Read Ариун Библи, Mongolian Ariun Bible, 2004 Иохан 11 Bible Online

Иохан 11 - Ариун Библи, Mongolian Ariun Bible, 2004 bible

Иохан 11

¹Бетаны Лазар гэгч эр өвчтэй байлаа. Бетан бол Марта, түүний дүү Мариа хоёрын тосгон болой.

²Мариа бол Эзэнийг тосоор тослоод, Түүний хөлийг үсээрээ арчсан тэр эмэгтэй байв. Түүний ах Лазар нь өвчтэй байв.

³Тиймээс эгч дүүс Есүст хүн илгээж-Эзэн минь, хараач, Таны хайрладаг хүн өвдөв хэмээн хэлүүлэв.

⁴Үүнийг сонсоод Есүс-Энэ өвчин үхэл уруу биш, харин үүгээр Бурханы Хүү алдаршуулагдахын тулд, Бурханы алдрын төлөө юм гэлээ.

⁵Марта, түүний охин дүү болон ах Лазарыг нь Есүс хайрладаг байлаа.

⁶Лазарын өвдсөнийг сонсоод, Есүс байсан газраа хоёр хонов.

⁷Дараа нь Тэр шавь нартаа-Бүгдээрээ дахиж Иудей уруу явцгаая гэхэд

⁸шавь нар нь-Рабби, саяхан иудейчүүд Тан уруу чулуу чулуудахаар завдаж байсан. Та тийшээ дахиад явах гэж үү? гэв.

⁹Есүс-Өдөрт арван хоёр цаг байдаг биз дээ? Хэрэв хүн өдөр явбал, тэр ертөнцийн гэрлийг үздэг тул бүдрэхгүй.

¹⁰Харин шөнө явбал, хүний дотор гэрэл байхгүй тул тэр бүдэрнэ гэж хэлэв.

¹¹Ингэж айлдсаныхаа дараа Тэр тэдэнд-Бидний анд Лазар унтжээ. Гэвч Би түүнийг нойрноос нь сэрээхээр явна гэхэд,

¹²шавь нар нь Түүнд-Эзэн, хэрэв унтсан бол тэр эдгэнэ гэв.

¹³Есүс Лазарын үхлийн тухай айлдсан ажээ. Харин тэд Түүнийг зүгээр л унтах тухай ярьж байна гэж боджээ.

¹⁴Тэгтэл Есүс тэдэнд шуудхан-Лазар үхсэн.

¹⁵Та нарыг итгүүлэхийн тулд, тэнд байгаагүйдээ Би та нарын төлөө баяртай байна. Харин одоо түүн уруу явцгаая гэж айлдлаа.

¹⁶Гэтэл Ихэр гэгддэг Томас бусад шавь нарт-Цөмөөрөө бас явцгаая. Тэгээд Түүнтэй хамт үхье гэж хэлэв.

¹⁷Есүс ирээд, Лазар булшинд дөрвөн хоног байсныг мэдэв.

¹⁸Бетан Иерусалимаас холгүй арван таван стадиа орчмын тэртээ байдаг аж.

¹⁹Ахаасаа хагацсан Марта, Мариа нарыг тайтгаруулахаар олон иудейчүүд тэднийд иржээ.

²⁰Тэгтэл Марта Есүсийн ирж байгааг дуулаад, угтахаар гарав. Харин Мариа гэртээ суусаар үлдлээ.

²¹Марта Есүст-Эзэн, Та энд байсан бол миний ах үхэхгүй байх байсан.

²²[Тийм боловч] одоо Та Бурханаас юу ч гуйсан, Бурхан Танд өгнө гэдгийг би мэдэж байна гэв.

²³Есүс түүнд-Чиний ах амилна гэхэд

²⁴Марта Түүнд-Эцсийн өдрийн амилалтад тэр амилна гэдгийг би мэднэ гэв.

²⁵Есүс Мартад-Би бол амилалт ба амь мөн. Надад итгэдэг хүн үхэвч амьдарна.

²⁶Амьд бөгөөд Надад итгэгч бүхэн хэзээ ч үхэхгүй. Чи үүнд итгэж байна уу? гэж асуув.

²⁷Марта-Тийм ээ, Эзэн. Та бол Бурханы Хүү болох Христ, ертөнцөд ирэх Нэгэн мөн гэдэгт би итгэсэн гэлээ.

²⁸Үүнийг хэлээд тэр явж, дүү Мариагаа дуудаад, сэмхэн-Багш энүүхэнд байна. Чамайг дуудаж байна гэхэд

²⁹Мариа үүнийг сонсоод, ухасхийн босож, Түүн уруу очив.

³⁰Есүс тосгонд хараахан хүрч очоогүй агаад харин Мартатай уулзсан тэр газраа л байж байлаа.

³¹Тэгтэл гэрт нь Мариатай байж, тайтгаруулж байсан иудейчүүд түүнийг ухасхийн босож гарч явахыг хараад араас нь дагав. Тэд түүнийг булшин дээр очин уйлахаар явлаа хэмээн боджээ.

