Read Ариун Библи, Mongolian Ariun Bible, 2004 Иохан 19 Bible Online

Иохан 19 - Ариун Библи, Mongolian Ariun Bible, 2004 bible

Иохан 19

¹Тэгээд Пилат Есүсийг аваачиж ташуурдуулав.

²Цэргүүд үүргэнээр титэм сүлжээд, Түүний толгой дээр тавьж, нил ягаан нөмрөг нөмрүүлэв.

³Тэд Түүн дээр ирж-Иудейчүүдийн хааныг мэндчилье гээд нүүрийг нь алгадав.

⁴Пилат дахин гарч ирээд хүмүүст-Харагтун, би Түүнээс ямар ч гэм буруу олоогүйг та нарт мэдүүлэхийн тулд Түүнийг нааш нь авчирлаа гэв.

⁵Есүс үүргэнэн титэм, нил ягаан нөмрөгтэй гарч ирэв. Пилат тэдэнд-Энэ Хүнийг харагтун гэлээ.

⁶Тэгтэл ахлах тахилч нар, харуулууд Түүнийг хараад-Цовдол, цовдол хэмээн хашхиралдлаа. Пилат тэдэнд-Өөрсдөө Түүнийг ав. Та нар цовдол. Миний хувьд Түүнээс ямар ч буруу олсонгүй гэв.

⁷Иудейчүүд түүнд хандан-Бидэнд хууль бий. Уг хуулийн дагуу бол Тэр үхэх ёстой. Яагаад гэвэл Тэр Өөрийгөө Бурханы Хүү болгосон юм гэцгээж байлаа.

⁸Пилат үүнийг сонсоод улам их айж,

⁹дахин ордондоо орж Есүсээс-Та хаанаас ирсэн юм бэ? гэж асуусанд Есүс түүнд юу ч хариулсангүй.

¹⁰Тиймд Пилат Түүнд-Та надад хэлэхгүй юм уу? Таныг суллах ба загалмайд цовдлох эрх мэдэл надад байгааг Та мэдэхгүй байна гэж үү? гэлээ.

¹¹Есүс [түүнд]-Танд дээрээс эрх мэдэл өгөгдөөгүй л бол, Миний эсрэг байх ямар ч эрх мэдэл баймааргүйсэн. Тиймээс Намайг танд тушаасан хүн нь илүү нүгэлтэй юм гэж айлдав.

¹²Үүний улмаас Пилат Түүнийг суллахыг оролджээ. Харин иудейчүүд-Хэрэв та энэ Хүнийг суллавал, Цезарийн анд нөхөр биш. Өөрийгөө хаан хэмээгч хүн болгон Цезарийн дайсан мөн гэж хашхиралдаж байв.

¹³Тэдгээр үгсийг Пилат сонсоод Есүсийг гаргаж, Шигтгэмэл чулуун индэр буюу еврейгээр Габбата гэдэг газарт шүүгчийн суудалд суув.

¹⁴Дээгүүр Өнгөрөх баярын бэлтгэл өдөр байлаа. Зургадугаар цагийн орчим Пилат иудейчүүдэд-Харагтун. Та нарын Хаан! гэж хэллээ.

¹⁵Тэгтэл тэд-Түүнийг тонилго, тонилго. Түүнийг цовдол хэмээн хашхиралдсанд Пилат тэдэнд-Танай Хааныг би цовдлох уу? гэхэд ахлах тахилч нар-Цезариас өөр хаан бидэнд байхгүй гэв.

¹⁶Ингээд Пилат Түүнийг цовдлуулахаар тэдэнд тушаалаа.

¹⁷Иймээс тэд Есүсийг аваад явлаа. Есүс загалмайгаа үүрсээр еврейгээр Голгота буюу Гавлын Газар хэмээх газар уруу явав.

¹⁸Тэнд Түүнийг өөр хоёр хүний хамт хүмүүс цовдолжээ. Есүсийг дунд нь, хоёр талд нь тэднийг цовдлов.

¹⁹Пилат мөн пайзан дээр “Иудейчүүдийн Хаан, Назарын Есүс” гэж бичээд, Есүсийн загалмай дээр тавиулжээ.

²⁰Есүсийг цовдолсон газар хотоос холгүй байсан бөгөөд пайзан дээр еврей, латин, грек хэлээр бичсэн тул олон иудейчүүд үүнийг уншжээ.

