Read Ариун Библи, Mongolian Ariun Bible, 2004 Иохан 4 Bible Online

Иохан 4 - Ариун Библи, Mongolian Ariun Bible, 2004 bible

Иохан 4

¹Есүс Иоханаас илүү олон хүнийг шавь болгон, баптисм хүртээж байна гэж фарисайчуудын сонссоныг Эзэн мэдээд,

²(хэдийгээр Есүс Өөрөө биш, харин Түүний шавь нар нь баптисм хүртээж байсан боловч)

³Иудейг орхин Галил уруу дахин явжээ.

⁴Есүс Самариар дайрч өнгөрөх болов.

⁵Ингээд Тэр Самарийн Сухар гэдэг хотод ирлээ. Энэ хот нь Иаков өөрийн хүү Иосефтоо өгсөн газрын ойролцоо байв.

⁶Иаковын худаг тэнд байжээ. Аянд ядарсан Есүс худгийн дэргэд сууж байв. Энэ нь зургадугаар цагийн үе байлаа.

⁷Самарийн нэгэн эмэгтэй ус татахаар тэнд ирэхэд Есүс түүнээс-Надад уух юм өгөөч гэж гуйв.

⁸Энэ үед шавь нар нь хүнс худалдан авахаар хот уруу явсан байлаа.

⁹Өнөөх Самари эмэгтэй-Та Иудей хүн байж Самари эмэгтэй надаас яагаад уух юм гуйна вэ? гэв. (Учир нь иудейчүүд самаричуудтай харьцдаггүй байжээ. )

¹⁰Есүс түүнд-Хэрэв чи Бурханы бэлгийг болон “Надад уух юм өгөөч” гэж байгаа хүн хэн болохыг мэдсэнсэн бол чи Түүнээс гуйхад Тэр чамд амийн усыг өгөх байсан гэж айлдсанд,

¹¹тэр Түүнд-Эзэн, энэ худаг гүн, Танд утгах юм юу ч алга. Гэтэл Та амийн усыг хаанаас авах вэ?

¹²Та бидний өвөг Иаковаас агуу гэж үү? Тэр энэ худгийг бидэнд өгсөн юм. Иаков болоод түүний хөвгүүд ч, мал сүрэг нь ч эндээс л ундаалсан гэв.

¹³Есүс-Энэ уснаас уух хүн бүр дахин цангана.

¹⁴Харин өөрт нь Миний өгөх уснаас уугч хэн ч хэзээ ч цангахгүй. Харин Миний өгөх ус тэр хүний дотор мөнх аминд хүртэл оргилох булаг болно гэхэд,

¹⁵эмэгтэй Түүнд-Эзэн, тэр усаа надад өгөөч. Тэгвэл би цангахгүй. Ус утгахаар энд ирэх шаардлагагүй болно гэв.

¹⁶Есүс-Явж, нөхрөө дуудаад энд ир гэж айлдав.

¹⁷Тэр-Би нөхөргүй гэсэнд Есүс-“Би нөхөргүй” гэж чи зүйтэй хэлэв.

¹⁸Учир нь чи таван нөхөртэй байсан бөгөөд одоо чамтай байгаа хүн ч нөхөр чинь биш тул чи үнэнээр хэлэв гэв.

¹⁹Эмэгтэй-Эзэн, би Таныг эш үзүүлэгч болохыг харлаа.

²⁰Бидний өвөг дээдэс энэ уулан дээр мөргөдөг байсан. Харин та нар мөргөх ёстой газар бол Иерусалимд байна гэцгээдэг шүү дээ гэв.

²¹Есүс-Эмэгтэй, Надад итгэ. Та нар энэ уулан дээр ч биш, Иерусалимд ч биш, Эцэгт л мөргөх цаг ирж байна.

²²Та нар мэдэхгүй юманд мөргөдөг бол, бид мэддэг юмандаа мөргөдөг. Тиймээс ч аврал иудейчүүдээс гарна.

²³Харин үнэн мөргөгчид нь сүнсээрээ, үнэнээр Эцэгт минь мөргөх цаг ирж байгаа бөгөөд одоо ирчихээд байна. Учир нь Эцэг Өөрт нь ийнхүү мөргөгчдийг эрж байна.

²⁴Бурхан бол сүнс, Түүнд мөргөгчид нь сүнсээрээ, үнэнээр мөргөх ёстой гэж айлдлаа.

²⁵Тэр эмэгтэй Есүст-Христ гэгч Мессиа ирэхийг би мэднэ. Тэр Нэгэн ирэхдээ бүх зүйлсийг бидэнд мэдүүлж өгнө гэв.

²⁶Есүс түүнд-Чамтай ярьж байгаа Би бол Тэр мөн гэж айлдав.

²⁷Тэр үед шавь нар нь ирээд, Түүнийг нэгэн эмэгтэйтэй ярилцаж байгаад гайхсан боловч хэн нь ч-Та юу хайна вэ? эсвэл-Та түүнтэй юунд ярилцана вэ? хэмээн асуусангүй.

