Read Ариун Библи, Mongolian Ariun Bible, 2004 Лук 19 Bible Online

Лук 19 - Ариун Библи, Mongolian Ariun Bible, 2004 bible

Лук 19

¹Есүс Иерихог дайрч өнгөрөв.

²Харагтун, Закхай гэгч хүн байв. Тэр нь татвар хураагчдын ахлагч бөгөөд баян хүн ажээ.

³Есүс гэж хэн болохыг харахаар зүтгэж байсан боловч биеэр бага тул цугласан олноос болоод харж чадахгүй байв.

⁴Тэгээд тэр түрүүлэн гүйж, Түүнийг харах гэж инжир модонд авиран гарав. Учир нь Есүс тэр замаар дайрч өнгөрөх гэж байв.

⁵Есүс тэнд хүрч ирээд, дээш харж түүнд-Закхай, түргэл, буугаад ир. Өнөөдөр Би танайд очих ёстой гэжээ.

⁶Тэр шалавхан бууж, Түүнийг баяртайгаар хүлээн авав.

⁷Үүнийг харсан хүн бүхэн дургүйцэж, -Есүс нүгэлтнийд хоноглох гэнэ гэцгээж байлаа.

⁸Закхай зогсоод Эзэнд-Хараач, Эзэн, өөрийнхөө хөрөнгөний хагасыг би ядууст өгнө. Хэрэв би хэн нэгнээс залилан авсан байвал, түүнийгээ дөрөв дахин нугалж эргүүлэн өгнө гэсэнд

⁹Есүс түүнд-Өнөөдөр энэ айлд аврал ирлээ. Учир нь тэр ч гэсэн Абрахамын хүү мөн.

¹⁰Хүний Хүү алдагдсаныг хайж, аврахаар ирсэн билээ гэв.

¹¹Тэд энэ бүхнийг сонсох зуур Тэр нэгэн сургаалт зүйрлэл айлдав. Учир нь Тэр Иерусалимаас холгүй байсан тул, тэд Бурханы хаанчлал тэр даруй бий болох юм хэмээн бодож байлаа.

¹²Тэр-Нэгэн сурвалжит хүн хаанчлалыг хүлээн аваад буцаж ирэхээр алс холын оронг зорьжээ.

¹³Тэр арван боолоо дуудаж, тэдэнд арван мина өгөөд “Намайг буцаж иртэл энэ мөнгөөр ажил хэрэг явуул” гэжээ.

¹⁴Харин түүний иргэд нь түүнийг үзэн яддаг байсан тул, араас нь элч илгээн, “Энэ хүн биднийг захирахыг бид үл хүснэ” гэж хэлүүлжээ.

¹⁵Мөнөөх хүн хаанчлалаа хүлээн авсны дараа буцаж ирэв. Тэгээд мөнгө өгсөн боолууд нь ямар ажил эрхлэн явуулсныг мэдэхээр тэднийг дуудуулж гэнэ.

¹⁶Эхний хүн ирж “Эзэн, таны нэг мина арван мина болсон” гэхэд

¹⁷тэр түүнд “Сайн боол, сайн байна. Чи маш бага юманд итгэмжтэй байсан тул арван хот захирах эрх мэдэлтэй боллоо” гэжээ.

¹⁸Хоёр дахь нь ирж, “Эзэн, таны нэг мина таван мина болсон” гэхэд

¹⁹тэр түүнд мөн “Чи таван хот захирах эрхтэй” гэлээ.

²⁰Өөр нэг нь ирж, “Эзэн, үзэгтүн, би таны нэг минаг алчууртаа боогоод хав дарчихсан.

²¹Та тавиагүй хэрнээ авдаг, тариалаагүй хэрнээ хураадаг чанга хүн тул би танаас айсан юм” гэсэнд

²²тэр “Зохисгүй боол чамайг үгээр чинь Би шүүнэ дээ. Чи намайг тавиагүй хэрнээ авдаг, тариалаагүй хэрнээ хураадаг чанга хүн гэдгийг мэддэг байх нь уу?

²³Тэгвэл чи мөнгийг минь юунд банкинд өгсөнгүй вэ? Тэгсэн бол би буцаж ирээд, хүүтэй нь авах байсан юм” гээд,

²⁴дэргэдээ байгсдад “Түүнээс нэг минаг авч, арван минатай хүнд өгсүгэй” гэв.

