Read Ариун Библи, Mongolian Ariun Bible, 2004 Лук 22 Bible Online

Лук 22 - Ариун Библи, Mongolian Ariun Bible, 2004 bible

Лук 22

¹Дээгүүр Өнгөрөх хэмээдэг Исгээгүй Талхны Баяр ойртож байлаа.

²Ахлах тахилч нар болон хуулийн багш нар Түүнийг хэрхэн хөнөөх аргаа хайж байв. Учир нь тэд олон түмнээс айж байжээ.

³Арван хоёрын нэг болох Искариот гэгддэг Иудаст Сатан шүглэв.

⁴Тэр явж, Есүсийг яаж бариулах талаар ахлах тахилч нар болоод түшмэдтэй зөвлөлдөв.

⁵Тэд баярлаж, түүнд мөнгө өгөхөөр тохиролцжээ.

⁶Иудас ч санаа нийлж, Түүнийг тэдэнд хурсан олноос зайдуухан барьж өгөх аятай завшааныг эрэлхийлж эхлэв.

⁷Дээгүүр Өнгөрөх баярын хургыг нядлах Исгээгүй Талхны Баярын эхний өдөр болов.

⁸Есүс Петр, Иохан нарыг илгээн-Явж, бидний зооглох Дээгүүр Өнгөрөх баярын зоогийг бэлд гэв.

⁹Тэд Түүнд-Биднээр хаана бэлдүүлэхийг Та хүсэж байна вэ? гэхэд

¹⁰Тэр тэдэнд-Харагтун, та нарыг хот уруу ороход, устай ваар барьсан нэгэн хүн та нартай тааралдана. Тэр хүний орох гэр уруу ор.

¹¹Тэгээд та нар гэрийн эзэнд “Багш, “Би шавь нарынхаа хамт Дээгүүр Өнгөрөх баярын зоог барих тохитой өрөө хаана байна вэ?” гэж танд хэлүүлэв” гэж хэл.

¹²Тэр та нарт дээд давхрын тавилгатай том өрөөг үзүүлнэ. Тэнд зоог бэлд гэжээ.

¹³Тэд явж, Түүний айлдсаар бүгдийг ёсоор нь биелүүлж, Дээгүүр Өнгөрөх баярт бэлдэв.

¹⁴Цаг болоход Тэр тухлан суулаа. Элч нар Түүнтэй хамт байв.

¹⁵Есүс тэдэнд-Би зовохоосоо өмнө энэхүү Дээгүүр Өнгөрөх баярын зоогийг та нарын хамт барихсан гэж ихэд хүссэн билээ.

¹⁶Би та нарт хэлье. Энэ нь Бурханы хаанчлалд биелэгдтэл Би хэзээ ч дахиж зоог барихгүй гээд,

¹⁷Тэр аягыг авч, талархал өргөөд-Үүнийг авч, дундаа хүртэцгээ.

¹⁸Учир нь Би та нарт хэлье. Үүнээс хойш Бурханы хаанчлал иртэл усан үзмийн дарснаас Би амсахгүй гэв.

¹⁹Тэр талх авч, талархал өргөөд, тэдэнд хуваан өгөхдөө-Энэ бол та нарын төлөө өгөх Миний бие мөн. Намайг дурсаж үүнийг үйлд гэж айлдав.

²⁰Тийн идэцгээсний дараа Тэр мөн аяга авч, -Энэ нь та нарын төлөө асгагдах Миний цусаар тогтоох шинэ гэрээ юм.

²¹Харин үзэгтүн, Надаас урвагч нэгний гар Миний хамт ширээн дээр байна.

²²Учир нь үнэхээр Хүний Хүү оногдсоноороо явж байна. Харин Түүнээс урвагч хүн золгүй еэ! гэв.

²³Тэд өөр хоорондоо-Бидний хэн нь тийм зүйл хийх юм бол? хэмээн ярилцаж эхлэв.

²⁴Тэрчлэн тэдний дунд хэн нь хамгийн агуу нь байх талаар ч маргаан дэгджээ.

²⁵Тэр тэдэнд-Харь үндэстнүүдийн хаад ард олноо ноёрхдог бөгөөд эрх баригчид нь “Буянтнууд” хэмээгддэг.

