Read Ариун Библи, Mongolian Ariun Bible, 2004 Ефес 5 Bible Online

Ефес 5 - Ариун Библи, Mongolian Ariun Bible, 2004 bible

Ефес 5

¹Тиймээс хайрлагдсан хүүхдүүд адил Бурханыг дуурайгчид болцгоо.

²Христ та нарыг хайрласан бөгөөд Өөрийгөө бидний төлөө Бурханд анхилуун үнэрт өргөл ба тахил болгон өргөсний адил хайр дотор яв.

³Харин ариун хүмүүст үл нийцэх садар самуун, аливаа бузар булай, шунал нь та нарын дунд бүү дурсагдаг.

⁴Бузар булай болон мунхаг яриа, эсвэл тоглоом тохуу нь зохимжгүй. Харин оронд нь талархлаа өргө.

⁵Садар самуун, бузар булайг үйлдэгч, шүтээнийг шүтэгч шунахай ямар ч хүнд Христийн болон Бурханы хаанчлалд өв байхгүй гэдгийг та нар ойлго.

⁶Хэн ч та нарыг хоосон үгсээрээ бүү мэхлэг. Яагаад гэвэл эдгээрээс болж Бурханы уур хилэн дуулгаваргүй хөвгүүд дээр буудаг юм.

⁷Иймд тэдний хамсаатан байж болохгүй.

⁸Учир нь та нар урьд нь харанхуй байсан. Харин одоо та нар Эзэн дотор гэрэл ажээ. Гэрлийн хүүхдүүд шиг яв.

⁹Учир нь алив сайн, зөвт байдал ба үнэн дотор гэрлийн үр жимс байна.

¹⁰Ингэхдээ Эзэнд таалагдах юманд суралц.

¹¹Харанхуй, үр жимсгүй ажлуудад бүү оролц, харин ч тэдгээрийг илчлэгтүн.

¹²Учир нь тэдний нууцаар үйлдсэн зүйлсийг ярихад ч ичмээр юм.

¹³Харин бүх зүйлс гэрлээр илчлэгдэхдээ харагддаг.

¹⁴Учир нь харагддаг аливаа зүйл нь гэрэл юм. Тиймд“Нойрсогч оо, сэр. Үхэгсдээс бос. Христ чиний дээр гэрэлтэх болно”

¹⁵Тиймээс та нар мэргэн бус хүмүүс шиг биш, харин мэргэн хүмүүсийн адилаар хэрхэн алхаж буйгаа хянаж бай.

¹⁶Цагийг авар. Яагаад гэвэл өдрүүд нь бузар булай аж.

¹⁷Тийм учраас бүү мунхаг бай. Харин Эзэний хүсэл юу болохыг ухаар.

¹⁸Дарсанд бүү согтуур. Ингэвэл дураараа дургих байдалд автагдана. Харин Сүнсээр дүүрэн байж,

¹⁹дуулал, магтуу ба сүнслэг дуунуудаар нэг нэгэнтэйгээ ярилцаж, Эзэнд хандаж зүрхэндээ дуулж, ая дуу зохиогтун.

²⁰Бурхан болон Эцэгт бүхний төлөө бидний Эзэн Есүс Христийн нэрээр үргэлж талархал өргө.

²¹Христээс эмээн нэг нэгэндээ захирагд.

²²Эхнэрүүд ээ, Эзэнд захирагддаг шиг нөхрүүддээ захирагд.

²³Учир нь Христ чуулганы толгой байдгийн адил нөхөр нь эхнэрийнхээ толгой юм. Христ Өөрөө тэр биеийн Аврагч мөн.

²⁴Чуулган Христэд захирагддагийн адил түүнчлэн эхнэрүүд нөхрүүддээ бүх талаар захирагд.

²⁵Нөхрүүд ээ, Христ чуулганыг хайрлаад түүний төлөө Өөрийгөө өгсний адил эхнэрүүдээ хайрла.

²⁶Тэр чуулганыг үгээр дамжуулан усанд угааж цэвэрлэн, ариусгаад

²⁷түүнийг ямар ч толбогүй, ямар ч үрчлээсгүй бөгөөд тиймэрхүү ямар ч зүйлгүй, харин ариун, гэм зэмгүй байлган Өөрийнхөө өмнө алдарт чуулган болгох гэсэн ажээ.

²⁸Тиймээс нөхрүүд ч эхнэрүүдээ өөрийн бие адил хайрлах ёстой. Эхнэрээ хайрладаг хүн өөрийгөө хайрладаг.

²⁹Учир нь хэн ч хэзээ ч өөрийн махан биеийг үзэн ядаж байгаагүй. Харин тэжээж, хамгаалдаг. Христ мөн чуулганд ийнхүү ханддаг.

³⁰Яагаад гэвэл бид Түүний биеийн эрхтнүүд юм.

³¹“Тиймээс эр хүн эцэг эхээ орхиж, эхнэртэйгээ нийлдэг. Тэр хоёр нэг махан бие болно”.

³²Энэ нууц бол агуу билээ. Гэвч би Христ болон чуулганы тухай хэлж байна.

³³Та нарын нэг бүр чинь өөрийгөө хайрладгийн адил эхнэрээ хайрла. Эхнэр нь нөхрөөсөө эмээж бай.