Read Ариун Библи, Mongolian Ariun Bible, 2004 Иохан 1 Bible Online

Иохан 1 - Ариун Библи, Mongolian Ariun Bible, 2004 bible

Иохан 1

¹Эхэнд Үг байсан, Үг Бурхантай хамт байсан ба Үг нь Бурхан байсан.

²Тэр эхэнд Бурхантай хамт байсан.

³Бүх юм Түүгээр бий болсон. Бий болсон юмсаас Түүнгүйгээр бий болсон юмс нэг ч байхгүй.

⁴Түүнд амь байсан бөгөөд амь нь хүмүүсийн гэрэл байв.

⁵Гэрэл харанхуйг гийгүүлэхэд, харанхуй түүнийг дийлсэнгүй.

⁶Бурханаас илгээгдсэн нэгэн хүн байсан ба нэр нь Иохан юм.

⁷Иохан гэрлийн тухай гэрчилж, бүгдийг өөрөөрөө дамжуулан итгүүлэхийн тулд гэрчлэл хийхээр иржээ.

⁸Тэр бол өнөөх гэрэл байсангүй, харин гэрлийн тухай гэрчлэхээр ирсэн ажээ.

⁹Ертөнцөд ирэн хүн бүрийг гэгээрүүлдэг жинхэнэ гэрэл байв.

¹⁰Тэр ертөнцөд байсан. Ертөнц Түүгээр бий болсон атал, ертөнц Түүнийг таньсангүй.

¹¹Тэр өөрийнхөндөө ирсэн боловч, өөрийнхөн нь Түүнийг хүлээн авсангүй.

¹²Харин Өөрийг нь хүлээн авсан болгонд, Өөрийнх нь нэрэнд итгэдэг хүмүүст Бурханы хүүхэд болох эрхийг Тэр өгөв.

¹³Тэд цусаар биш, махан биеийн хүслээр ч биш, хүний хүслээр ч биш, харин Бурханаар төрөгсөд билээ.

¹⁴Үг нь махан бие болж бидний дунд оршин, бид Түүний алдрыг харцгаасан. Энэ нь Эцэгийн цорын ганц Хүүгийн алдар бөгөөд нигүүлсэл ба үнэнээр дүүрэн байсан юм.

¹⁵Иохан Түүний тухай гэрчлэн хашхирч-“Миний араас Ирэгч нь надаас эрхэм. Учир нь Тэр надаас урьд оршин байсан” гэж би Түүний тухай хэлсэн юм гэлээ.

¹⁶Учир нь Түүний дүүрнээс бид бүгдээрээ нигүүлсэл дээрээ нигүүлслийг хүлээн авсан.

¹⁷Яагаад гэвэл Хууль Мосегээр өгөгдсөн бол, нигүүлсэл ба үнэн нь Есүс Христээр дамжуулан ирсэн билээ.

¹⁸Бурханыг хэн ч хэзээ ч хараагүй бөгөөд Эцэгийн өвөр дэх цорын ганц Хүү болох Бурхан нь Түүнийг таниулсан юм.

¹⁹Иоханаас “Та хэн бэ?” гэж асуулгахаар иудейчүүд Иерусалимаас тахилч нар болон левичүүдийг илгээхэд түүний хэлсэн гэрчлэл ийм байлаа.

²⁰Тэр үгүйсгэлгүй хүлээн зөвшөөрч-Би Христ биш гэж зөвшөөрөн хэллээ.

²¹Тэд түүнээс-Тэгвэл та хэн юм бэ? Та Елиа юм уу? гэж асуухад, тэр-Би биш гэсэнд, -Та өнөөх Эш үзүүлэгч үү? гэхэд тэр-Үгүй гэлээ.

²²Тэгтэл тэд түүнд-Та хэн бэ? Биднийг явуулсан хүмүүст бид хариу өгөх учиртай. Та өөрийнхөө тухай юу хэлэх вэ? гэв.

²³Иохан-Эш үзүүлэгч Исаиагийн айлдсан “ЭЗЭНий замыг шулуун болгогтун” гэж цөлд хашхирах нэгний дуу бол би билээ гэж хэлэв.

²⁴Фарисайчуудын явуулсан хүмүүс бас байлаа.

²⁵Тэд түүнээс-Хэрэв та Христ биш, Елиа ч биш, өнөөх Эш үзүүлэгч ч биш юм бол яагаад баптисм хүртээнэ вэ? гэж асуусанд

²⁶Иохан-Би усаар баптисм хүртээдэг, харин дунд чинь та нарын үл таних Нэгэн зогсож байна.

²⁷Миний араас Ирэгч нь Тэр бөгөөд Түүний шаахайн сурыг ч тайлах нь надад зохисгүй гэж хэлэв.

