Read Mongondow KINOBAḺIAN 12 Bible Online

KINOBAḺIAN 12 - Mongondow bible

KINOBAḺIAN 12

¹Ki TUHAN noguman kon i Abram, “Taḷaaidon in butámu, ginaḷummu bo baḷoi i amámu, bo bayádon kon butá inta bain tundúon-Ku kon inimu.

²Akuoi in mobogoi kon inimu in buí inta mobarong bo mosia in mobaḻí bangusa inta moḷoben. Iko in barakatan-Ku, bo baḻíon-Ku in tangoimu ponango-nangoian in bayongan intau kon dunia naa, sahingga iko in mobaḻí barakat.

³Akuoi in momarakat kon intau mita inta momarakat kon inimu bo mongutuk kon intau mita inta mongutuk kon inimu. Bo popisí in iko dá Akuoi in momarakat kon bayongan in bangusa inta kon dunia naa.”[25]

⁴Ki Abram in umur pitu nopuḷú boḻima notaong kon tungkuḷ in sia nonaḷámai kon Haran, sin dinumudui kon parenta i TUHAN kon inia. Ki Abram nobuat bo nopobayá in butá in Kanaan noyotakin i Sarai ki Buḷoinea, bo ki Lot pokuadíonnea, takin bayongan in kapunyaannea bo bobantungnea mita inta nouḻí monia kon Haran. Naonda in mosia nodapot kon Kanaan.

⁶Ki Abram noḻibu kon butá tatua bo noidapotdon in sia kon tobatú pangkoi in kayu inta kai monia mokaramat kon More, inta tampat pososumbaan kon Sikhem. (Kon dodai intua intau in Kanaan nogutunpa kon butá tatua.)

⁷Ki TUHAN nokipogontong kon i Abram bo noguman kon inia, “Tanaa in butá inta ogoi-Ku kon buímu.” Bo ki Abram noposindog in tobatú mezbah kon tua sin posumbaan kon i TUHAN inta ain nokipogontong kon inia.

⁸Nopaḷut mako kon tua sia nongingguputdon kon bobayáannea nopobayá in toḷatan, kon butá inta notombu-tombuḷud kon dotá in pomukaan kon kotá in Betel, bo nogaid kon ḷoḷaigan kon sigad in Betel bo kotá in Ai: Betel kon dotá in toyopan bo Ai kon dotá in pomukaan. Kon tua sia in noposindog doman in mezbah tobatú bo nosumba kon i TUHAN.

⁹Onda intua sia nonggingguputdon bui kon bobayáannea nongkon tampat tobatú mopobayá in tampat ibanea, nopobayá in toḷatan butá in Kanaan.

¹⁰Táe kon Kanaan koyogot in malarat moḷoben, tuamai ki Abram in minayápa bui in tampat inta moyayu-yayú nopobayá in toḷatan, kon butá in Mesir sin mogutun kon tua modapot in malarat tatua mopaḷut.

¹¹Kon dodai in sia tumaḻibdon kon sigad bo tumuotdon kon butá in Mesir, sia in noguman kon i Sarai ki buḷoinea, “Iko totok in moḷunat, buḷoiku.

¹²Aka intau in Mesir mokoontong kon inimu, mosia tantú mogumanbí kon iko in ki buḷoiku, bo akuoi in ḻimodon monia táe iko in pomayábí mako monia mobiag.

¹³Dá maníka pogumandon kon iko in ki ai-aiku sinbá akuoi in pomayádon mako monia in mobiag bo mopia doman in pototomu monia kon inakó sin popisí in iko.”

¹⁴Bo noitotuu, naonda in ki Abram minayádon nongin sigad in butá tatua bo nodapotdon kon butá in Mesir, intau mita nokoontong kon ki Sarai totokbí in moḷunat.

¹⁵Tongonumai in pogawai komaḻig in nokoontong kon inia bo poḷat minayá nopotaau kon i datu kon totuubí moḷunat in bobay tatua; tuamai sia dinia kon komaḻig i datu.

¹⁶Pinopisí in ki Sarai, dá ki Abram in sinomu nopia totok i datu poḷat inogoian in bobantung mita, takin paanan in domba, bembé, sapi, keledai bo unta.

¹⁷Táe pinopisí in ki datu nogamá kon i Sarai, dá ki TUHAN nopouma in panyaki mita inta mokoondok kon i datu bo kon intau mita inta kon komaḻignea.

¹⁸Bo ki datu in nogoiní kon i Abram bo noḻibó kon inia, “Onudon in pinomiamu kon inakó naa? Nongonu sin diábí pinogumanmu kon sia naa in ki buḷoimu?

¹⁹Nongonu sin pinogumanmubí kon sia tua in ki ai-aimu bo pinomayámu doman mako sia ginamáku mobaḻí ki buḷoiku? Naa in sia, ki buḷoimu; gamádon bo bayádon!”

²⁰Bo ki datu in nomarentadon kon tongonumai in pogawainea nogatod kon i Abram iḻumuai minayá nongkon butá in Mesir takin ki buḷoinea bo bayongan kapunyaannea.