Read Mongondow KINOBAḺIAN 1 Bible Online

KINOBAḺIAN 1 - Mongondow bible

KINOBAḺIAN 1

¹Kon pinomangkoian, tungkuḷ in ki Allah nomangkoi nomaḻí kon dunia naa,[1]

²dunia naa in diápa notompiamai, bo diápa doman in tombonunea, nosindipabí komintan, bo Roho i Allah in maya-mayá mako kon tudu in tubig.[2]

³Ki Allah in noguman, “Kobaḻí in bayag!” Bo nobaḻí domandon in bayag.

⁴Nopia in gina i Allah nokoontong kon bayag tatua. Bo sinondí-Neadon in bayag tatua nongkon sindip,

⁵bo sinangoian-Neadon in bayag tatua “Singgai” bo sindip tatua “Doḷom”. Doḷom noitaḻibdon, bo noiangoidon in doḷo-doḷom. Tuata in singgai inta muna.

⁶Onda intua ki Allah in noguman, “Kobaḻídon tobatú botok kon sigad in tubig sinbá mosilai doyowa in tubig bo oyúon in moidimpot kon tampat inta noitontaní tua.” Bo soaḷ tatua nobaḻí domandon. Natuata in pinomomaḻí i Allah kon botok inta nopoyotondí in tubig inta kon ḻimonag in botok tatua nongkon tubig inta kon ḻimoniknea.

⁸Botok tatua in sinangoian i Allah “Ḷangit”. Doḷom noitaḻib bo noiangoidon doḷo-doḷom. Tuata in singgai nogindua.

⁹Noiduduimai kon tua ki Allah noguman, “Koibog-Ku in bayongan tubig inta kon ḻimonag in ḷangit moiḻig kon tampat tobatú, sinbá butá in koontongandon.” Dá nobaḻí domandon intua.

¹⁰Butá tatua in sinangoian i Allah “Toba”. bo pinosipunan in tubig tatua sinangoian i Allah “Dagat”. Bo nosanang gina i Allah in nokoontong kon tua.

¹¹Ki Allah in noguman bui, “Koibog-Ku in butá mopoḷuaidon in bayongan inta mobobiag, bayongan inta oyúon in batoḷ bo bayongan ayop.” Bo nobaḻí domandon intua.

¹²Natuata in nobaḻí, butá nopoḷuaidon in bayongan inta mobobiag. Bo nopia in gina i Allah in nokoontong kon soaḷ tatua.

¹³Doḷom noitaḻib bo noiangoidon in doḷo-doḷom. Tuata in singgai nogintoḷu.

¹⁴Noiduduimai kon tua ki Allah in noguman, “Koibog-Ku oyúon in barang mita kon ḷangit inta motaau monimbayag kon dunia naa, bo mopoyotondí in singgai bo doḷom bo monantú kon pomangkoian in singgai, taong bo singgai moḷoben in agama.”[3] Dá nobaḻí domandon in soaḷ tatua.

¹⁶Dá ki Allah nomaḻí kon barang ponimbayag inta moḷoben, mata in singgai in tangoinea inta mongawasa kon wakutu in singgai, bo buḷan inta mongawasa kon wakutu in doḷom; koḻikud intua binaḻí-Nea doman in tundi mita.

¹⁷Barang mita ponimbayag tatua sinampat i Allah kon ḷangit sin ponimbayag kon dunia naa,

¹⁸bo mongawasa kon singgai bo doḷom, bo mopoyotondí doman in bayag nongkon sindip. Bo nopia in gina i Allah in nokoontong kon tua.

¹⁹Doḷom noitaḻib, bo doḷo-doḷom noiangoidon. Tuata in singgai inta noginggopat.

²⁰Onda intua ki Allah in noguman, “Koibog-Ku kon bonu in tubig mobiag in moyagi-yagimai in mahaḷuk, bo kon toḷungayá mobarong in ḷagapan inta noḷayu-ḷayugan.”

²¹Dá ki Allah in nomaḻí kon mahaḷuk mita mongoḷoben kon bonu in dagat, bo noyagi-yagimai in mahaḷuk inta nobiag kon bonu in tubig, takin noyagi-yagimai in ḷagapan. Bo nopia in gina i Allah in nokoontong kon tua.

²²Ki Allah in nomarakat kon bayongan tua takin nomarenta kon mahaḷuk mita inta nobiag kon bonu in tubig sinbá modugang mobarong bo mopuḻing in dagat, bo nomarenta doman kon ḷagapan mita sinbá modugang doman mobarong.

²³Doḷom noitaḻib, bo doḷo-doḷom noiangoidon. Tuata in singgai noginḻima.

²⁴Onda intua ki Allah in noguman, “Koibog-Ku butá mopoḷuai in bayongan mahaḷuk in toba, inta moyonok bo kaḻig, moḷoben ande mointok.” Dá nobaḻí domandon in tatua.

²⁵Natuata in pinomomaḻí i Allah kon tua komintan bo nopia in gina i Allah in nokoontong kon tua komintan.

²⁶Onda intua ki Allah in noguman, “Tanaa kita in momia kon intau potombatangan in gambar bo pogot naton. Mosia in mongawasa kon toyá mita, ḷagapan mita bo bayongan mahaḷuk pinomayá moyonok ande kaḻig,[4] pinomayá moḷoben ande mointok.”

²⁷Natuata in ki Allah nomia kon intau, pinomia-Nea in mosia naonda bo batangan-Nea tontaní. Pinomia-Nea in mosia ḷoḷaki bo bobay.

²⁸Onda intua binarakatan-Neadon in mosia poḷat noguman, “Pononggadí bo pononggompudon kobarongon, sinbá buímu in ḻimitú bo mongawasa kon tua mita. Moiko in ogoian-Ku in oaidan monompia kon toyá mita, ḷagapan mita, bo bayongan mahaḷuk ibanea inta kaḻig.

²⁹Bo aka soaḷ kaanon monimu yo ogoi-Ku in bayongan mobobiag inta kobatoḷ bo bayongan in ayop.

³⁰Táe kon bayongan in ḷagapan bo mahaḷuk ibanea, ogoi-Ku in bonok bo pinomuḷa inta oyúon in daunnea saḷaku kokaanon monia.” Dá soaḷ tatua in nobaḻí domandon.

³¹Ki Allah in inimindoi kon bayongan inta ain pinomia-Nea tatua, bo nopia totok in gina-Nea. Doḷom noitaḻib bo namangoidon in doḷo-doḷom. Tuata in singgai inggonomnea.