²⁸Энэ явдал Иоханы баптисм хүртээж байсан Иордан голын тэртээх Бетанд болсон юм.

²⁹Дараа өдөр нь Иохан өөр уруу нь ирж яваа Есүсийг хараад-Ертөнцийн нүглийг үүрэгч Бурханы Хургыг харагтун!

³⁰Энэ бол Түүний тухай “Миний араас ирэх Хүн миний тэргүүн байсан. Яагаад гэвэл Тэр надаас урьд оршин байсан” гэж миний хэлсэн Тэр мөн.

³¹Би Түүнийг таниагүй. Гэвч Тэр Израильд илчлэгдсэн байхын тулд би усаар баптисм хүртээхээр ирсэн гэв.

³²Иохан гэрчилж-Сүнс тэнгэрээс тагтаа мэт буун ирж, Түүн дээр тогтохыг би харсан.

³³Би Түүнийг таниагүй. Харин усаар баптисм хүртээлгэхээр намайг илгээсэн Тэр “Хэний дээр Сүнс тагтаа мэт буун ирж тогтохыг чи харна, Тэр бол Сүнсээр баптисм хүртээгч мөн” гэж надад айлдсан юм.

³⁴Би харсан. Энэ бол Бурханы Хүү мөн гэдгийг би гэрчилж байна гэж хэлэв.

³⁵Дараа өдөр нь Иохан хоёр шавьтайгаа дахиад л зогсож байлаа.

³⁶Есүсийн явж байхыг тэр хараад-Бурханы Хургыг харагтун! гэсэнд

³⁷хоёр шавь нь түүний хэлэхийг сонсоод Есүсийг дагав.

³⁸Есүс эргэж тэдний дагаж байгааг хараад тэднээс-Та нар юу эрнэ вэ? гэж асуусанд, тэд Түүнд-Рабби (орчуулбал Багш аа), Та хаана буудаллаж байна вэ? гэв.

³⁹Есүс тэдэнд-Ир, та нар харна гэж айлдсанд тэд Түүний буудаллаж байгаа газарт очиж үзээд, тэр өдөр Түүнтэй хамт буудаллав. Учир нь тэгэхэд ойролцоогоор аравдугаар цаг болж байлаа.

⁴⁰Иоханы хэлснийг сонсоод Есүсийг дагасан хоёрын нэг нь Симон Петрийн дүү Андрей байжээ.

⁴¹Андрей эхлээд өөрийн ах Симоныг олоод, түүнд-Бид Мессиаг (грекээр Христ) оллоо гээд,

⁴²түүнийг Есүс уруу авчрав. Есүс түүн уруу хараад, Симонд-Чи бол Иоханы хүү Симон байна. Чамайг Кеф (грекээр Петр) гэж нэрлэх болно гэлээ.

⁴³Дараа өдөр нь Есүс Галил уруу явахаар завдан байхдаа Филипийг олоод, түүнд-Намайг дага гэв.

⁴⁴Филип Андрей, Симон нарын хот болох Бетсайдаас иржээ.

⁴⁵Филип Натанаелыг олоод-Бид Мосегийн Хуульдаа бичсэн болон эш үзүүлэгчдийн бичсэн тэр хүн болох Иосефын хүү, Назарын Есүсийг оллоо гэсэнд,

⁴⁶Натанаел түүнд-Назараас ямар нэгэн сайн юм гарч чадна гэж үү? гэхэд, Филип-Ирж, хар л даа гэв.

⁴⁷Есүс Өөр уруу нь ирж яваа Натанаелыг хараад, түүний тухай-Дотроо заль мэхгүй, жинхэнэ Израиль хүнийг харагтун гэж айлдав.

⁴⁸Натанаел Есүсээс-Та намайг яаж мэднэ вэ? гэж асуухад Тэр-Филип чамайг дуудахаас өмнө, инжрийн модны дор байхад чинь Би чамайг харсан гэлээ.

⁴⁹Натанаел-Рабби, Та бол Бурханы Хүү мөн. Та бол Израилийн Хаан мөн гэж Түүнд хэлэв.

⁵⁰Есүс түүнд-Чамайг инжрийн модны доор байхыг чинь харсан гэж Би чамд хэлсэн тул чи итгэж байна уу? Чи үүнээс илүү агуу зүйлсийг үзэх болно гээд,

⁵¹Тэр-Үнэнээр, үнэнээр Би та нарт хэлье. Тэнгэр нээгдэн, Бурханы тэнгэр элч нар Хүний Хүүгийн дээр өгсөх ба уруудахыг та нар үзэх болно гэж айлдав.