Read Ариун Библи, Mongolian Ariun Bible, 2004 Марк 5 Bible Online

Марк 5 - Ариун Библи, Mongolian Ariun Bible, 2004 bible

Марк 5

¹Тэд нуурын нөгөө эрэг болох Герас нутагт иржээ.

²Түүнийг завинаас буухад тэр даруй бузар сүнстэй хүн булшнаас гарч Есүстэй учрав.

³Тэр хүний орон байр нь булшнуудын дунд байв. Хэн ч түүнийг хүлж чадсангүй, бүр гинжээр ч хүлж чадсангүй.

⁴Учир нь тэр олон удаа гавтай, гинжтэй байсан ч гинжээ тастаж, гаваа хэдэн хэсэг болгон эвдчихдэг байв. Түүнийг номхтгоход хэний ч хүч хүрсэнгүй.

⁵Тэрээр булшнуудын дунд, ууланд өдөр шөнөгүй орилж, чулуугаар өөрийгөө дэлсэнэ.

⁶Есүсийг холоос хараад, тэр гүйн ирж Түүнд мөргөв.

⁷Тэгээд чанга дуугаар хашхиран-Хамгийн Дээд Бурханы Хүү Есүс ээ, Танд би ямар хамаатай билээ? Би Бурханаар Танаас гуйя. Намайг бүү зовоогооч! гэлээ.

⁸Учир нь Есүс-Бузар сүнс чи энэ хүнээс гар гэж айлдсан ажээ.

⁹Есүс түүнээс-Чамайг хэн гэдэг вэ? гэж асуусанд тэр-Бид олуулаа учир намайг Легион гэдэг гэв.

¹⁰Тэгээд тэр Түүнээс өөрсдийг нь энэ нутгаас бүү зайлуулаач гэж хүсэмжлэн гуйж эхлэв.

¹¹Тэнд ууланд гахайн их сүрэг бэлчиж байлаа.

¹²Чөтгөрүүд Есүсээс-Биднийг гахай уруу явуулаач. Бид тэдний дотор оръё гэж гуйхад,

¹³Есүс тэдэнд зөвшөөрөв. Бузар сүнснүүд хүнийг орхиж, гахайнуудад шүглэв. Хоёр мянга орчим гахайн сүрэг эгц эргээс нуур уруу ухасхийж нуурт живцгээлээ.

¹⁴Гахайчид зугтаж, үүнийг хот, тосгодод мэдэгдэв. Тэгээд хүмүүс юу болсныг үзэхээр иржээ.

¹⁵Тэд Есүс уруу ирээд, чөтгөрт, “Легионд” эзэмдүүлж байсан яг тэр хүн хувцасласан, эрүүл саруул сууж байхыг хараад ихэд айв.

¹⁶Үзсэн хүмүүс тэр хүнд юу тохиолдсоныг болон гахайнуудын тухай тэдэнд ярьж өгчээ.

¹⁷Тэд Есүсийг нутгаасаа явахыг гуйж эхлэв.

¹⁸Есүсийг завинд суух үед чөтгөрт эзлэгдсэн байсан өнөөх хүн өөртэй нь хамт байя гэж гуйсанд,

¹⁹Есүс зөвшөөрсөнгүй, харин түүнд-Гэртээ, өөрийнхөн дээрээ оч. Эзэн чамд ямар агуу зүйлс хийж, чамд хэрхэн өршөөлөө үзүүлснийг тэдэнд мэдэгд гэв.

²⁰Тэр явж, Есүс өөрийнх нь төлөө ямар агуу зүйлс хийж өгснийг Декаполис хэмээх газарт зарлаж эхлэв. Хүн бүр гайхацгааж байлаа.

²¹Есүс [завиар] нөгөө эрэг уруу дахин гаталж ирэх үед Түүн уруу олон хүн хуран цуглажээ. Есүс нуурын эрэг дээр байв.

