Read Ариун Библи, Mongolian Ariun Bible, 2004 Матай 9 Bible Online

Матай 9 - Ариун Библи, Mongolian Ariun Bible, 2004 bible

Матай 9

¹Тэр завинд сууж, гатлан явсаар Өөрийн хотдоо ирлээ.

²Хүмүүс саа өвчтэй нэгэн хүнийг дэвсгэртэй нь Түүн уруу авчрахад, Есүс тэдний итгэлийг хараад, саа өвчтэй хүнд-Хүү минь, зоригтой бай. Нүгэл чинь уучлагдсан гэв.

³Хуулийн багш нарын зарим нь-Энэ хүн Бурханыг доромжилж байна хэмээн боджээ.

⁴Есүс тэдний бодлыг мэдээд, -Та нар зүрх сэтгэлдээ юунд бузар мууг бодно вэ?

⁵“Нүгэл чинь уучлагдсан” гэж хэлэх, эсвэл “Босоод алх” гэж хэлэхийн аль нь амархан бэ?

⁶Харин Хүний Хүү газар дээр нүглийг уучлах эрх мэдэлтэйг та нарт мэдүүлэхийн тулд гээд, Тэрээр саа өвчтэй хүнд-Бос, дэвсгэрээ аваад, гэртээ харь гэсэнд,

⁷мөнөөх хүн босож гэрийн зүг явлаа.

⁸Харин олон түмэн үүнийг хараад, айн сүрдэж, хүнд ийм эрх мэдэл өгсөн Бурханыг алдаршуулав.

⁹Есүс тэндээс гарч өнгөрөхдөө татварын газар Матай гэгч хүний сууж байхыг харав. Тэр түүнд-Намайг дага гэхэд тэр босож, Түүнийг дагалаа.

¹⁰Есүсийг айлд ширээнд тухлан байтал олон татвар хураагчид, нүгэлтнүүд ирээд, Есүс болон Түүний шавь нартай хамт идэж байв.

¹¹Үүнийг харсан фарисайчууд Түүний шавь нарт-Яагаад танай багш татвар хураагчид болон нүгэлтнүүдтэй хамт хооллож байдаг билээ? гэжээ.

¹²Харин Есүс үүнийг сонсоод-Эмч эрүүл хүмүүст бус, өвчтэй хүмүүст хэрэгтэй.

¹³Харин явж, “Би тахилыг бус, энэрлийг хүсдэг” гэсэн нь ямар учиртайг мэд. Учир нь Би зөвт хүмүүсийг бус, харин нүгэлтнүүдийг дуудахаар ирсэн юм гэв.

¹⁴Дараа нь Иоханы шавь нар Түүн дээр ирж, -Яагаад фарисайчууд болоод бид мацаг барьдаг, харин Таны шавь нар мацаг барьдаггүй юм бэ? гэж асуухад,

¹⁵Есүс тэдэнд хэлсэн нь-Шинэ хүргэний бараа бологчид хүргэнтэйгээ хамт байхдаа гашуудаж болохгүй биз дээ? Гэвч хүргэн тэднээс аваачигдах өдрүүд ирнэ. Тэгэхэд тэд мацаг барина.

¹⁶Ер нь хэн ч хуучин дээлэн дээр агчаагүй даавуугаар нөхөөс тавихгүй. Тэгвэл нөхөөс дээлийг таталдуулж бүр ихээр урна.

¹⁷Хүмүүс шинэ дарсыг хуучин тулманд хийдэггүй. Тэгвээс тулам сад тавьж, дарс асгарч, тулам хэрэггүй болно. Харин тэд шинэ дарсыг шинэ тулманд хийвэл аль аль нь хэвээрээ байх болно.

¹⁸Есүс тэдэнд эдгээрийг ярьж байх зуур, тэнд нэгэн захирагч ирж, Түүний өмнө мөргөөд, -Миний охин дөнгөж саяхан үхчихлээ. Харин Та очиж түүнд гар хүрвэл охин минь амьдрах болно гэжээ.

¹⁹Есүс босож, түүнийг даган явахад шавь нар нь ч бас хамт явлаа.

²⁰Гэтэл арван хоёр жилийн турш цус алддаг өвчтэй байсан нэгэн эмэгтэй Түүний ард ирж, дээлийнх нь хормойд гар хүрсэн агаад

²¹ингэхдээ тэр эмэгтэй-Хэрэв Түүний дээлд нь л хүрвэл би эдгэнэ гэж өөртөө үглэн байжээ.

²²Харин Есүс эргэнгээ мөнөөх эмэгтэйг хараад-Охин минь, зоригтой бай. Итгэл чинь чамайг эдгээлээ гэлээ. Тэр даруй эмэгтэй эдгэрчээ.

²³Тэгээд Есүс захирагчийн гэрт очоод, бишгүүрчдийг болон дуу шуу болсон олныг харж,

²⁴-Гарцгаа. Охин үхээгүй, харин унтаж байна гэхэд тэд Түүнийг шоолон инээлджээ.

²⁵Тэднийг гарсны дараа Есүс дотогш орж, охины гараас барихад охин босов.

²⁶Энэ тухай зар тэр нутаг даяар таржээ.

²⁷Есүс тэндээс цааш явж байтал хоёр сохор хүн-Давидын Хүү минь ээ. Биднийг энэрээч гэж хашхиран, Түүнийг дагажээ.

²⁸Айлд орсных нь дараа, сохор хүмүүс Түүн уруу ирэхэд Есүс тэдэнд-Намайг үүнийг хийж чадна гэж та нар итгэж байна уу? гэж асуухад тэд-Тийм ээ, Эзэн гэв.

²⁹Тэгээд Есүс тэдний нүдэнд гар хүрч, -Итгэлийн тань дагуу болог гэсэнд

³⁰тэд хараа оржээ. Есүс тэдэнд-Хэн ч үүнийг мэдэж болохгүйг анхаар гэж хатуу сануулав.

³¹Гэвч тэд гараад, Түүний тухай зарыг тэр нутаг даяар тараалаа.

³²Тэднийг гарч явмагц, чөтгөрт эзэмдүүлсэн хэлгүй хүнийг Түүн дээр авчрав.

³³Чөтгөр нь зайлуулагдсаны дараа мөнөөх хэлгүй хүн ярихад олон түмэн гайхаж, -Израильд ийм юм хэзээ ч үзэгдэж байгаагүй гэцгээв.

³⁴Харин фарисайчууд-Тэр чөтгөрүүдийн захирагчаар нь чөтгөрүүдийг хөөдөг юм байна гэж ярьж байлаа.

³⁵Есүс синагогуудад сургаал айлдаж, хаанчлалын сайн мэдээг тунхаглан, бүх төрлийн өвчин эмгэгийг эдгээн, бүх хот тосгоноор явж байлаа.

³⁶Хүмүүсийг хараад Тэр өрөвджээ. Учир нь тэд хоньчингүй хонин сүрэг мэт тарж, туйлдсан байлаа.

³⁷Тэгээд Тэр шавь нартаа-Ургац үнэндээ арвин боловч ажилчид нь цөөн байна.

³⁸Тиймээс ургацын Эзэнээс ургацандаа ажилчдыг явуулахыг залбиран гуйцгаа гэж айлдав.