Read Mongondow KINOBAḺIAN 11 Bible Online

KINOBAḺIAN 11 - Mongondow bible

KINOBAḺIAN 11

¹Dungkuḷmai, bangusa mita kon dunia naa tongábí tobatú in bahasanea bo pososingog monia in komintanbí notongkai.

²Naonda in mosia nopobayá kon dotá in pomukaan, mosia nodapotdon kon ḷopá tobatú kon Babilonia, bo nogutun notantú kon tua.

³Mosia in nosigumanan tobatú bo tobatú, nanaa: “Igai, kita in mogaid kon tela bo tubáan naton dapot in motogat.” Natuata in mosia nogaid kon tela inta motaau pakéon kon bangunan, bo aspal in pakéon monia pongompit.

⁴Guman monia, “Koḻigai in kita moposindog in kotá takin tobatú ḷangkeang inta ḻimonikannea modapot kon ḷangit, sinbá kita kotaauandon in bayongan dunia naa bo kita diá domandon moirarit kon dunia naa.”

⁵Dá ki TUHAN namangoidon sin moindoi kon kotá bo ḷangkeang inta pinosindog in intau.

⁶Bo ki TUHAN noguman, “Mosia naa in tobangusa bo tobahasaan doman, bo naa bagu pomangkoian in tomayá mita monia. Diádon moonggot bo mosia in mokomampudon momia kon onuka in kinoibog monia.

⁷Maníka kita in momangoi bo mopotombauk in bahasa monia sinbá diádon mosia mosimangaḻean kon singog in tobatú bo tobatú.”

⁸Natuata in aid i TUHAN noporarit kon i monia kon bonu in dunia naa. Bo nogogaidon in mosia noposindog in kotá tatua.

⁹Manangka intua kotá tatua sinangoian Babel,[24] sin kon tuata in ki TUHAN nopotombauk in bahasa in bayongan bangusa, bo nongkon tua mosia in pinorarit i TUHAN kon dunia naa.

¹⁰Naadon in buí i Sem. Doyowa notaong nopaḷut mako kon ḷunud moḷoben, naonda in ki Sem umur mogatut notaong, sia in nokouḻí kon adí ḷoḷaki tobatú inta tangoinea in ki Arpakhsad.

¹¹Onda intua sia in nobiagpa ḻima nogatut notaong, bo nokouḻípa in sia kon adí mita ibanea.

¹²Kon tungkuḷ in ki Arpakhsad umur toḷu nopuḷú bo ḻima notaong, nokouḻí in sia kon adí ḷoḷaki, tangoinea in ki Selah.

¹³Naonda intua ki Arpakhsad nobiagpa opat nogatut bo toḷu notaong, bo nokouḻípa doman bui kon adí mita ibanea.

¹⁴Kon tungkuḷ in ki Selah umur toḷu nopuḷú notaong, nokouḻí in sia kon adí ḷoḷaki, tangoinea in ki Eber.

¹⁵Naonda intua ki Selah nobiagpa opatpa nogatut bo toḷu notaong bo nokouḻípa doman bui kon adí mita ibanea.

¹⁶Kon tungkuḷ in ki Eber umur toḷu nopuḷú bo opat notaong, sia in nokouḻí kon adí ḷoḷaki, tangoinea in ki Peleg.

¹⁷Onda intua ki Eber in nobiagpa opat nogatut bo toḷu nopuḷú notaong, bo nokouḻípa doman bui kon adí mita ibanea.

¹⁸Kon tungkuḷ in ki Peleg umur toḷu nopuḷú notaong, sia in nokouḻí kon adí ḷoḷaki, tangoinea in ki Rehu.

¹⁹Onda intua ki Peleg nobiagpa doyowa nogatut bo siow notaong, bo nokouḻípa doman bui kon adí mita ibanea.

²⁰Kon tungkuḷ in ki Rehu umur toḷu nopuḷú bodoyowá notaong, sia nokouḻí kon adí ḷoḷaki, tangoinea in ki Serug.

²¹Naonda intua ki Rehu nobiagpa doyowa nogatut bo pitu notaong bo nokouḻípa doman bui kon adí mita ibanea.

²²Kon tungkuḷ in ki Serug umur toḷu nopuḷú notaong, sia in nokouḻí kon adí ḷoḷaki, tangoinea in ki Nahor.

²³Naonda intua ki Serug nobiagpa doyowa nogatut notaong bo nokouḻípa doman kon adí mita ibanea.

²⁴Kon tungkuḷ in ki Nahor umur doyowa nopuḷú bo siow notaong, sia nokouḻí kon adí ḷoḷaki, tangoinea in ki Terah.

²⁵Naonda intua ki Nahor nobiagpa mogatut bo mopuḷú bo siow notaong, bo nokouḻípa doman kon adí mita ibanea.

²⁶Naonda in ki Terah umur pitu nopuḷú notaong, sia in nokouḻí kon adí ḷoḷaki taya toḷu: ki Abram, ki Nahor bo ki Haran.

²⁷Naadon buí i Terah: Ki Terah ki amá i Abram, i Nahor bo i Haran. Ki Haran in kogadí kon adí ḷoḷaki, tangoinea in ki Lot.

²⁸Ki Haran minatoi kon ḻipú kinolahirannea, tuata in Ur kon Babilonia, kon dodai in ki amánea nobiagpa.

²⁹Ki Abram in notonibuḷoi takin i Sarai, bo ki Nahor notonibuḷoi takin i Milka ki adí bobay i Haran. Ki Haran kogadípa kon adí ḷoḷaki ibanea, tangoinea in ki Yiska.

³⁰Táe ki Sarai in bantó.

³¹Ki Terah in nonaḷámai kon kotá in Ur kon Babilonia noyotakin i Abram ki adínea, bo ki Lot ki ompunea, bo ki Sarai mototakanea bobay. Makusudnea mayá in butá in Kanaan. Táe naonda noyaputmai kon Haran, mosia nogutun notantú kon tua.

³²Bo kon tampat tatua doman ki Terah minatoi kon dodai in sia umur doyowa nogatut bo ḻima notaong.