Read Ариун Библи, Mongolian Ariun Bible, 2004 Лук 24 Bible Online

Лук 24 - Ариун Библи, Mongolian Ariun Bible, 2004 bible

Лук 24

¹Харин долоо хоногийн эхний өдөр эрт үүрээр тэд булш уруу ирэхдээ, бэлдсэн анхилуун үнэртнээ авчрав.

²Булшнаас хадыг өнхрүүлэн зайлуулсныг тэд хараад,

³дотогш орсон боловч Эзэн Есүсийн цогцсыг олсонгүй.

⁴Үзэгтүн, тийнхүү тэднийг тэвдэн мэгдэж байтал, гэрэлтсэн хувцастай хоёр хүн гэнэт тэдний хажууд зогсож байлаа.

⁵Мөнөөх эмэгтэйчүүд айн сандарч, нүүрээ газар хүртэл бөхийлгөсөнд тэд-Та нар юунд үхэгсдийн дунд амьд Нэгэнийг хайна вэ?

⁶Тэр энд байхгүй, харин Тэр амилсан. Галилд байхдаа Тэр та нарт юу айлдаж байсныг санацгаа.

⁷Хүний Хүү нүгэлт хүмүүсийн гарт тушаагдаж, цовдлогдоод гурав дахь өдөр нь амилах ёстой гэсэн шүү дээ? гэжээ.

⁸Тэд Түүний үгийг санаад,

⁹булшнаас буцаж ирээд арван нэгт нь болон үлдсэн бүгдэд энэ бүхнийг мэдэгджээ.

¹⁰Тэд бол Магдалын Мариа, Иоханна, Иаковын эх Мариа нар байсан бөгөөд мөн тэдэнтэй хамт байсан бусад эмэгтэйчүүд элч нарт энэ тухай хэлж байлаа.

¹¹Хэлсэн үгс нь тэдэнд солиотой мэт байсан тул тэд эмэгтэйчүүдэд итгэхгүй байлаа.

¹²Харин Петр босон булш уруу гүйв. Зогсоод дотогш харахад зөвхөн маалинган даавуу л үзэгджээ. Тэр болсон явдалд гайхсаар гэр уруугаа буцав.

¹³Үзэгтүн, тэр өдөр тэдний хоёр нь Иерусалимаас жаран стадиа зайтай байдаг Еммау хэмээх тосгон уруу явж байжээ.

¹⁴Тэд болсон бүх зүйлийн талаар өөр хоорондоо ярьж байв.

¹⁵Тэднийг ийнхүү ярьж хэлэлцэн явтал, Есүс Өөрөө тэдний дэргэд ирээд, цугтаа алхав.

¹⁶Гэвч тэдний нүд халхлагдаж, Түүнийг таньсангүй.

¹⁷Есүс тэдэнд-Та нар бие биетэйгээ юун тухай ярилцаж яваа юм бэ? гэсэнд тэд зогсов. Тэд гунигтай байлаа.

¹⁸Тэдний нэг Клеоп гэгч нь Түүнд-Энэ өдрүүдэд Та Иерусалимд түр байхдаа тэнд болсон явдлын тухай ганцаараа мэдээгүй өнгөрсөн хэрэг үү? гэхэд

¹⁹Тэр тэдэнд-Ямар зүйлс? гэв. Тэгтэл тэд Түүнд-Назарын Есүсийн тухай юм. Тэр бол Бурханы өмнө, бүх ард олны өмнө үг болон үйлсдээ хүчирхэг эш үзүүлэгч байсан юм.

²⁰Түүнд манай захирагчид болон ахлах тахилч нар үхлийн ял тулгаж, Түүнийг цовдолсон.

²¹Гэтэл Израилийг аврах гэж байсан Нэгэн мөн гэж бид Түүнд найдаж байв. Энэ бүхнээс гадна, энэ явдлаас хойш гурван өдөр боллоо.

²²Харин манай эмэгтэйчүүдийн зарим нь биднийг гайхахад хүргэв. Тэд өглөө эрт булш уруу очоод,

²³Түүний цогцсыг олсонгүй. Тэгээд буцаж ирээд, Түүнийг амьд гэж хэлсэн тэнгэр элч нарын үзэгдлийг харснаа бидэнд ярив.

²⁴Бидэнтэй хамт байсан хүмүүсийн зарим нь булш уруу явж, эмэгтэйчүүдийн хэлсний дагуу байхыг харжээ. Тэд Түүнийг олж хараагүй гэхэд

²⁵Есүс-Мунхаг хүмүүс ээ! Эш үзүүлэгчдийн хэлсэн бүхэнд итгэхдээ хойрго сэтгэлтэнгүүд ээ!

