Read Ариун Библи, Mongolian Ariun Bible, 2004 Иохан 9 Bible Online

Иохан 9 - Ариун Библи, Mongolian Ariun Bible, 2004 bible

Иохан 9

¹Есүс явж өнгөрөхдөө, төрөлхийн сохор хүнийг харжээ.

²Шавь нар нь Түүнээс-Рабби, хэн нүгэл үйлдсэнээс энэ хүн сохор төрсөн юм бэ? Энэ хүн үү? Түүний эцэг эх үү? хэмээн асуусанд

³Есүс-Энэ хүн ч, эцэг эх нь ч нүгэл үйлдсэнээс болоогүй. Харин энэ нь Бурханы ажлуудыг түүгээр харуулахын тулд юм.

⁴Намайг Илгээгчийн ажлыг Би өдөр байхад хийх ёстой. Хэн ч ажиллаж чадахгүй шөнө ирж байна.

⁵Би ертөнцөд байгаа үедээ ертөнцийн гэрэл байна гэж хариулав.

⁶Ингэж хэлээд, Тэр газар нулимж, шүлсээрээ шавар зуурч, тэр хүний нүдийг шавраар шаваад,

⁷-Яв. Силоамын (орчуулбал Илгээгдсэн) цөөрөмд угаа гэж хэлэхэд өнөөх хүн явав. Тэгээд угаагаад, хараатай болон эргэж иржээ.

⁸Урьд түүнийг гуйлгачин байсныг харсан хүмүүс болон хөршүүд нь-Энэ чинь суучихаад гуйлга гуйдаг нөгөө хүн биш үү? гэхэд

⁹зарим нь-Тэр мөн байна гэцгээв. Бусад нь-Үгүй, түүнтэй төстэй юм байна гэсэнд тэр өөрөө-Тэр чинь би байна гэж хэлэв.

¹⁰Тэд түүнээс-Тэгвэл чиний нүд яаж нээгдсэн юм бэ? гэж асуусанд

¹¹тэр-Есүс гэдэг хүн шавар зуурч, нүдийг минь шаваад, надад “Силоам уруу яваад, угаа” гэж айлдсан. Тэгээд би явж, угаагаад хараатай болсон гэж хариулав.

¹²Хүмүүс-Тэр хаана байна? гэсэнд өнөөх хүн-Би мэдэхгүй гэлээ.

¹³Урьд нь хараагүй байсан өнөөх хүнийг тэд фарисайчууд уруу авч ирэв.

¹⁴Есүс шавар зуурч, түүний харааг оруулсан өдөр нь Амралтын өдөр байжээ.

¹⁵Тэгтэл фарисайчууд түүнээс хэрхэн хараатай болсныг нь дахин асуусанд тэр-Тэр миний нүдийг шавраар шавсан. Би угаагаад, тэгээд л харж байна гэхэд

¹⁶фарисайчуудын зарим нь-Тэр Амралтын өдрийг сахидаггүй учир Бурханаас ирсэн хүн биш гэв. Харин зарим нь-Нүгэлт хүн тийм тэмдгүүдийг хэрхэн үйлдэж чадах билээ? гэлээ. Тэгээд тэдний дунд хагарал гарав.

¹⁷Тиймээс тэд сохор эрд дахин-Тэр хүн чиний нүдийг нээсэн учраас Түүний тухай чи юу хэлэх вэ? гэхэд тэр-Тэр бол эш үзүүлэгч гэв.

¹⁸Тэгтэл хараатай болсон хүний эцэг эхийг дуудах хүртэл иудейчүүд түүнд сохор байж байгаад хараатай болсонд нь итгэсэнгүй.

¹⁹Тэд эцэг эхээс нь-Сохор төрсөн гэж та нарын ярьдаг хүү чинь энэ мөн үү? Тэгвэл одоо тэр яаж харж байна? гэж асуув.

²⁰Эцэг эх нь тэдэнд-Энэ бидний хүү мөн гэдгийг болон сохор төрснийг нь бид мэдэж байна.