²⁸Тэгтэл өнөөх эмэгтэй усныхаа савыг орхин хот уруу явж, хүмүүст

²⁹-Миний үйлдсэн бүхнийг надад хэлсэн хүнийг ирж үзэгтүн. Тэр Христ биш үү? гэсэнд,

³⁰хүмүүс хотоос гарч Есүс уруу очиж байв.

³¹Энэ үед шавь нар нь Есүсээс-Рабби, зооглооч гэлээ.

³²Харин Тэр тэдэнд-Та нарын мэдэхгүй идэх хоол Надад бий гэв.

³³Шавь нар нь-Түүнд хэн ч идэх юм авчирч өгөөгүй биз дээ? хэмээн өөр хоорондоо ярилцав.

³⁴Есүс тэдэнд-Миний хоол бол Намайг илгээсэн Түүний хүслийг үйлдэн, ажлыг нь гүйцэлдүүлэх явдал мөн.

³⁵Та нар “Ургац хураалт болтол дөрвөн сар байна” гэж хэлдэг биш үү? Үзэгтүн, Би та нарт хэлье. Хараагаа дээшлүүлж, талбайг харагтун. Учир нь талбай цайрч хураалтанд бэлэн болжээ.

³⁶Хураагч хөлсөө хүртэж, мөнх амийн үрийг цуглуулж байна. Тийнхүү тариачин тариа хураагчийн хамт баярлах болно.

³⁷Учир нь “Нэг нь тарьж, нөгөө нь хураана” гэсэн үг үнэн болох нь энд харагдаж байна.

³⁸Та нарын хөдөлмөрлөөгүй юмыг хураалгахын тулд Би та нарыг илгээв. Өөр хүмүүс хөдөлмөрлөсөн бөгөөд та нар тэдний хөдөлмөрт оролцсон болно гэж айлдав.

³⁹Өнөөх эмэгтэйн “Миний үйлдсэн бүхнийг Тэр надад хэлсэн” гэж гэрчилсэн үгнээс болж тэр хотоос Самарийн олон хүн Есүст итгэжээ.

⁴⁰Тиймээс самаричууд Есүс уруу очиж, өөрсөдтэйгөө хамт байхыг гуйсанд, Есүс тэнд хоёр хонов.

⁴¹Есүсийн үгнээс нь болж улам олон хүн итгэв.

⁴²Тэд мөнөөх эмэгтэйд-Одоо бид чиний ярьсанд биш, харин өөрсдөө сонсоод, энэ Нэгэн бол үнэхээр ертөнцийн Аврагч мөн гэдгийг мэдлээ гэв.

⁴³Хоёр хоногийн дараа Есүс тэндээс гарч, Галилд иржээ.

⁴⁴Учир нь эш үзүүлэгч нутагтаа хүндлэгддэггүйг Есүс Өөрөө гэрчлэн харуулсан юм.

⁴⁵Есүсийг Галилд ирэхэд галилынхан Иерусалимд баяр дээр Түүний үйлдсэн бүхнийг харсан тул Түүнийг хүлээн авлаа. Учир нь тэд бас баярт очсон юм.

⁴⁶Есүс усыг дарс болгож байсан Галилын Кана хотод дахин очив. Хааны нэгэн түшмэл тэнд байсан бөгөөд түүний хүү нь Капернаумд өвчтэй байлаа.

⁴⁷Түшмэл Есүсийг Иудейгээс Галилд ирснийг сонсоод, Түүн уруу очиж-Ирж, миний хүүг эдгээгээч гэж гуйв. Учир нь хүү нь үхлийн ирмэг дээр байлаа.

⁴⁸Есүс-Хүмүүс та нар хэрэв тэмдэг, гайхамшгуудыг үзэхгүй бол ер итгэхгүй гэж айлдав.

⁴⁹Хааны түшмэл Түүнд-Эзэн, хүүхдийг минь үхэхээс өмнө ирээч гэлээ.

⁵⁰Есүс-Яв. Чиний хүү амьд байна гэхэд тэр хүн Есүсийн айлдсан үгэнд итгээд харихаар явав.

⁵¹Тийнхүү тэрээр буцаж явтал, боолууд нь түүнтэй учирч, хүү нь амьд байгааг дуулгалаа.

⁵²Түшмэл хүүгээ аль цагт сайжирч эхэлснийг тэднээс асуусанд-Өчигдөр долдугаар цагт түүний халуун буусан гэв.

⁵³Тэгээд эцэг нь “Чиний хүү амьд байна” гэж Есүсийн айлдсан цаг яг мөн болохыг мэдээд, тэр өөрөө болон бүх гэр бүл нь итгэжээ.

⁵⁴Есүс Иудейгээс Галилд ирээд дахин хийсэн хоёр дахь тэмдэг нь энэ байлаа.