Read Ариун Библи, Mongolian Ariun Bible, 2004 Марк 15 Bible Online

Марк 15 - Ариун Библи, Mongolian Ariun Bible, 2004 bible

Марк 15

¹Өглөө эрт тэр даруй ахлах тахилч нар, ахлагчид, хуулийн багш нар болон бүх Зөвлөлийн хамт зөвлөлдөөд, Есүсийг хүлж, Түүнийг авч яван Пилатад тушаав.

²Пилат Есүсээс-Та иудейчүүдийн Хаан юм уу? гэж асуусанд, Есүс хариуд нь-Таны хэлж байгаа нь мөн гэлээ.

³Ахлах тахилч нар Есүсийг олон зүйлд буруутгав.

⁴Пилат Түүнээс дахин асууж-Та ямар ч хариулт өгөхгүй юу? Тэд ямар олон зүйл Таны эсрэг тулгаж байгааг хараач гэв.

⁵Гэвч Есүс өөр ямар ч хариулт өгсөнгүйд Пилат ихэд гайхав.

⁶Баяраар тэр хүмүүсийн хүсэлтээр нэг хоригдлыг сулладаг байлаа.

⁷Бослогын үеэр хүн алаад хоригдсон үймээн дэгдээгчдийн дунд Бараб гэгч эр байв.

⁸Хурсан олон ирж, өөрсдийнх нь төлөө юу хийж заншсаны дагуу үйлдэхийг Пилатаас гуйж эхлэв.

⁹Пилат тэдэнд-Иудейчүүдийн Хааныг та нарт суллаж өгөхийг надаас хүсэж байна уу? гэв.

¹⁰Учир нь ахлах тахилч нар атаархснаасаа болж Есүсийг тушаасныг Пилат мэдэж байлаа.

¹¹Гэвч ахлах тахилч нар оронд нь Барабыг сулла гэж гуй хэмээн цугласан олныг ятган үймүүлэв.

¹²Тиймд Пилат тэдэнд дахин-Тэгвэл та нарын иудейчүүдийн Хаан гэж [нэрлээд байгаа] Хүнийг надаар яалгахыг [хүсэж] байна вэ? гэхэд

¹³тэд-Түүнийг цовдол гэж хашхиралдлаа.

¹⁴Харин Пилат-Яагаад, Тэр ямар муу юм хийсэн бэ? гэж хэлэхэд тэд-Түүнийг цовдол гэж бүр ч их хашхирч гарав.

¹⁵Хурсан олонд нийцүүлэхийг хүсээд, Пилат Барабыг тэдэнд суллан, Есүсийг ташуурдуулсны дараа цовдлохыг тушаалаа.

¹⁶Цэргүүд Есүсийг ордны (тэр нь Праеториум юм) хашаанд аваачив. Ромын явган цэргийн бүтэн ангийг цуглуулсан байлаа.

¹⁷Тэд Есүст час улаан нөмрөг өмсгөж, үүргэнээр титэм сүлжээд Түүний дээр тавиад,

¹⁸-Иудейчүүдийн Хаан, мэнд хүргэе гэж тохуурхаж байв.

¹⁹Тэд Түүний толгойг хулсаар цохилж, Түүний өөдөөс нулимж, өвдөг сөхрөн Түүнд мөргөсөөр байлаа.

²⁰Тэд Есүсийг элэглэн дооглосны дараа, улаан нөмрөгийг нь авч, Өөрийнх нь хувцсыг өмсгөв. Тэгээд тэд Түүнийг цовдлохоор гадагш авч явлаа.

²¹Хөдөөнөөс ирээд түүгээр өнгөрч явсан (Александр, Руф хоёрын эцэг) Курений Симонд Есүсийн загалмайг үүрэхийг тэд албадав.

²²Тэд Түүнийг Голгота хэмээх газар (орчуулбал “Гавлын Газар”) авчирлаа.

²³Цэргүүд Есүст мирртэй дарс өгсөн боловч Тэр авсангүй.

²⁴Тэд Есүсийг цовдлоод, хэн юу авахаа үзэхээр шодож хувцсыг нь хоорондоо хуваав.

²⁵Тэд Түүнийг цовдлох үед гуравдугаар цаг байсан юм.