²⁵Тэд “Эзэн, түүнд арван мина байгаа шүү дээ” гэхэд,

²⁶“Би та нарт хэлье. Хэнд байна, түүнд илүү өгөгдөнө. Харин хэнд байхгүй байна, түүнээс байгаа нь ч авагдана.

²⁷Надаар өөрсдийгөө хаанчлуулахыг хүсээгүй миний дайснуудыг нааш авчирч, миний өмнө тэднийг хөнөөгтүн” гэж зарлиг буулгажээ гэв.

²⁸Эдгээрийг айлдсаны дараа Есүс Иерусалимын зүг тэргүүлэн явав.

²⁹Тэгээд Тэр Чидун хэмээх уулын бэлд байх Бетфаг болон Бетанд хүрч ирээд, шавь нараасаа хоёрыг илгээн,

³⁰-Та нар зэргэлдээх суурин уруу яв. Тэнд очоод, та нар урьд нь хүн ер унаж байгаагүй илжигний дудранг олно. Тайлаад энд аваад ир.

³¹Хэрэв хэн нэгэн та нараас “Та нар юунд түүний уяаг тайлна вэ?” гэвэл, “Эзэнд хэрэгтэй байна” гэж хэл гэжээ.

³²Явсан хоёр Түүний айлдсанчлан байгааг олж харав.

³³Тийнхүү тэд дудрангийн уяаг тайлах үед эзэн нь тэднээс-Та нар юунд дудрангийн уяаг тайлав? гэхэд

³⁴тэд-Эзэнд хэрэгтэй байна гэв.

³⁵Тэд дудранг хөтлөн ирэхэд, хүмүүс түүн дээр хувцсаа тохоцгоож, Есүсийг мордуулав.

³⁶Түүнийг тийн явах зуур хүмүүс зам дээр нь хувцсаа дэвсэж байлаа.

³⁷Есүсийг Чидун уулын бэлд ирэх үед дагалдан яваа олон түмэн бүгдээрээ өөрсдийн үзсэн хамаг гайхамшгуудын төлөө чанга дуугаар баяртайгаар Бурханыг магтацгааж,

³⁸-Эзэний нэрээр ирэгч Хаан ерөөлтэй еэ! Амар тайван нь тэнгэрт, алдар нь хамгийн дээр байх болтугай! гэж байлаа.

³⁹Олны дунд байсан зарим фарисайчууд Түүнд-Багш аа, шавь нараа зэмлээч гэсэнд

⁴⁰Тэр-Би та нарт хэлье. Хэрэв тэд дуугаа хураавал, чулуунууд хашхирна шүү гэв.

⁴¹Тэгээд Есүс ойртон ирж, хотыг хараад түүний төлөө уйлж,

⁴²-Хэрэв чи энэ өдөр амар тайванд юу хүргэхийг мэдсэнсэн бол! Харин эдүгээ энэ нь нүднээс чинь далдлагдав.

⁴³Дайснууд чинь чиний эсрэг бэхлэлт босгон чамайг бүсэлж, тал талаас чинь бүчих өдрүүд ирэх үед

⁴⁴чамайг болон чиний дотор хүүхдүүдийг чинь газартай тэгшлэх болно. Тэд чиний дотор чулууг чулуун дээр нь орхихгүй. Учир нь чам дээр Бурханы ирсэн цагийг чи мэдээгүй юм гэв.

⁴⁵Тэр сүмд орж, худалдаачдыг хөөн гаргаад,

⁴⁶тэдэнд-“Миний гэр бол залбирлын гэр байх ёстой” гэж бичигдсэн байтал та нар сүмийг дээрэмчдийн үүр болгожээ гэв.

⁴⁷Есүс өдөр бүр сүмд сургаалаа заадаг байлаа. Харин ахлах тахилч нар, хуулийн багш нар болон олны ахлагчид Түүнийг хөнөөхийг оролдовч,

⁴⁸ард олон бүгдээрээ Түүний үгийг анхааралтай сонсож байсан тул тэд яаж ч чадахгүй байлаа.