Read Ариун Библи, Mongolian Ariun Bible, 2004 Лук 1 Bible Online

Лук 1 - Ариун Библи, Mongolian Ariun Bible, 2004 bible

Лук 1

¹Бидний дунд биелсэн үйл явдлуудын талаар олон хүн эмхтгэхээр шийдсэн билээ.

²Анхнаас нь нүдээр гэрчлэгчид хийгээд үгийн үйлчлэгчид бидэнд тэдгээрийг уламжилсанчлан,

³бүгдийг эхнээс нь нягтлан судалсан тул танд түүнийг дэс дараалан бичиж өгөх нь надад бас зохистой санагдлаа, эрхэм хүндэт Теофил минь.

⁴Энэ нь танд заасан зүйлсийн талаарх гарцаагүй үнэнийг танд таниулахын тулд юм шүү.

⁵Иудейн хаан Херодын өдрүүдэд Абиагийн бүлгийн Захариа нэртэй нэгэн тахилч байжээ. Түүний эхнэр нь Аароны охидоос гаралтай бөгөөд түүнийг Елизабет гэдэг байв.

⁶Тэд хоёулаа Эзэний аливаа тушаал шаардлагыг гэм зэмгүйгээр дагаж, Бурханы өмнө зөвт байлаа.

⁷Елизабет хүүсэр байсан учир тэд үр хүүхэдгүй байв. Тэгээд ч тэд хоёулаа өтөлсөн байв.

⁸Захариа бүлгийнхээ ээлж ёсоор Бурханы өмнө тахилчийн албыг гүйцэтгэж байх зуур ийм явдал тохиожээ.

⁹Тахилчийн ёслолын заншлаар шодоход, Эзэний сүмд орж утлага уугиулах үүрэг түүнд таарсан байна.

¹⁰Утлага уугиулах цагт, цугларсан олон бүгд гадаа нь залбирцгааж байжээ.

¹¹Эзэний тэнгэр элч утлагын тахилын ширээний баруун талд зогсож байгаа нь түүнд үзэгдэв.

¹²Захариа түүнийг хармагцаа сандарч, айжээ.

¹³Харин тэнгэр элч түүнд хандан-Захариа аа, бүү ай. Учир нь чиний гуйлт сонсогдсон бөгөөд эхнэр Елизабет чинь чамд хүү төрүүлнэ. Чи түүнд Иохан гэдэг нэр өгөх болно.

¹⁴Чи баяр жаргалтай болж, олон хүн түүнийг төрөхөд баясна.

¹⁵Учир нь тэр Эзэний өмнө агуу болох бөгөөд дарс, эсвэл согтоох ундааг хэзээ ч амсахгүй. Эхийнхээ хэвлийд байхдаа ч Ариун Сүнсээр тэр дүүрэн байх болно.

¹⁶Тэр Израилийн хөвгүүдээс олныг Бурхан Эзэнд нь эргүүлэн хандуулах болно.

¹⁷Эцгүүдийнх нь зүрхийг хүүхдүүд уруу нь, дуулгаваргүй нэгнийг зөвт хүмүүсийн мэргэн ухаанд буцаахын тулд Эзэний өмнө Елиагийн хүч болоод сүнс дотор явна. Тийнхүү Эзэний төлөө бэлтгэгдсэн хүмүүсийг бэлэн болгох юм гэжээ.

¹⁸Захариа тэнгэр элчид-Би үүнийг хэрхэн мэдэх билээ? Би хөгшин хүн, эхнэр маань ч өтөлсөн гэхэд,

¹⁹тэнгэр элч хариуд нь түүнд-Би бол Бурханы оршихуйд зогсогч Габриел гэгч агаад энэхүү сайн мэдээг чамд авчирч өгөн, чамд хэлэхээр илгээгдсэн юм.

²⁰Харагтун, цаг нь болохоор биелэгдэх үгэнд минь чи итгээгүй учраас эдгээр нь биелэгдэх өдрийг хүртэл чи хэлгүй болж, ярьж чадахгүй гэлээ.

²¹Хүмүүс Захариаг хүлээн, түүнийг сүмд удсанд гайхацгааж байлаа.

²²Харин тэр гарч ирээд тэдэнтэй ярьж чадсангүй. Сүм дотор тэр үзэгдэл үзсэн юм байна гэж тэд ойлгов. Харин Захариа тэдэнд дохиж зангасаар байсан ба тийнхүү хэлгүй хэвээр хоцров.