²⁶Христ энэ бүх зовлонг эдлэн, тэгээд Өөрийн сүр жавхланд орох ёстой байсан биш үү? гэв.

²⁷Тэгээд Тэр Мосегээс эхлэн бүх эш үзүүлэгчид, бүх Судар Өөрийнх нь тухай юу хэлснийг тэдэнд тайлбарлав.

²⁸Тэд зорьж явсан тосгондоо ойртон ирэх үед Тэр цаашаа явах гэж байгаа мэт байв.

²⁹Тэд Түүнийг ятган-Бидэнтэй хамт байгаач. Хэдийн нар хэвийж орой болж байна гэж хэлэхэд нь Есүс тэдэнтэй байхаар болж, гэрт оров.

³⁰Тэгээд Тэр тэдэнтэй хамт ширээнээ тухлан сууж, талх авч, ерөөгөөд хувааж тэдэнд өгөв.

³¹Тэдний нүд нээгдэж, тэд Түүнийг танив. Есүс нүдэнд нь харагдахгүй алга болжээ.

³²Тэд нэг нэгэндээ-Замд Тэр бидэнтэй ярилцаж, Судрыг бидэнд тайлбарлаж байхад нь зүрх маань [бидний дотор] шатаж байсан бус уу? гээд,

³³тэр даруйдаа босож, Иерусалим уруу буцав. Тэд өнөөх арван нэг болон хамт байгсдыг нь цугтаа байхыг хараад,

³⁴тэдний-Эзэн үнэхээр амилсан байна. Симонд харагджээ гэж хэлэхийг сонсоод,

³⁵замд болсон бүхнээ болон талх хуваахад нь Түүнийг хэрхэн таньсан зэргээ ярив.

³⁶Тэд ийнхүү ярьж байтал Тэр Өөрөө тэдний дунд зогсож байлаа. Тэр тэдэнд-Амар амгалан нь та нарт байх болтугай гэв.

³⁷Гэвч тэд айн сандарч, сүнс үзэгдэв хэмээн боджээ.

³⁸Есүс тэдэнд-Та нар юунд зовж, зүрхэнд чинь эргэлзээ төрнө вэ?

³⁹Миний гар, Миний хөлийг хараач. Энэ чинь Би Өөрөө байна. Надад гараа хүргээд үз. Учир нь сүнсэнд та нарын харж байгаа Над шиг яс, мах байдаггүй юм гэв.

⁴⁰Тэр үүнийг айлдаад, тэдэнд Өөрийн гар, Өөрийн хөлийг үзүүлэв.

⁴¹Тэд баярлан, гайхсандаа итгэж ядан байхад нь Есүс тэднээс-Та нарт идэх юм байна уу? гэж асуухад

⁴²тэд хайрсан загас Түүнд өгөв.

⁴³Тэр загасыг авч, тэдний өмнө иджээ.

⁴⁴Тэгээд Тэр тэдэнд ингэж айлдав. -Та нартай хамт байхдаа Миний ярьж байсан үг ийм болой. Энэ нь Мосегийн Хууль, Эш үзүүлэгчид болоод Дуулал дахь Миний тухай бичигдсэн бүхэн биелэгдэх ёстой гээд

⁴⁵Судрыг ухааруулахын тулд тэдний оюун ухааныг нээв.

⁴⁶Есүс тэдэнд хандаж-“Христ зовлон эдэлж, гурав дахь өдрөө үхэгсдээс амилах болно.

⁴⁷Иерусалимаас эхлээд бүх үндэстэнд Түүний нэрээр нүглийн уучлалын гэмшил тунхаглагдах ёстой” гэж бичигдсэн юм.

⁴⁸Энэ бүхний гэрч бол та нар мөн.

⁴⁹Харагтун, Би Эцэгийнхээ амласныг та нарт илгээнэ. Харин та нар дээрээс ирэх хүчийг өмстлөө энэ хотдоо үлд гэжээ.

⁵⁰Тэгээд Тэр тэднийг Бетан хүртэл дагуулан явлаа. Есүс мутраа өргөн тэднийг ерөөв.

⁵¹Тийнхүү ерөөж байхдаа Тэр тэднээс салж, тэнгэр өөд оджээ.

⁵²Тэд үлэмж баяр хөөртэйгөөр Иерусалим уруу буцав.

⁵³Тэгээд Бурханыг магтан, сүмд байнга байх болсон ажгуу.