³²Мариа Есүсийн байсан газар ирж, Түүнийг хараад Есүсийн хөлд унаж, -Эзэн, хэрэв Та энд байсан бол миний ах үхэхгүй байх байсан гэлээ.

³³Есүс түүний уйлахыг болон түүнтэй хамт ирсэн иудейчүүдийн уйлахыг хараад сүнс нь гүнээ шаналж, сэтгэл нь хөдөлж,

³⁴-Та нар түүнийг хаана тавьсан бэ? гэж асуухад тэд Түүнд-Эзэн, ирээд, үз гэлээ.

³⁵Есүс уйлав.

³⁶Тэгтэл иудейчүүд-Тэр түүнд ямар хайртай байсныг хараач гэцгээж байлаа.

³⁷Харин тэдний зарим нь-Сохор хүний нүдийг нээсэн энэ хүн түүнийг мөн үхүүлэхгүй байж чадаагүй юм байх даа гэв.

³⁸Есүс дахиад л дотроо гүнээ шаналж, булш уруу хүрч ирэв. Энэ нь агуй байсан бөгөөд амыг нь хадаар тагласан байлаа.

³⁹Есүс-Хадыг зайлуул гэхэд талийгаачийн дүү Марта Түүнд-Эзэн, тэр үхээд дөрөв хонож байгаа тул одоо өмхий үнэр орсон байгаа гэж хэлэв.

⁴⁰Есүс Мартад-“Хэрэв чи итгэвэл Бурханы алдрыг харна” гэж Би чамд хэлээгүй бил үү? гэлээ.

⁴¹Тэгээд тэд хадыг зайлуулав. Есүс дээшээ харан-Аав аа, Та Намайг сонссонд Танд Би талархаж байна.

⁴²Та Намайг үргэлж сонсдогийг Би мэдсэн. Таны Намайг илгээсэн гэдэгт итгүүлэхийн тулд тойрон зогсох энэ хүмүүсийн төлөө Би үүнийг хэллээ гэв.

⁴³Тэр ийн айлдаад, чанга дуугаар-Лазар, гараад ир гэж хашхирав.

⁴⁴Үхсэн хүн гар, хөл нь оршуулгын боолтоор боолттой, нүүр нь алчуураар ороолттой чигээрээ гарч ирэв. Есүс тэдэнд-Тайлж, түүнийг явуул гэв.

⁴⁵Мариагийнд ирсэн иудейчүүдээс олон хүн Есүсийн хийсэн зүйлийг хараад, Түүнд итгэжээ.

⁴⁶Харин тэдний зарим нь фарисайчууд уруу очиж, Есүсийн хийсэн зүйлийг тэдэнд хэлцгээв.

⁴⁷Тэгтэл ахлах тахилч нар болон фарисайчууд зөвлөлдөж-Бид юу хийх вэ? Энэ хүн олон тэмдгийг үйлдэж байна.

⁴⁸Хэрэв бид Түүнийг ингээд орхивол, бүх хүмүүс Түүнд итгэнэ. Тэгвэл ромчууд ирж, манай орныг болон үндэстнийг маань устгана даа гэцгээв.

⁴⁹Харин тэдний нэг болох тэр жил тэргүүн тахилч болсон Каиаф тэдэнд-Та нар юу ч мэдэхгүй,

⁵⁰мөн бүх үндэстнээрээ мөхөхгүйн тулд ард түмний төлөө нэг хүн үхэх нь дээр гэдгийг ч бодохгүй байна гэж хэлэв.

⁵¹Тэр энэ үгсийг өөрийн санаагаар хэлээгүй. Харин тэр жилийн тэргүүн тахилч байсан учир тэрээр Есүсийн үндэстнийхээ төлөө үхэх тухай болон

⁵²Түүний зөвхөн үндэстнийхээ төлөө бус, харин Бурханы тарсан хүүхдүүдийг бөөгнүүлж нэгтгэхийн төлөө үхэх тухай эш үзүүлжээ.

⁵³Энэ өдрөөс тэд Есүсийг алахаар төлөвлөв.

⁵⁴Тиймээс Есүс иудейчүүдийн дунд дахиж илээр явсангүй. Харин тэндээс цөлийн ойролцоох нутаг уруу явж, Ефрайм гэдэг хотод очжээ. Тэнд шавь нарынхаа хамт үлдэв.

⁵⁵Иудейчүүдийн Дээгүүр Өнгөрөх баяр ойртсон байлаа. Олон хүн өөрсдийгөө ариусгахаар Дээгүүр Өнгөрөх баяраас өмнө нутгаасаа Иерусалим уруу иржээ.

⁵⁶Тэд Есүсийг хайж, сүм дотор байхдаа өөр хоорондоо-Та нар юу гэж бодож байна? Тэр баяр дээр ирэх болов уу? хэмээн ярьж байлаа.

⁵⁷Ахлах тахилч нар болон фарисайчууд хэрэв Түүний хаана байгааг мэдсэн хүн байвал Есүсийг бариулахаар энэ тухай мэдэгдэх ёстой гэсэн зарлиг буулгасан байв.