²³Тахилчийн алба гүйцэтгэх өдрүүд дуусахад, тэр гэртээ харив.

²⁴Хэд хоногийн дараа эхнэр Елизабет нь жирэмслэн, таван сарын турш хүний нүдэнд үл өртөж,

²⁵-Хүмүүсийн дунд буй шившгийг минь зайлуулахаар Эзэн над уруу таалан харж, энэ өдрүүдэд үүнийг надад бүтээн өгсөн нь энэ ажээ гэв.

²⁶Тэнгэр элч Габриелыг Бурхан Галилын Назар хот уруу зургадугаар сард илгээсэн ажээ.

²⁷Габриел Давидын удмын Иосеф гэдэг хүнтэй сүй тавьсан онгон бүсгүйн гэрт хүрч ирлээ. Түүнийг Мариа гэдэг байв.

²⁸Орж ирээд тэнгэр элч түүнд-Ивээгдэгч ээ, баярла! Эзэн чамтай хамт байна гэв.

²⁹Харин Мариа энэ үгэнд ихэд цочиж, энэ нь юун мэндчилгээ байж болох талаар бодож цэгнэв.

³⁰Тэнгэр элч түүнд-Мариа, бүү ай. Чи Бурханы ивээлийг олжээ.

³¹Үзэгтүн, чи хэвлийдээ үртэй болж хүү төрүүлнэ. Түүнийг чи Есүс гэж нэрлэх болно.

³²Тэр Хүү аугаа Нэгэн болох ба Хамгийн Дээдийн Хүү гэж дуудагдана. Эзэн Бурхан Түүнд өвөг Давидынх нь хаан ширээг өгөх болно.

³³Тэр Иаковын гэрийг үүрд хаанчлах бөгөөд Түүний хаанчлалд төгсгөл байхгүй байна гэсэнд,

³⁴Мариа тэнгэр элчид-Би онгон атал энэ нь яаж бүтэх билээ? гэхэд

³⁵тэнгэр элч-Ариун Сүнс чам дээр ирж, Хамгийн Дээдийн хүч чамайг бүрхэнэ. Тиймээс төрөх ариун нэгэн нь Бурханы Хүү гэж дуудагдах болно.

³⁶Үзэгтүн, чиний садан Елизабет мөн өтөл насандаа хүүтэй болж, хүүсэр гэгдэж байсан тэр эмэгтэй одоо зургаан сартай.

³⁷Учир нь Бурханд боломжгүй юм гэж нэг ч байхгүй гэж хэлэв.

³⁸Мариа-Эзэний шивэгчнийг харагтун. Хэлсэн үгсийн тань дагуу надад биелэх болтугай гэхэд нь тэнгэр элч түүнийг орхин одлоо.

³⁹Тэр өдрүүдэд Мариа босоод уулархаг нутгийг зорин Иудагийн нэгэн хот уруу яаран явж,

⁴⁰Захариагийн гэрт орж Елизабеттай мэндлэв.

⁴¹Елизабет Мариагийн мэндийг сонсмогц хэвлий дэх хүүхэд нь хөдлөв. Елизабет Ариун Сүнсээр дүүрч,

⁴²чанга дуугаар хашхиран-Эмэгтэйчүүдийн дундаас ерөөлтэй нь чи мөн. Хэвлий дэх үр чинь ерөөлтэй еэ!

⁴³Эзэний минь эх над дээр ирж яаж болох билээ?

⁴⁴Харагтун, мэндийн дуу чинь миний чихнээ сонсогдмогц хэвлий дэх үр минь баярлан хөдлөв.

⁴⁵Эзэнээс өөрт нь айлдсан зүйл биелнэ гэдэгт итгэсэн тэр эмэгтэй ерөөлтэй еэ! хэмээв.

⁴⁶Мариа-Сэтгэл минь Эзэнийг дээдэлнэ,

⁴⁷сүнс минь ч миний Аврагч Бурханд баяссан.

⁴⁸Учир нь Эзэн шивэгчнийхээ даруу байдлыг харав. Харагтун, энэ цагаас хойш бүх үеийнхэн намайг ерөөлтэй гэж тооцох болно.

⁴⁹Учир нь Хүчит Нэгэн миний төлөө агуу үйлсийг хийв. Түүний нэр ариун билээ.

⁵⁰Түүний өршөөл Түүнээс эмээгчдэд үеэс үед дамжин байх болно.

⁵¹Тэр Өөрийн мутраар хүчит үйлсийг бүтээж, зүрхнийхээ бодлуудад бардамнагчдыг тараасан билээ.