²¹Иудейчүүдийн ахлах тахилч нар Пилатад-“Иудейчүүдийн Хаан” гэж бүү бич. Харин Тэр “Би бол иудейчүүдийн Хаан” хэмээн хэлсэн гэв.

²²Пилат-Бичсэн зүйлээ би бичсэн юм гэлээ.

²³Цэргүүд Есүсийг цовдлоод, гадуур хувцсыг нь авч дөрвөн хэсэг болгож хувь хувиа хүртжээ. Дээрээс нь битүү нэхсэн ямар ч оёдолгүй дотуур хувцас бас байлаа.

²⁴Тэд хоорондоо-Үүнийг урахгүй. Харин хэнийх болохыг шийдэхийн тулд үүний төлөө шодоцгооё гэв. Энэ нь “Тэд гадуур хувцсыг минь хуваан авч, Миний хувцасны төлөө шодох болно” [гэсэн] Судар биелэгдэхийн тулд ажээ.

²⁵Тиймээс цэргүүд энэ бүхнийг үйлдсэн юм. Харин Есүсийн загалмайн дэргэд Есүсийн эх, мөн нагац эгч нь болон Клопын эхнэр Мариа бас Магдалын Мариа нар зогсож байсан юм.

²⁶Есүс эхийгээ болон хайртай байсан шавиа ойр зогсохыг хараад, эхдээ-Эмэгтэй, энэ бол таны хүү гээд,

²⁷өнөөх шавьдаа-Энэ бол чиний эх гэж айлдав. Тэр цагаас хойш тэр шавь нь Есүсийн эхийг гэртээ аваачив.

²⁸Үүний дараа Есүс бүх юм эдүгээ гүйцэлдсэнийг мэдээд Судар биелэгдэхийн тулд-Би цангаж байна гэлээ.

²⁹Дүүрэн цагаан цуутай сав тэнд байжээ. Тэд цуу шингээсэн далайн хөвөнг хиссопын мөчирт торгоож Есүсийн аманд хүргэв.

³⁰Есүс цууг амсаж-Гүйцэлдлээ! гээд, тэргүүнээ гудайлган сүнсээ даатгав.

³¹Тэр өдөр нь бэлтгэлийн өдөр байв. Амралтын өдөр цогцсуудыг загалмай дээр байлгах ёсгүй тул (мөн тэр Амралтын өдөр нь онцгой өдөр байсан учраас) иудейчүүд, тэдний хөлийг хугалж, тэднийг зайлуулахыг Пилатаас гуйжээ.

³²Цэргүүд ирж, Есүстэй хамт цовдлогдсон эхний хүний болон нөгөө хүнийх нь хөлийг хугалав.

³³Харин Есүс уруу ирээд Түүний хэдийн үхсэн байхыг тэд үзээд, хөлийг нь хугалсангүй.

³⁴Цэргүүдийн нэг нь Түүнийг хажуу уруу нь жадлахад цус, ус гоожлоо.

³⁵Харсан хүн нь үүнийг гэрчлэв. Түүний гэрчлэл нь үнэн бөгөөд та нарыг ч мөн итгүүлэхийн тулд үнэн ярьдаг гэдгээ тэр мэднэ.

³⁶Судрын “Түүний нэг ч яс хугалагдахгүй” гэсэн нь биелэгдэхийн тулд эдгээр нь болжээ.

³⁷“Тэд жадалсан Хүн уруугаа харах болно” гэж мөн өөр Сударт хэлдэг.

³⁸Энэ бүхний дараа Есүсийн цогцсыг авахын тулд Ариматын Иосеф Пилатаас гуйсанд тэр зөвшөөрчээ. Иосеф иудейчүүдээс эмээж, нууцаар Есүсийн шавь байсан юм. Тэгээд тэр очиж, цогцсыг нь авчээ.

³⁹Мөн Никодем мирр, алоены зуун литра хольцыг авч ирэв. Тэр анх шөнөөр Есүс уруу ирж байсан юм.

⁴⁰Тэд Есүсийн цогцсыг авч, иудейчүүдийн оршуулгын заншил ёсоор анхилуун үнэртэнтэй маалинган даавуугаар ороов.

⁴¹Түүнийг цовдолсон газарт цэцэрлэг байсан бөгөөд тэнд хэнийг ч тавиагүй шинэ хадан булш байлаа.

⁴²Тэгэхэд иудейчүүдийн хувьд бэлтгэлийн өдөр нь байсан бөгөөд тэр хадан булш ойролцоо байсан тул тэд Есүсийг тэнд тавьжээ.