²²Синагогийн ахлагчдын нэгэн болох Иайр гэгч хүн ирж, Есүсийг хараад хөлд нь унаж,

²³-Бяцхан охин маань үхлийн ирмэг дээр байна. Та очиж мутраа тавиач. Тэгвэл тэр минь эдгэж, амьдрах байх гэж ихэд хүсэмжлэн гуйв.

²⁴Есүс түүнтэй хамт явахад хурсан олон Түүнийг дагаж, бүчин шахалдаж байлаа.

²⁵Арван хоёр жилийн турш цус алддаг өвчтэй байсан нэгэн эмэгтэй байв.

²⁶Тэр эмэгтэй олон эмчийн гарт шаналж, өөртөө байсан бүгдийг зарцуулсан боловч ямар ч тус болсонгүй, харин ч бие нь улам мууджээ.

²⁷Есүсийн тухай сонссоны дараа тэрээр хүмүүсийн дундуур явсаар Түүний ард очиж, гадуур хувцсанд нь хүрэв.

²⁸Учир нь тэр-Хэрэв би зөвхөн Түүний хувцсанд нь хүрвэл эдгэрнэ гэж өөртөө хэлжээ.

²⁹Тэр даруй түүний цус гоожих нь татарч, өвчнөөс салснаа биеэрээ мэдрэв.

³⁰Есүс тэр даруй Өөрөөс нь хүч гарсныг мэдээд, олон түмэн уруу эргэн харж, -Хэн Миний хувцсанд хүрэв? гэж асуулаа.

³¹Шавь нар нь Түүнд-Хурсан олон Таныг шахаж байгааг Та хар л даа. Тэгтэл Та “Хэн Надад хүрэв?” гэх юм гэлээ.

³²Есүс үүнийг үйлдсэн тэр эмэгтэйг харах гэж эргэн тойрноо ажиглав.

³³Юу болсныг мэдсэн тэр эмэгтэй айж чичирсээр ирж, Есүсийн өмнө унав. Тэгээд бүх үнэнээ хэлжээ.

³⁴Есүс түүнд-Охин минь, итгэл чинь чамайг эдгээлээ. Амар тайван явж, зовлонгоосоо ангижрагтун гэв.

³⁵Түүнийг ийн айлдаж байтал синагогийн ахлагчийн гэрээс хүмүүс ирж-Таны охин нас барчихлаа. Багшид төвөг удаад яах вэ? гэжээ.

³⁶Гэвч Есүс үүнийг сонсоод, синагогийн ахлагчид-Бүү ай. Зөвхөн итгэ гэж айлдав.

³⁷Тэгээд Тэр Петр, Иаков, Иаковын дүү Иохан нараас өөр хэнийг ч Өөртэйгөө хамт явахыг зөвшөөрсөнгүй.

³⁸Тэд синагогийн ахлагчийн гэрт ирэв. Уймарсан, чангаар уйлж хайлсан хүмүүсийг Тэр харав.

³⁹Оруутаа Тэр тэдэнд-Юунд та нар уймарч уйлалдана вэ? Энэ хүүхэд үхээгүй. Харин унтаж байна гэсэнд,

⁴⁰тэд Түүнийг тохуурхан инээлдэж эхлэв. Гэвч Есүс бүх хүнийг гаргаж, зөвхөн өнөөх хүүхдийн аав ээжийг нь Өөрийнхөө нөхдийн хамт авч хүүхдийг тавьсан өрөөнд оров.

⁴¹Хүүхдийн гараас барьж Тэр түүнд-Талита кум (орчуулбал “Бяцхан охин минь, Би чамд хэлж байна. Бос!”) гэж айлдав.

⁴²Тэр даруй охин босоод явж эхлэв. Тэр арван хоёр настай байжээ. [Тэр даруй] тэд бүр гайхаж орхив.

⁴³Тэр-Энэ тухай хэн ч мэдэх ёсгүй гэж тэдэнд хатуу сануулаад, -Охинд идэх юм өг гэлээ.