⁵²Удирдагчдыг сэнтийнээс нь буулган, даруу байгсдыг Тэр өргөмжлөв.

⁵³Өлссөн хүмүүсийг сайнаар бялхуулж, баячуудыг гар хоосон буцаав.

⁵⁴Өөрийнхөө зарц болох Израильд Тэр туслан, өршөөлөө дурсаж,

⁵⁵бидний эцэг өвгөдөд айлдсанчлан, Абрахамыг болоод үр удмыг нь үүрд өршөөнө

⁵⁶Мариа Елизабетын хамт гурван сар орчим байгаад, гэртээ буцлаа.

⁵⁷Елизабетын төрөх цаг нь болж, хүү төрүүлэв.

⁵⁸Эзэн түүнд агуу өршөөлөө үзүүлснийг хөршүүд нь болон төрөл садангууд нь дуулаад хамтдаа баярлаж байлаа.

⁵⁹Ингээд найм дахь өдөр нь тэд хүүхдийн хөвчийг хөндөхөөр ирээд, хүүг эцгийнх нь нэрээр Захариа гэж нэрлэх гэхэд нь

⁶⁰түүний эх-Үгүй, тэр Иохан гэж дуудагдах болно гэв.

⁶¹Тэд түүнд-Чиний төрөл садан дотор ийм нэртэй хүн ер байхгүй шүү дээ гээд,

⁶²эцгээс нь хүүг хэн гэж нэрлэхийг хүсэж байгааг нь дохио зангаагаар асуухад,

⁶³Захариа самбар гуйж, дээр нь “Хүүгийн нэр нь Иохан” гэж бичихэд тэд бүгд гайхаж хоцров.

⁶⁴Тэр даруй түүний хэл, ам нь нээгдэн, Бурханыг магтан ярьж эхлэв.

⁶⁵Тэдний эргэн тойронд амьдардаг бүх хүмүүс айдаст автаж, Иудейн бүх уулархаг нутгаар энэ бүхний тухай яриа болж байлаа.

⁶⁶Үүнийг сонссон бүхэн бодол санаандаа хадгалж-Энэ хүүхэд тэгвэл юу болох бол? гэцгээж байв. Учир нь Эзэний мутар гарцаагүй түүний хамт байлаа.

⁶⁷Эцэг Захариа нь Ариун Сүнсээр дүүрч, эш үзүүлэн,

⁶⁸-Израилийн Бурхан Эзэн магтагдах болтугай!Юу гэвэл Тэр бидэн уруу ирж, Өөрийн ард түмний төлөөх золилтыг гүйцээсэн.

⁶⁹Өөрийн зарц Давидын гэрт бидний төлөөх авралын эврийг босгов.

⁷⁰(Тэр эртнээс ариун эш үзүүлэгчдийнхээ амаар дамжуулан айлдсанчлан)

⁷¹Энэ нь дайснуудаас маань болоод биднийг үзэн ядагсдын гараас аврах аврал бөгөөд

⁷²эцэг өвгөдөд минь өршөөл үзүүлж, Өөрийн ариун гэрээгээ дурсахын тулд юм.

⁷³Тэр гэрээ нь бидний эцэг Абрахамд тангарагласан тангараг бөгөөд

⁷⁴дайснуудын гараас авраад, айдас түгшүүргүйгээр

⁷⁵бид бүх өдрүүдийнхээ туршТүүний өмнө ариун болоод зөвт байдал доторТүүнд үйлчлэхийн тулд болой.

⁷⁶Хүү, чи Хамгийн Дээд Нэгэний эш үзүүлэгч гэж дуудагдана. Учир нь чи Түүний замыг бэлдэхийн тулдЭзэний өмнө явах болно.

⁷⁷Энэ нь Түүний ард түмэнд авралын мэдлэгийг нүглүүдийнх нь уучлалаар өгөхийн тулд юм.

⁷⁸Бидний Бурханы нигүүлсэнгүй өршөөлөөрМандах нар нь дээрээс бидэнд айлчлан ирэх нь

⁷⁹харанхуй ба үхлийнсүүдэрт суугсдын дээр гийж, бидний хөлийг энх тайвны зам уруу чиглүүлэхийн тулд юм

⁸⁰Хүүхэд өссөөр, сүнсээр хүчирхэг болсон бөгөөд Израилийн өмнө гарч ирэх өдрөө хүртэл цөлд амьдрав.