²⁶Харин та нар тийм байж болохгүй. Та нарын дотроос хамгийн агуу нь хамгийн өчүүхэн нь мэт болог, удирдагч нь зарц мэт байг.

²⁷Ширээнд тухлагч, үйлчлэгч хоёрын хэн нь агуу вэ? Ширээнд тухлагч нь биш гэж үү? Харин Би та нарын дунд үйлчлэгч мэт байдаг.

²⁸Намайг сорилтод байх үед Миний хажууд зогсож байсан нь та нар мөн.

²⁹Миний Эцэг Надад хаанчлалыг өгсөнчлөн, Би та нарт өгнө.

³⁰Та нар Миний хаанчлалд Миний ширээнээ идэж уун, Израилийн арван хоёр овгийг шүүн сэнтийд залрах болно.

³¹Симон оо, Симон оо, үзтүгэй, чамайг улаан буудай мэт шигшихийн тул Сатан зөвшөөрөл гуйсан.

³²Гэсэн ч итгэл чинь сульдахгүйн тулд Би чиний төлөө залбирсан. Чи нэгэн цагт дахин эргэж, ах дүүсээ батжуул гэхэд

³³тэр Түүнд-Эзэн минь, Тантай хамт шоронд ороход ч, үхэхэд ч би бэлэн байна гэв.

³⁴Есүс-Петр ээ, Би чамд хэлье. Өнөөдөр чи Намайг танихгүй гэж гурвантаа үгүйсгэх хүртэл чинь тахиа донгодохгүй гэв.

³⁵Тэгээд Тэр тэдэнд хандан-Би та нарыг хүүдийгүй, богцгүй, шаахай ч үгүй явуулахад та нар ямар нэг юмаар дутсан уу? гэж айлдахад тэд-Үгүй, юугаар ч дутаагүй гэв.

³⁶Тэр тэдэнд-Харин одоо, хэнд хүүдий байна, түүнийгээ аваг. Хэнд богц байна, бас аваг. Хэн илдгүй байна, тэр хүн дээлээ зарж, илд худалдаж аваг.

³⁷Учир нь Би та нарт хэлье. “Тэр нүгэлтнүүдийн хамт тоологдсон” гэж бичигдсэн нь Надад биелэгдэхийн тулд энэ бүгд нь хэрэгтэй гэв.

³⁸Тэгтэл тэд-Эзэн, хараач, энд хоёр илд байна гэхэд Тэр-Энэ чинь хангалттай гэв.

³⁹Тэгээд Тэр тэндээс гарч, заншсан ёсоороо Чидун уул өөд өгсөв. Шавь нар ч Түүнийг дагалаа.

⁴⁰Тэнд ирээд Тэр тэдэнд хандаж, -Сорилтод орохгүйн тулд та нар залбирцгаа гээд

⁴¹Тэр тэднээс чулуу шидэх зайтай холдон, өвдөг сөгдөөд ингэж залбирав.

⁴²-Эцэг минь, хэрэв Та хүсэж байгаа бол энэ аягыг Надаас зайлуулаач. Гэвч Миний хүсэл бус, харин Таны хүсэл биелэгдэг гэв.

⁴³Тэгтэл тэнгэрээс тэнгэр элч Түүнд үзэгдэн, Түүнийг тэнхрүүлж байлаа.

⁴⁴Тэр зовж, шаналж байсан тул маш шаргуу залбирч байлаа. Түүний хөлс нь цусны дусал мэт газарт дусалж байв.

⁴⁵Тийнхүү залбирсныхаа дараа Тэр босож шавь нар уруугаа очоод, уй гунигаасаа болж унтаж буй тэднийг олж хараад,

⁴⁶тэдэнд-Та нар унтана вэ? Босоцгоо, сорилтод орохгүйн тулд та нар залбирцгаа гэж айлдав.

⁴⁷Түүнийг ийнхүү айлдан байтал бөөн хүмүүс ирж яваа үзэгдэв. Арван хоёрын нэг болох Иудас гэгч тэднийг тэргүүлэн явж байв. Есүсийг үнсэхийн тул тэр Түүний дэргэд ирэв.