²⁶Ялынх нь пайзан дээр “Иудейчүүдийн Хаан” гэж бичсэн байлаа.

²⁷Цэргүүд Есүстэй хамт хоёр дээрэмчнийг, нэгийг нь баруун талд нь, нөгөөг нь зүүн талд нь цовдолжээ.

²⁸[“Тэр хилэнцэтнүүдийн хамт тоологдсон” гэсэн Судар биелэгдэв. ]

²⁹Түүгээр өнгөрөн явагсад Есүсийг басамжлан доромжилж, толгойгоо сэгсрэн-Өө! Сүмийг устгаад гурван хоногт дахин баригч Та

³⁰Өөрийгөө авраач! Наад загалмайнаасаа буугаач! гэж байлаа.

³¹Мөн түүнчлэн ахлах тахилч нар хуулийн багш нарын хамт Түүнийг элэглэн дооглож, өөр хоорондоо-Тэр бусдыг аварсан. Тэр Өөрийгөө аварч чадахгүй.

³²Израилийн Хаан энэ Христ, одоо загалмайнаасаа буу л даа. Тэгвэл бид хараад, итгэе гэж байв. Есүстэй хамт цовдлогдсон тэр хүмүүс ч мөн адил Түүнийг доромжилж байлаа.

³³Зургадугаар цаг болоход, харанхуй есдүгээр цаг хүртэл бүх газрыг бүрхэв.

³⁴Есдүгээр цагт Есүс чанга дуугаар-Елой, Елой, лама сабахтани? буюу орчуулбал “Миний Бурхан, Миний Бурхан, юунд Та Намайг орхив?” гэж хашхирлаа.

³⁵Тэнд зогсож байсан хүмүүсээс зарим нь үүнийг сонсоод, -Хараач, Тэр Елиаг дуудаж байна гэжээ.

³⁶Нэг нь гүйгээд, далайн хөвөнд цагаан цууг шингээн хулсны үзүүрт тохоод, Түүнд уулгахаар өгөхдөө-Елиа Түүнийг буулгаж авахаар ирэх эсэхийг харцгаая гэв.

³⁷Есүс чанга дуу гаргаад, эцсийн амьсгалаа хураав.

³⁸Сүмийн хөшиг дээрээсээ доошоо хоёр хэсэг болон урагдсан байв.

³⁹Түүний эсрэг талд нь зогсож байсан зуутын дарга Есүсийг эцсийн амьсгалаа хэрхэн авахыг хараад, -Энэ хүн үнэхээр Бурханы Хүү байсан байна гэжээ.

⁴⁰Тэнд бас хэсэг эмэгтэйчүүд холоос ширтэн харж байлаа. Тэдний дунд Магдалын Мариа болон Жижиг гэгддэг Иаков, Иос хоёрын эх Мариа, Саломе нар байв.

⁴¹Тэд Есүсийг Галилд байхад нь дагаж, Түүнд үйлчилдэг байсан юм. Иерусалим уруу Түүнтэй хамт ирсэн өөр олон эмэгтэйчүүд тэнд байсан билээ.

⁴²Амралтын өдрийн урьдах бэлтгэлийн өдрийн орой болох үед,

⁴³Бурханы хаанчлалыг хүлээж байсан Ариматын Иосеф гэгч Зөвлөлийн хүндэт гишүүн ирэв. Тэр зориг гарган Пилатад бараалхаж, Есүсийн цогцсыг гуйхад,

⁴⁴Пилат Есүсийг аль хэдийн үхсэнд гайхан зуутын захирагчийг дуудаад, Түүний аль хэдийн үхсэн эсэхийг асуужээ.

⁴⁵Зуутын захирагчаас энэ тухай баттай мэдээд, Пилат цогцсыг Иосефт өгөв.

⁴⁶Тэр маалинган даавуу худалдан аваад, Түүнийг буулгаж даавуугаараа ороогоод, хаданд ухаж янзалсан булшинд тавив. Тэгээд тэр булшны амыг бул чулуу өнхрүүлж таглажээ.

⁴⁷Магдалын Мариа болон Иосын эх Мариа Түүнийг хаана тавьсныг харж байлаа.