²¹Харин одоо тэр яаж харж байгааг бид мэдэхгүй. Нүдийг нь хэн нээснийг ч бид мэдэхгүй. Өөрөөс нь асуу. Тэр насанд хүрсэн хүн. Тэр өөрөө хэлэг гэв.

²²Түүний эцэг эх иудейчүүдээс айсан тул тэгж хэлжээ. Учир нь Есүсийг Христ мөн гэж хүлээн зөвшөөрсөн хүн синагогаас хөөгдөх ёстой хэмээн иудейчүүд нэгэнтээ шийдсэн байлаа.

²³Тиймээс түүний эцэг эх нь “Тэр насанд хүрсэн хүн, өөрөөс нь асуу” гэжээ.

²⁴Фарисайчууд сохор байсан хүнийг хоёр дахь удаагаа дуудаад, түүнд-Бурханд алдрыг өргө. Тэр хүн нүгэлтэйг бид мэднэ гэсэнд

²⁵тэр-Түүний нүгэлтэн эсэхийг би мэдэхгүй. Би нэг л юмыг, урьд нь сохор байснаа, одоо харж байгаагаа л мэдэж байна гэв.

²⁶Тэд түүнээс-Тэр чамд юуг үйлдсэн юм бэ? Тэр чиний нүдийг яаж нээсэн юм бэ? гэж асуухад

²⁷-Би та нарт хэдийн хэлсэн. Та нар сонсоогүй. Юунд та нар дахин сонсохыг хүсэв? Та нар бас Түүний дагалдагчид болохыг хүсэж байгаа юм биш биз? гэв.

²⁸Фарисайчууд түүнийг хараан зүхэж-Чи л Түүний дагалдагч байна. Харин бид Мосегийн дагалдагчид.

²⁹Бурхан Мосед айлдсаныг бид мэднэ. Харин энэ хүний хувьд, бид Түүний хаанаас ирснийг нь ч мэдэхгүй гэсэнд

³⁰өнөөх хүн-Тэр миний нүдийг нээсэн байтал та нар Түүнийг хаанаас ирснийг нь ч мэдэхгүй байгаа нь гайхалтай юм байна.

³¹Бурхан нүгэлтнүүдийг сонсдоггүй, харин Бурханаас эмээж, Түүний хүслийг үйлдэгч хүнийг сонсдогийг бид мэднэ.

³²Цаг хугацааны эхлэлээс хойш төрөлхийн сохор хүний нүдийг нээснийг хэн ч хэзээ ч сонсоогүй.

³³Хэрэв энэ хүн Бурханаас ирээгүй юм бол Тэр юу ч хийж чадахгүй байсан гэж хэллээ.

³⁴Тэд-Чи нүглүүд дотроо төрсөн атлаа бас биднийг сургана уу? гээд түүнийг хөөн гаргав.

³⁵Иудейчүүд тэр хүнийг хөөн гаргасныг Есүс сонсоод, түүнийг олж-Чи Хүний Хүүд итгэж байна уу? гэхэд

³⁶тэр-Эзэн минь, Тэр хэн бэ? Би Түүнд итгэе гэв.

³⁷Есүс-Чи Түүнийг харсан. Одоо чамтай ярьж байгаа нь Тэр мөн гэлээ.

³⁸Тэр-Эзэн минь, би итгэж байна гээд Түүнд мөргөв.

³⁹Есүс түүнд-Би энэ ертөнцөд шүүлтийн төлөө ирсэн нь хардаггүйг хардаг, харагсдыг сохор болгохын тулд юм гэж айлдав.

⁴⁰Фарисайчуудаас Есүстэй хамт байсан хүмүүс эдгээрийг сонсоод, Түүнд-Бид бас сохор юм биш биз? гэхэд

⁴¹Есүс тэдэнд-Хэрэв та нар сохор байсан бол нүгэлгүй байхсан. Гэтэл та нар “Бид харж байна” гэж ярьдаг тул нүгэл чинь байсаар л байна гэлээ.