⁴⁸Харин Есүс түүнд-Иудас аа, чи үнсэлтээр Хүний Хүүг барьж өгч байна уу? гэв.

⁴⁹Түүнийг хүрээлэн зогсогсод юу болох гэж буйг хараад-Эзэн, бид илдээрээ цавччих уу? гээд

⁵⁰тэдний нэг нь тэргүүн тахилчийн боолын баруун чихийг тас цавчив.

⁵¹Тэгтэл Есүс-Боль, үүнийгээ зогсоо гээд чихэнд нь хүрч мөнөөх боолыг эдгээв.

⁵²Тэгээд Есүс Өөрийнх нь эсрэг хүрч ирсэн ахлах тахилч нар, ахлагчид болон сүмийн түшмэдэд-Та нар дээрэмчин барих мэт илд, шийдэм агсан ирэв үү?

⁵³Өдөр бүр Би та нарын хамт сүмд байхад минь та нар Надад гар хүрээгүй. Харин энэ цаг болоод харанхуйн хүч нь та нарынх юм гэв.

⁵⁴Тэд Түүнийг баривчлан, тэргүүн тахилчийн гэрт хүргэв. Харин Петр холуур дагасаар очив.

⁵⁵Хүмүүс хашааны дунд гал түлсний дараа, тойрон сууцгаахад Петр ч тэдний дунд суулаа.

⁵⁶Нэгэн зарц охин Петрийг галын гэрэлд суухыг хараад, анхааралтай ширтсэнээ, -Энэ хүн бас Түүнтэй хамт байсан гэхэд

⁵⁷Петр үүнийг үгүйсгэж, -Эмэгтэй, Түүнийг чинь би танихгүй гэжээ.

⁵⁸Удалгүй, өөр нэг нь түүнийг хараад-Чи бас тэдний нэг шүү дээ! гэхэд Петр-Хүн гуай, би бишээ гэв.

⁵⁹Нэг цаг өнгөрсний дараа өөр нэг нь-Энэ хүн бас Галилын хүн тул Түүнтэй хамт байсан нь мэдээж гэлээ.

⁶⁰Тэгтэл Петр-Хүн гуай, таны юу яриад байгааг би мэдэхгүй л байна шүү гэв. Түүнийг ийнхүү ярьж байтал гэнэт тахиа донгодлоо.

⁶¹Эзэн эргэж Петрийн зүг харав. “Тахиа донгодохоос өмнө чи Намайг гурвантаа үгүйсгэнэ дээ” гэж өөрт нь хэлсэн Эзэний үгийг Петр санажээ.

⁶²Тэгээд гадагш гарч, гашуудан уйлав.

⁶³Есүсийг харгалзагсад Түүнийг зодож, Түүгээр доог тохуу хийв.

⁶⁴Тэд Есүсийн нүдийг боогоод, -Хэн Чамайг цохив, эш үзүүлээдэх гэж Түүнээс асууцгааж байлаа.

⁶⁵Тэд Түүний эсрэг элдвийн юм хэлж, доромжлон гутааж байв.

⁶⁶Өглөө болж, ард олны ахлагчдын Зөвлөл хуран чуулж, ахлах тахилч нар болон хуулийн багш нар Есүсийг зөвлөлийн танхимд хүргүүлэв.

⁶⁷Тэд-Хэрэв Чи Христ мөн юм бол бидэнд хэлээтэх гэхэд Тэр-Хэрэв Би хэлбэл, та нар итгэхгүй.

⁶⁸Хэрэв Би та нараас асуувал, та нар хариулахгүй.

⁶⁹Гэвч үүнээс хойш Хүний Хүү Бурханы сүр хүчний баруун гарт залрах болно гэжээ.

⁷⁰Тэд бүгд-Чи тэгээд Бурханы Хүү юм уу? гэсэнд Тэр тэдэнд-Би мөн гэдгийг та нар хэлж байна гэв.

⁷¹Тэд-Бидэнд өөр ямар гэрчлэл хэрэгтэй юм бэ? Бид өөрсдөө үүнийг Түүний Өөрийнх нь амнаас сонслоо шүү дээ гэцгээв.