁹Харин бусад нь-Елиа Түүнийг аврахаар ирэх эсэхийг харцгаая гэв.

⁵⁰Есүс дахин чангаар хашхираад Өөрийн сүнсээ гаргажээ.

⁵¹Үзэгтүн, сүмийн хөшиг дээрээсээ доош хүртэл хоёр хэсэг болон цуу урагдаж, газар хөдлөн, хад чулуу бут хагаран,

⁵²булш нээгдэн, нойрссон олон ариун хүмүүсийн биес амилуулагдаж,

⁵³Есүсийн амилалтын дараа булшнуудаасаа гарч ариун хотод орж, олон хүнд харагджээ.

⁵⁴Есүсийг харгалзаж байсан зуутын дарга болон харуулууд газар хөдлөлт болон болж буй бүхнийг хараад ихэд айн, -Үнэхээр энэ хүн Бурханы Хүү байжээ гэв.

⁵⁵Есүст үйлчилж, Түүнийг Галилаас дагаж ирсэн олон эмэгтэйчүүд тэнд холоос харж байлаа.

⁵⁶Тэдний дунд Магдалын Мариа болон Иаков, Иосеф хоёрын эх Мариа, мөн Зебедеен хөвгүүдийн эх ч байв.

⁵⁷Орой нь Ариматаас Иосеф гэгч нэгэн баян хүн хүрч ирлээ. Тэр мөн өөрөө Есүсийн шавь болсон ажээ.

⁵⁸Энэ хүн Пилатад бараалхаж, Есүсийн цогцсыг гуйхад Пилат өгөхийг тушаав.

⁵⁹Иосеф цогцсыг аваад, цэвэр маалинган даавуунд ороож,

⁶⁰хаданд ухаж хийсэн өөрийнхөө шинэ булшинд тавьж, бул чулуу өнхрүүлэн булшны амыг таглаад явжээ.

⁶¹Тэнд Магдалын Мариа болон нөгөө Мариа булшны эсрэг талд сууж байв.

⁶²Дараа өдөр нь бэлтгэлийн өдрийн дараахь өдөр байсан бөгөөд ахлах тахилч нар болоод фарисайчууд Пилатынд цуглаж,

⁶³-Эрхэм ээ, тэр мэхлэгч амьд байхдаа “Би гурав хоногийн дараа амилна” гэж хэлж байсныг бид санаж байна.

⁶⁴Тиймээс шавь нар нь ирж Түүнийг хулгайлан аваад, ард олонд “Тэр үхэгсдээс амилав” гэж хэлүүлэхгүйн тул гурав дахь өдөр нь хүртэл булшийг хамгаалахыг тушаагаач. Хэрэв тэгэхгүй бол сүүлчийн мэхлэлт нь эхнийхээсээ ч дор муу юм болно гэцгээлээ.

⁶⁵Пилат тэдэнд, -Харуул аваад яв, хэрхэн хамгаалахаа та нар өөрсдөө мэдэж байгаа биз ээ гэв.

⁶⁶Тэд очоод хадан дээр лац тавьж, харуул гарган булшийг манацгаав.